《其實你要我個簽名做咩？》
每年書展，當我簽名簽到呆呆滯滯嘅時候，我就會諗......
「我又唔係咩嘢大人物，其實你要我個簽名做咩？」
本來今年諗住唔攪簽名會，幫我揭書嘅人都冇叫嚟幫手，但第一日我已經知道唔得，今年我七日一共簽咗......三十八個鐘頭。
點解要簽名？而且有求必應？
因為如果冇你哋買書，在香港做作家根本冇可能生存，甚至生活都好困難。因為有你，我先可以一直出書，「係你養活我同我九個屋企人」，所以我一定一定一定一定要幫你哋簽名，簽到手斷都要簽。
好喇，我講咗我簽名嘅原因，你可唔可以話比我聽，其實.....
你要我個簽名做咩？
要有人去欣賞自己，係一件好困難嘅事，點解要買你本書？點解要買孤貓嘅產品？全世界無數作家、無數貓，點解係要愛我嘅作品？點解喜歡一個幼稚到重覺得自己可以拯救世界、打敗怪物、對付人渣嘅人？
上年，因為不同原因，我對自己開始有質疑，我重寫唔寫落去呢？孤泣工作室重繼唔繼續營運？最大原因係收入問題，我兩年幾無收過自己版稅，全部放係工作室，我真係依靠patreon同youtube些微嘅錢生活，我成日同同事講，你搵得多過我。
今年，終於有返書展，係、你、哋、親、手將我嘅「質疑」打破。
「原來，重有好多人睇你寫嘅書，原來，重有好多人喜歡我家九隻孤貓。」
係你令我知道我堅持落去嘅原因、係你令我有返晒信心、係你令我明白唔可以放棄。
你同我講你睇咗我幾多年書、陪住你成長、由邊本開始睇、買咗好多我嘅書、書櫃全部都係我嘅書、我會一直支持你、下年我又嚟排過隊、我個仔我個女好鍾意睇你寫嘅書、你出幾多本書我買幾多本書、你寫嘅書令我有所領悟等等等等。
每一句都係真實出現過、每一句我都有清清楚楚聽到、每一句我都會放入心中、每一句都令我會心微笑，雖然戴住個口罩你睇唔到，其實，今年係我笑得最多嘅一年。
無論係新舊嘅讀者，我都重複又重複、重複又重複咁講.....
「沒有你，沒有我。」
其實你要我個簽名做咩？
或者，我心裡面已經有答案，嘿。
感激。
孤泣字
#孤泣 #lwoavie
