【#晞觀影記事13週年 Trivia Q5 Q6答案】
第五題係有少少自己都老尷：第一次因為冇字幕完全睇唔明，最後冇寫到嘅文係邊套？
幾乎全部人都係估《普羅米修斯》，果套都係，但第一套係《神探福爾摩斯：詭影遊戲》。我真心以為係套娛樂片唔駛點聽，但因為成班角色超重英國口音，加上故事局中有局再有局完仲有局，後尾飛機睇返一次有字幕，簡直好似睇緊新戲咁，果陣散場完全唔知自己睇咗咩。自問英文程度算好，喺外國睇咁多次戲，因為「口音」而聽唔到嘅唔多，呢套真係懷疑自己英文程度。
《普羅米修斯》你聽到曬佢講乜，只係拼埋一齊唔知佢講乜，事後睇返有字幕，原來都唔易明。果陣喺澳洲窮到甩褲，以為係套超級大片仲特登買貴飛去大院睇，點知睇完出嚟黑人問號咗。至於好多朋友估《蝙蝠俠：夜神起義》，老老實實Batman同Bane把聲，你不妨試吓熄咗字幕係幾難聽，但畫面搭救又未至於唔明。
13年嚟，每套入戲院睇嘅戲，無論好戲定爛片，咩情況我都堅持會寫，因為訓著咗或完全唔明而冇寫嘅，應該冇廿套。
第六題問大家，我邊年超過一個月冇update blog？以為愈問愈易，呢題點都會識掛，點知一樣冇乜人答到，正確答案係2018年。
一直都話想執Blog執page，都想俾自己體驗一下，冇咗個Blog同page生活係點。承上題，我就算外國睇戲，喺飛機火車巴士都會照打文，有時真係唔知為咩。2018年，去南美我決定幫自己放個假，無論南美一日睇幾場戲、深知早過香港一截睇，一寫文一定可以爆click，我都唔打，其實，推到上Google第一位都唔係啲咩。唔係聽唔明唔係訓著咗，不如俾自己放個假，完全唔update啦。
間中有一兩個無聊post嘅，但Blog成篇full article就冇了。果時好多人問我係咪真係執Blog，我係感動嘅，果班讀者朋友唔知有冇玩。事後返到香港即刻搞書展，又攤咗兩星期冇update，前前後後接近三個月，但最長係2009年去咗實習，我三個幾月冇更新。
純粹好奇，點解咁多人揀2014年2016年？其實我亂咁作，大家點解會覺得我呢兩年消失咗😂
Trivia繼續進行中，我希望可以保持到每日有一題問題，想玩就去IG story啦：https://www.instagram.com/travelerwithmovie/
