《我終於明白到，唔只歌手要有後台，歌迷都要有後台》
(更新，我買到啦...開心跳起yeah)
今日係張敬軒同王菀之演唱會飛預售嘅日子，我set 咗alarm reminder，call 咗朋友叫佢whatsapp 提我。我就好似上山前做足準備咁，電話有，信用卡有，開哂壇，去定website，手指放喺F5上面準備。
但無論我幾努力，我都入唔到個網入面，個F5 button就好似Note 7 咁，開始出煙，有爆炸嘅危機，我已經用咗「平時搭Lift 撞到老細高速撳關門」個速度撳F5。我無放棄，左手F5，右手撳電話，我就好似新聞話有個女人一分鐘打60 次電話俾前男友求復合咁，痴咗線re-dial。入到個網站嘅時候，已經接近十點，俾我入到去嘅時候，就賣完啦，嗚嗚嗚嗚嗚嗚嗚.....
然後朋友同我講「今時今日，你唔係咁天真咁相信無後台唔識人，你會買到飛呀嘛？」
香港地，歌手分兩種，有實力同有後台嘅，歌迷都分兩種，有後台識人早過優先預售都買到飛嘅，第二種就係我呢種，無後台唔識人，無論預售，定墮後，我都係買唔到飛。
我溝唔到個南亞裔通宵訓街買飛，唔想輸俾黃牛，又唔識高超科技入system快速買飛，於是SAMMI我買唔到，五月天我又買唔到，軒仔ivana我都買唔到。
「SAMMI 病咗，你買唔到飛唔係一種遺憾呀」
No no no....買唔到就係遺憾。點解我對買live concert 飛咁執著？因為個張concert 飛唔係一張concert 飛，佢係等同一張時光機嘅車飛，呢啲歌同歌手，係緊扣住我嘅回憶架。我唔係想開kkbox聽歌咁簡單，我想見到個歌手現場表演，那怕Sammi 失咗聲，只要我見到佢出現，我嘅回憶就返來啦。
十年前，參加聯校music festival，當時張敬軒同王菀之唱咗一首《手望》，仲好記得十年前個個畫面同笑聲。十年前輕易得到嘅快樂，十年後，敗喺「識唔到人，永遠買唔到concert飛」嘅手上。
買唔到concert 飛嘅香港人都很脆弱
我因為屢次買唔到concert飛，耿耿於懷，用咗一個早上先接受到買唔到concert 飛嘅事實，然後用整個Lunch time 去埋怨，concert 飛優先預訂內部認購同黃牛唔公平嘅社會現象。好啦，返去開個YouTube不停聽再不停喊啦，嗚嗚嗚嗚嗚嗚......
點解演唱會飛唔可以好似小學去旅行咁，出通告問咗有幾多人去，再預人數，決定開幾多場？又或者，演唱會飛就係要做到一定要有人睇唔到先令件事來得珍貴。
#張敬軒
#王菀之
#如果你哋再開_可唔可以出通告再抽籤
#有無一種優先訂飛係俾屢次買唔到飛人士買
#嗚嗚嗚嗚嗚嗚買唔到飛揮手區
張敬軒 Hins Cheung
Ivana Wong 王菀之
