阿根廷新手師奶學懂的事情：
1. 有飽飯食唔係必然
2. 行得太快，有時候錯過咗身邊美好事物都唔知
3. 靚嘅肉眼扒，唔洗落任何調味料，兩邊煎煎佢，五成熟，入口即溶
4. 日日手洗衫，原來唔係手腕痛，係膊頭腰骨痛
5. 終於明白以前阿媽點解可以企喺堆菜面前呆望，因為除咗生菜，仲有白菜，菠菜，油墨菜，硯菜......
6. 承上，終於知道為何阿媽入親街市買餸都買成粒鐘，因為當你日日都要買餸，好多時真係唔知買乜鬼嘢煮好
7. 女人要留得住男人個胃，唔代表一定留得住男人個心，但肯定會大大加分
8. 由北歐食到南美，最好味嘅芝士始終係意大利
9. 咖啡，阿根廷，NO !
10. 草莓女王唔係北海道先有，阿根廷11月當造手心咁大嘅巨莓，香甜正！折合港幣$10一磅，平到笑😍
11. 左西瓜右麵包再加埋個書包，孭到鐘樓駝俠咁款，都係為咗身邊嗰個每日返到屋企就有啖好食
12. 我嘅寶貝高踭鞋，依家只能遠觀不可褻玩焉
13. 師奶都係一個職業，全心全意全天候的，比有人工逗的做得還要更上心
14. 不論膚色，不論任何地方，唔好理別人點樣睇你；到處都總有將你枱高或貶低嘅人，避不了也改變不了，所以最緊要自己活得快樂
15. 可以行善係一種福氣，儘管幫婆婆喺最高貨架攞意粉，對方回饋嘅笑容，用錢都買唔到
16. 到底買二送一抵啲？定買第1件原價第2件兩折平啲？還是買4件不過俾3件嘅錢，然後每逢星期三額外再打9折化算啲？好亂😑
17. 遇啱有足球聯賽，就要小心點算超市收銀有冇找漏錢，因為超市裡面會裝電視，員工邊睇邊大哎打氣邊收錢
18. 活喺只有2%華人嘅社區，一開話題就問我係咪識講日文同整壽司，莫非香港人真係冇樣睇？我母語仍然係、永遠係粤語。
#阿根廷新手師奶
#師奶日常
#成功男人背後要有個懂得照顧他的女人
#成功師奶背後需要一個懂得欣賞自己的男人
