各大地產商一致加持 大舉開發郊野公園
【開發郊野公園就解決到房屋問題？】
近年浮現一個香港土地發展史多年未有嘅新觀念：只要開發少部分郊野公園用地增加土地供應，就能夠解決房屋問題甚至「打倒地產霸權」，非常能夠吸引眾人眼球。未知與特首競選活動有否關係，近日有一疑似候選人再度炒熱郊野公園邊陲建屋建議，更加誓言即使「既得利益阻力巨大」，都希望建議能夠「翻閹」。
雖然呢個建議喺三年前「土地大辯論」中已被市民丟入垃圾桶，但有人仍然如獲至寶，成件事似乎唔止係「跑馬仔」咁簡單。要理解背後動機，或者了解開發郊野公園邊陲建屋係咪真係能夠打擊地產霸權，最有效嘅方法就係分析究竟係邊啲人最支持呢種講法。
【地產商支持推冧樓價？】
透過輿論分析，搜尋自2013年起（政府開始提出發展郊野公園）嘅新聞，唔難發現公開高調支持發展郊野公園嘅人士，唔少其實係地產商本身，以致有潛在利益嘅地產代理、工程界及測量界（好可能都係選委），莫非佢哋都想倒自己米，增加土地供應推冧樓價，惠澤市民？
事情當然唔係咁簡單。以下只係少部份嘅節錄：
▍「大戰略家 」：
－「如果你給我一個Google地圖，我立即點出那些地可用，建50萬個單位不是什麼難事！」
（遠東發展邱達昌）【註1】
▍手頭蟹貨 待價而沽：
－「自己也有些地在新界郊野公園的邊陲，由於有雀仔、蝴蝶、青蛙而不能發展。」（都係遠東發展邱達昌）【註1】
▍「極高」成本效益：
－「香港有41% 土地係郊野公園，如果拎2%郊野公園土地出嚟，1%基建，1%起樓」，已經多咗好多土地。」（恒隆地產陳啟宗）【註2】
－「倘若撥出當中1%鄰近市區的土地起樓，已足夠為逾10萬人提供居所。」（恒基地產李兆基）【註3】
▍計仔多多：
－「不但填海，還有很多方法，例如開闢多點郊野公園，與鄰近市區的郊野公園交界」
（合和實業胡應湘）【註4】
－「支持北大嶼山填海，因本港不少土地均由填海得來，也認為可檢討郊野公園地帶發展。」（長江實業趙國雄）【註5】
－「目前香港市區住宅用地只佔全港土地的4%，但郊野公園面積卻佔地40%，為何香港人權不如草權」【註6】（中原地產施永青）
－「若將全部郊野公園轉為住宅並不可能，但可考慮視乎地點，將部分改為住宅用途。」（新世界地產鄭家純）【註7】
【類似言論眾多 恕未能盡錄】
佢哋非但係唔抗拒發展郊野公園，而且係主動、積極咁提倡，唔少嘅睇法，比政府提出嘅更大膽、更進取。佢哋對郊野公園呢類「處女地」(virgin land) 流晒口水嘅態度，同某啲人嘗試塑造郊野公園開發方案能夠打擊地產霸權嘅講法完全相反，明顯背後事有蹺蹊。
【已有地產商身體力行 率先進駐邊陲地帶】
係輿論分析嘅過程中，唔難發現其中一大發展商新鴻基地產異常低調。其實新鴻基近年已經靜悄悄喺郊野公園外圍插旗。現正銷售嘅新鴻基樓盤瓏珀山 (ST MICHEL) 位於沙田水泉澳多石街【註8】，距離早前因民意反對而終止嘅馬鞍山郊野公園邊陲地帶發展可行性研究選址之400多米外，證明靠近郊野公園嘅豪宅地段，對地產商有一定吸引力。
同樣係新鴻基地產、亦係馬鞍山郊野公園邊陲，去年尾政府建議係邊界外10多米興建公屋（同而家個建議咁似嘅？），但係發展計劃中，靜靜雞利用公帑起路駁入新鴻基位於不遠處嘅農地，而新鴻基亦已提交改劃申請，計劃興建豪宅【註9】。從新鴻基嘅行動可以睇到，現在開發郊野公園邊陲嘅提議雖然名義上係起公屋／居屋，但實質上地產商的確能夠分一杯羹，難以確保他日正式侵佔郊野公園後，唔會照版煮碗。
若然話發展郊野公園起公屋係打擊地產霸權、解決房屋問題，倒不如話呢個係一場精心策劃嘅「地產商自肥計劃」。而提議「翻閹」嘅人，已經提晒水「如果大家認為這個計劃是可行的，這個計劃是可以複製」【註10】可以預期，若然郊野公園邊陲發展先例一開，日後必定陸續有來。
#地產郊
#地產商自肥計劃
#如果我哋收地產商錢我哋先唔會寫呢啲文
#郊野公園研究
延伸閱讀：
【閒置中 Liber Podcast Ep34 - 搞郊中 - 從纜車動物園到礦場豪宅 - 馬鞍山郊野公園】
https://anchor.fm/liberresearch/episodes/Ep34---------envid8
【馬鞍山郊野公園成立之初 已有地產商「睺住」】
https://www.facebook.com/localresearch/posts/3665218146907565/
【港英政府：發展郊野公園邊陲？ 無得諗！】
https://www.facebook.com/localresearch/posts/3643571052405608
【開發郊野公園：一場土地觀念的洗腦運動】
https://bit.ly/3hWMFYV
【註1】邱達昌：有樓才有歸屬感！
https://bit.ly/3fo9ovm
【註2】陳啟宗：港經濟十年廿年返唔到轉頭
https://bit.ly/3fiPOPK
【註3】李兆基：撥郊野地1％ 夠10萬人住
https://bit.ly/3fqAtOi
【註4】港人均居住面積遠低於其他地區 胡應湘：應填海改善居住問題
https://bit.ly/2To1GJ6
【註5】新房策「激活」樓市 放寬樓按重啟換樓鏈 長實趙國雄： 社會運動影響市況
https://bit.ly/3yHvdO5
【註6】土地開發「人重要還是鳥重要？」
https://bit.ly/3hX9yeP
【註7】鄭家純：將部分郊野公改建住屋 何樂而不為
https://bit.ly/3hVU6j2
【註8】覓至房 瓏珀山 (ST MICHEL) https://bit.ly/3vtKGPA
【註9】【城規地產霸權】審議馬鞍山郊野公園邊陲改劃 過3分1委員都同新地有關https://bit.ly/3fnY5Dd
【註10】【郊野殺手 再度空群而出】末日倒數：開發郊野公園
https://bit.ly/3wA2w3I
-
🔍研究到底 月捐支持民間研究工作
https://liber-research.com/support-us/
🌪FPS ID：5390547
🎩HSBC PayMe 捐款支持：https://bit.ly/32aoOMn
👣Follow Us: https://linktr.ee/liberresearch
新界郊野公園 在 新界【八仙嶺郊野公園】【流水響-「森林中的天空之鏡 ... 的美食出口停車場
今次的視頻是和大家一起分享,假日好去處， 香港- 新界 【八仙嶺 郊野公園 】【流水響-「森林中的天空之鏡」】【鶴藪水塘】交通方便,景色絕美, 打卡點多, ... ... <看更多>