一，有同事話：「唔知點解，成日覺得自己好似中咗招；有時諗，不如中咗算數，唔駛諗咁多。」頂你個肺，咁你又叫我返公司簽支票？
二，佢又話：「老闆，不如你又從心理學角度，分析下呢種諗法。」
三，唔講心理學，不如先計數。香港每日新增確診人數，真係同中六合彩差唔多。嗱，戴晒口罩咁講，唔係叫大家唔好注意個人衛生。其實，任何時候都應該要注意個人衛生。正如以前講，注意個人衛生，係一個良好公民嘅責任；呢個係社會共識。
四，即係話，洗手洗手洗手，無乜事唔好去人多嘅地方等等，唔舒服就帶口罩，唔好出街等等，對個人嘅代價唔高，但加起來對社會代價就相對低。又大膽問下大家，你哋有冇每年打流感疫苗？唔係 100% 有效，但我都會照打。
五，好，戴完口罩，講下啲逆思維嘅嘢。話說，有種心理病，叫驚恐症，成因不明，有理由相信有遺傳嘅因素，但亦都有後天環境嘅成份。其實，好多病症，亦如是，硬係要分先天後天意義其實不大。
六，驚恐症引起嘅 panic attack 嘅病癥包括：心跳加快、呼吸急速、手心冒汗、手震、心胸翳悶、肚痛及肚瀉、手腳痳痺、時冷時熱、頭痛等。嗱，呢啲病癥係咪會令人會以為自己中招呢？
七，同事又話：「咁，點樣先知自己係驚恐症定真中招？仲驚喎。」係㗎。
八，又咁講，本來以上反應，源於人嘅自我保護機能；無論係真病毒，又或者係自己以為有病，身體都係咁樣去保護自己。我哋又真係唔可能去分辨。
九，所以，延伸上面嘅原則，假如確保個人生理衛生係公民嘅義務，每個人其實都應該要對自己嘅心理衛生負一定嘅責任。係，我知，正如頭先所講，有啲症係天生嘅，病，其實冇人想。不過，對大多數人來講，其實有啲事係我哋可以做嘅。
十，有唔少研究發現，靜觀對維持血清素（Seretonin）水平有一定幫助。飲食習慣都係；斷食同減少對碳水化合物嘅依賴，一樣對維持體內血清素水平有幫助。
十一，其實，無論係乜嘢危機，都係因為一直以來大家都忽視潛在嘅風險。社會如是，企業如是，個人亦如是。去到爆發嘅一刻，好多時都會混合咁爆發。香港今次嘅完美風暴，暴露好多呢個城市嘅弱點。過去幾年，我都提過好多次，一出事就好難管治，呢個政府真係唔好高估行政霸道嘅能力。好可惜，就係咁，社會嘅制度明明有缺陷，但繼續以投入大量資源嘅方法去運作，亦即係我成日講，以為錢可以解決嘅問題，就唔當係問題。
十二，香港都未出現大規模嘅經濟衰退同失業；到呢啲問題都出現，又會有另一浪嘅衝擊。到時都唔知疫症完未，但肯定政治社會矛盾未解決。
十三，政府，肯定會想將個責任推卸落商人同有錢人身上；但香港人經過呢幾個月，都應該好清楚係咩一回事。
十四，最後，都係個句：自己香港自己救，自己條命都係。呢句說話唔係叫大家各家自掃門前雪，呢個只係最基本嘅義務，如果連呢一點都做唔到，又點樣去幫其他人？
斷食 心跳加快 在 郭葉璘的公開專頁- 吃低醣生酮後 - Facebook 的美食出口停車場
吃低醣生酮後，「心悸」及「心跳加快」怎麼辦？ 我會劈頭就問：「你鹽巴吃得 ... 而低醣又間歇性斷食的人，每天只吃一至兩餐，且食量變少。如果把鹽全加進食物裡，就會 ... ... <看更多>