【其實《#神奇女俠1984》我最期待係佢演出】
或者你會期待《神奇女俠1984》睇「Gal BB」演出，咁我都係，但入面最期待反而係Kristen Wiig－－睇佢點樣演反派。
由《Saturday Night Live》年代去到電影如《最爆伴娘團》、《捉鬼敢死隊》等等，Kristen Wiig都有種獨有嘅喜劇感，你睇到佢行出嚟就會想笑果隻。佢或者有少少似香港嘅吳君如，唔介意去醜化自己、唔介意冇曬形象，完全係放到盡去引觀眾笑。即使如卡通《壞蛋獎門人》、《洋腸派對》（Well, 呢套可能有少少唔係傳統「卡通」）配音，都係搞笑嘅角色。喺我心目中，佢係個好好嘅喜劇演員，都好鍾意睇佢演出。
或者，佢自己都想轉型，唔想一世都搞笑，近年好似《媽媽！》、《火星任務》都開始演啲「認真」嘅角色，但似乎搞笑形象深入民心，一「認真」就冇乜發揮。認真還認真，作為喜劇形象極重嘅演員，叫佢演反派極盡都係《非常索凸務2》果種搞笑嘅「反派」，好難想像可以係個真反派。
睇完《神奇女俠1984》最新條預告，似乎佢堅係可以演個認真嘅反派，都唔似個大配角，而係演技有所發揮果隻。預告片入面由佢典型傻大姐形象，到好型咁行出嚟果吓，勁正！翻查一下資料，佢所演嘅反派Cheetah，係神奇女俠嘅一大宿敵，唔係行先死先果類無厘頭反派，應該都幾重戲份。
睇住一個自己幾鍾意嘅演員，喺演出上有所突破，都有所期待嘅。
📣即訂Patreon加強版，閱讀更多精選深度獨家電影文章：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
