Search
【此紙不同彼紙】
有啲紙明明係紙，但又唔似紙，不過佢真係叫紙，呢種係熱感紙。
呢個名可能大家比較少聽👂🏻，其實啫係日常購物會見到嘅收據，甚至行李牌同登機證都有機會用到佢。
唔好以為有個紙字就可以回收，熱感紙上嘅塗料喺回收過程唔能夠完全清除㗎，再加上洗出嚟嘅塗料容易污染環境，大家都唔好再拎佢去回收喇🙅🏻♂️。
#綠在區區成日都收到 #下次唔好啦 #最好就用電子收據 #咪嘥嘢
如果你要買郵票，以前只可以去便利店或者在郵局開門嘅時間去郵局買，咁但係有時只需要一個半個郵票，郵局又關門了，咁點算呢？唯有用呢一類型嘅舊式郵票售賣機，唔好處呢就係你一定要有硬幣先可以買到，而面值嘅選擇亦都唔多。今時今日當然要進化啦！來到Z世代就有呢部全新嘅郵票售賣機，今日就同大家講下呀！
呢部機嘅操作相當簡單，只要在畫面上面選擇語言，之後確認翻條款同細則，就可以從9款唔同面值嘅常用郵票中揀你要買嘅數量，每次最多可以買20個。揀好之後，再確認一次，就可以用八達通俾錢喇！你所選擇嘅郵票，即時就會在下面跌出來，如果你頭先有要求要收據，都即時印埋俾你架！
有別於傳統嘅郵票，呢個新一代嘅郵票無特別嘅圖案設計，反而多咗個QR Code，要流意嘅係，郵票由於以熱感技術打印，過咗一段時間之後就有機會褪色而失效，所以大家買咗就最好快啲用咗佢喇！另外，部機見到在八達通旁邊仲有幾個預留位置，相信在不久嘅將來，將會加入其他嘅電子付款方式。呢款機現階段已經在中環郵政總局、尖沙咀郵局以及元朗郵局24小時提供服務。
不過唔好以為呢個係好新嘅技術，原來在美國，好多年前已經開始可以在網上付款買同印郵票，根本就唔需要郵票售賣機，只需要登入指定網站(https://www.stamps.com/ )，俾錢，之後就可以自行列印郵票在貼紙、信封上面使用。唔知香港幾時先會有呢個服務提供呢？
《Z世代達人》
麥卓華
