尋日蘋果有單新聞，講一個英國女人帶左一隻叫Tramadol的止痛藥去埃及俾佢老公止背痛，結果原來呢隻英國醫生署方止痛藥，在埃及係禁藥，自然俾埃及以販毒為理由拉左，面臨25年監禁，甚至死刑。唔駛問呀貴，成單新聞立刻變曬做小朋友齊打交，彈人地文明古國嘅有、彈人地借機勒索嘅又有，總之就七國咁亂。
人妻先生看罷眉頭一皺，覺得案情並不簡單。首先我很懷疑埃及人的工作態度，不怎的出名盡責的他們怎會這樣好眼力認到這種藥呢？根據2015年的報導，原來這隻止痛藥在埃及是被濫用藥物第一位，普遍用於提升男士性能力與保持清醒的用途，其泛濫程度可以用來賄賂官員、甚至結婚當人情都仲得。加上本身有鴉片成分，所以會出現上癮的情況。由於係咁熱門，大概化左灰海關都認得出，並唔係好似大家最初想像那樣「無端端被列為禁藥的止痛藥」。
另一方面，我亦好好奇帶一瓶半瓶應該唔易響警報，海關好少見你有一樽藥就開你行李，亦很少會仔細盤問。所以我搵多左一單外國新聞，終於知道佢帶左幾多--- 29排，一排十粒，即係290粒。呀姐你會唔會狼左少少？你老公咁樣食法，止完背痛會唔會腎虧/爛肝了？
提提大家，如果有人同你講自己國家買唔到某隻藥，叫你帶過去，呢件事本身已經相當有嫌疑。其實「買唔到嘅藥」，好大機會係「禁藥」的代名詞，一個國家貿易自由，如果你唔係孤兒藥，點會藥房冇得賣？所以大家真係諗清楚先好幫人帶藥，尤其是帶比例不正常地多的數量。
其實，不止是藥物，就算是媒體都會令人產生依賴。看新聞時要不斷思考，覺得離奇的話就要自己落手落腳找真相，呢個世界，無鬼唔會死人，但做懶鬼一定死得人多，至於點死？
跟車太貼。
話說回來，英國一種極常見的催情劑Poppers是合法的，但在香港卻是違法，所以售價比香港的黑市價便宜得多，但各位如果去英國諗住帶呢件「手信」返香港，停一停諗一諗。
最後，大家成日去嘅泰國其實都有禁藥表，在這裡可以看到2016年版的，但大家請自行定期找最update的指引，畢竟我又不是做海關，這些事情我不會老是望著。
#據聞呢隻藥好多國家都禁左
#相信尋找真相的人
#懷疑尋到真相的人
#連我你都必需要懷疑
#我都可以錯架
#奉旨百發百中架咩
#無心跣你一鑊先撻得最甘
#閱讀與思考是不能分割的
