仇思達節錄咗D100版本長毛「鎅票論」新譯：
「搵所謂鎅票嚟削弱你，跟住搵幾個普通人出嚟拉多你千零票，個設計好準嘞。如果你將伍迪希，加曾麗文，加阿基，加李卓人，贏埋添！」（D100，2018年11月27日）
又等我節錄花膠台版本嘅長毛「鎅票論」：
「所謂鎅票，就係響你無勝算之下仍然堅持參選令到他人不參選，除非你話我聽，你係諗住會贏倒！」（花膠台，2018年11月27日）
大佬呀，有邊個人出黎選唔會同人講自己有信心會贏架（最多話選情唔樂觀），馮檢基由參選果刻去到開票前一刻，次次都講到明覺得自己有機會贏架！咁依你定義，馮檢基點會係鎅票？
除非你長毛判斷倒參選嘅人其實係講大話，內心從來都想鎅票啦。但如果你真係有資格判斷，咁選舉主任又點解無資格判斷本土自決派參選人係咪誠心相信自己反港獨自決呢？咁誅心咁你同共產黨有乜分別？
但都未到最激果Part，最尾佢將所有陳凱欣同李卓人以外嘅參選人，話「全面客觀效果都係拎走咗啲票」，即係響長毛心目中，除咗飯民同建制大台欽點嘅候選人，全部都唔應該出黎選！其實長毛係咪已經老懵懂到連民主嘅基本理念都唔記得咗？唔通伍迪希出黎選呀陳凱欣又要批評佢出黎鎅票，阿鄧家彪出黎選又要批評方國珊出黎鎅票，阿陳家珮出黎選又要批評馬草泥出黎鎅票？
不過最好笑嘅都仲係，依照長毛定義，咁當日陶君行出黎九東鎅死黃洋達令謝偉俊當選；黃浩鉻出黎新西鎅死李卓人令何君堯當選；吳文遠出選大南區鎅死陳文佑令莊永燦當選（仲未計金鷹都有份出黎鎅票），咁你長毛係咪要為社民連歷年鎅票往跡道歉先？抑或佢地覺得自己有機會贏就唔係鎅，馮檢基覺得自己有機會贏就係鎅票任你定義？
當然，到你唔出黎選，好似黃毓民咁，又會比長毛屌話佢縮埋響個網台唔出嵿，又會比佢問除咗響網上打飛機之外仲做過啲乜，即係無論你做乜，都總會搬到龍門可以比佢射入網……
