我嘅職業係：製作虛擬女友（下）
上集：https://bit.ly/3iF2K62
直到有一日，我睇到一單新聞，一單轟動全港嘅殺妻案。
殺老婆嘅，係阿傑。
阿傑嘅老婆患上怪病，連基本嘅自理能力都冇，記憶力同智力都受到影響。
阿傑試過請看護，但一來自己人工唔高，請唔到最好嘅看護；二來連續請咗幾個看護，都冇好妥善咁照顧老婆，至少阿傑唔滿意。
所以，阿傑辭咗職，全職照顧老婆。
所有人都話，阿傑係難得嘅好男人，但阿傑當時都估唔到，全職照顧一個病人嘅壓力有幾大。
老婆嘅血液循環唔暢通，每三個鐘就要翻一次身，再用手按摩全身，一次就要成廿分鐘。
如果遲咗翻身，老婆嘅身體就會出密密麻麻嘅瘡，啲瘡仲會好快流膿，皮膚會慢慢裂開，紅嘅血、黃嘅膿混為一體……
有一次，阿傑實在太攰，瞓過龍。
醒番嗰陣，床單已經被膿血覆蓋，老婆又痛又痕，流晒冷汗。
阿傑問老婆做咩唔叫醒佢，老婆答：「你咁攰，我想你瞓吓。」
佢哋兩個一齊攬住喊。
為咗照顧老婆，阿傑只可以靠接Freelance維持生計。
老婆精神啲嗰陣，阿傑都試過推輪椅帶佢出去玩。
但大多數都係以老婆突然病發，又或者要應付某啲生理狀況，只可以狼狽咁離開。
阿傑嘅事業好難再發展，生活亦冇任何樂趣。
終於有一日，阿傑不勝其煩，喺老婆睡夢中，捏死咗佢。
阿傑話，即使佢殺咗老婆，佢最愛都係老婆。
我一聽到佢咁講，就嗤之以鼻。
阿傑最愛明明係初戀小琳，就算捉襟見肘，都專門嚟訂造虛擬女友。
話唔定，阿傑仲諗住偷偷殺咗老婆之後，可以同小琳舊情復熾添。
我覺得，係依加殺妻單嘢穿咗，阿傑冇得揀，先扮晒深情之嘛。
但當我上網搵呢單案嘅更多資料，我見到阿傑老婆病之前嘅相……同小琳一模一樣，連個名都係叫小琳。
阿傑嘅朋友上網講起佢哋嘅愛情故事，雙方都係初戀，拍咗好多年拖，結婚。
雖然經濟條件唔係特別好，但兩個人好相愛，好似天生一對咁，係所有朋友羨慕嘅對象。
直到，小琳身患怪病。
我呆咗。
我諗番起，阿傑訂造虛擬女友嗰陣，佢嘅急切同深情。
由始至終，佢愛嘅都係小琳。
只不過，佢最愛嘅，係當年健康活潑嘅小琳。
面對久病在床，摧毀自己生活嘅小琳，阿傑終於忍唔住，殺咗佢。
到底愛，係愛一個人，
定係愛一個人帶畀自己嘅美好生活？
—完—
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #我嘅職業係製作虛擬女友
我嘅職業係製作虛擬女友 在 【整理】台灣Vtuber（虛擬Youtuber/虛擬網紅/虛擬直播）整理 的美食出口停車場
然而，不是人人都想要在螢幕前露臉，因此，興起了一種不露臉，轉而讓虛擬角色代替自己面對觀眾的職業－－Vtuber。 （說到這邊，想必大家都知道vtuber ... ... <看更多>