打橫嚟講：香港人不育之謎，奸計也！
做老闆，請伙記的準則，當然係搵個幫得手嘅「人才」啦！但香港廢柴政府內那一籃子垃圾庸才，不單止食嘢唔做嘢，做嘢就堅舐嘢！
嗱！睇吓嗰個乜Ｑ「人口政策督導委員會」啦！正一七吓七吓，竟建議動用公帑資助「不育」的港人人工受孕，提高生育率喎！搞到本身已屙尿都唔得閒嘅食衞局局長高永文撲出嚟大聲疾呼建議有難度，對此有保留。
又見證一班低Ｂ仔禍港添煩添亂。
喂！白癡仔，究竟你哋知唔知香港近年出生率低的主要原委係乜o架？咁多人唔敢生仔，最主要就係怕咗你班低能兒呀！你班有權「治港」嘅垃圾呀！
香港開埠以來一百五十年的基業，災難性的毀滅，現時眼下，亂象叢生，禮壞樂崩，民不聊生，仲趴街過東漢末年，生個BB出嚟，即逼佢受苦啫！
喂！仲有呀！BB未出世，佢阿媽已同非法在港大陸人爭床位、搶奶粉、霸學位；再大啲，又要提防佢受劣質愛國思想毒害；跟住就係怕畀強國同胞的行為薰陶，當街大小便、打尖、貪腐、假大空、自卑、自大、橫蠻反智……（下刪三萬字）。
港Ｂ出世後，就話慘啫！但之前，佢哋父母的苦況，包括經濟緊絀、工作壓力、遲婚、體質因素，甚至社會環境，皆令他們不要BB或不育。平日，做到嘔泡，攰到頭也抬不起來，「茄」都屙唔出一舊啦！仲講乜生仔呢？有啲窮人更慘，連做愛嘅空間都無，生瘡咩？最好笑係政壇元秋蔣麗芸建議佢哋去佐敦爆房喎！
喂！有錢租房，都留番嚟買condom啦！
人口政策督委班友搞大龍鳳，其實係「指證」香港需要放寬內地人來港定居的需要和造勢，奸計也！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
