【龔成問答信箱】（Q18221-Q18240）
Q18221：
hi, 而家美國經濟數據各方面都係金融危機時期的水平，但科技股估值相反地在科網泡沫水平，顯得相當極端。經濟在現時環境基本都要需要一段長時間先復甦，而家利率極低，不停輸入流動性。
通常崩盤都因流動性問題而發生，咁其實而家係咪就算估值過高、經濟不景，但若聯儲局不停輸入流動性的話泡沫就唔會爆?
資金泛濫流動性充足，冇人需要賣出股票崩盤就唔會發生? 究竟係其他人陶醉緊定係現時環境其實沒有危機?
謝謝
龔成老師：
現時的經濟的確有不確定性，但有些因素，令股市出現這個情況。
第一，是資金，美國印銀紙令資金多，股市升都是正常，但這有機會令市場更加波動。
第二，美國都有不同的推經濟措施，部分會對企業有利，這就會實質支持到企業，不過，這可能只是中短期，如果疫情持續，企業盈利終會下跌。
第三，今次主要由科技股帶動，而部分企業，業務的確有實質上升，因此企業價值上升都是正確，所以不能話完全是泡沫。
要分析崩盤是十分困難的，同時絕對不能直線思維去分析。我地其實還原基本步，投資優質企業，長線持有，咁就得。只要你唔好用盡現金，即刻都有現金準備買平貨，其實已是風險管理。
------------------------------------------------
Q18222：
想請問新創建將新巴城巴業務賣出對集團發展係好事定壞事？
照計呢個時間賣應該唔會有好價錢
龔成老師：
其實新巴城巴業務一向都唔太賺錢，原理同九巴一樣，現金流算是穩定，但成本因素令盈利波動，因此並不是一盤很好的生意。
所以，賣出都是好事，但在這個時間賣出，其實不是最理想。
------------------------------------------------
Q18223：
龔sir又要請教你了！這次我想集中問關於潛力股的問題。
之前曾跟龔sir傾過我的新投資組合:
1.盈富基金
2.金沙中國
3.太古地產
4.中生製藥
5.中國鐵塔
6.福壽園
7.小米
老師您給的建議是需集中供盈富，以它作為核心，而潛力股則小注。而後來我又反覆思索，如何更有效地運用資金投資。
老師經常說需要有一個平衡的投資組合去分散非系統性風險，例如加入2800令投資組合更平衡。
但我想如果未來可能40，50年後2800的質素改變了，當中的改變的不是表面因素，而是核心因素，我們仍需要作出止蝕這個動作。老師說我們不能預測到後市，未來的市況如何。
而我想，買股票，買企業當中必然有風險，雖然買股票的大前提必然是最優質的企業，但我心想最出色的企業內裏定會存在一些我們行外人不為人知的風險。
因此，我現在在想，與其買優質的平穩增值股（2800），我倒不如集中買值博率較高的優質潛力股（1177）（1448）（788）這三隻。
我現時22歲，我認為我現時不怕高風險投資。我曾跟老師您講過我現時月儲7000，希望6年後能上到細價樓。我期望集中供這3隻股票(1177,1448,788)能在6年後儲到250萬。
現時我已差不多閱畢老師所有的著作，當然當中會有部分內容忘記了會去重溫。看完老師的著作後的確能大大提升投資者的實力。老師曾說過，在很多時候，投資風險高與低取決投資者的實力。
只要提升自身投資實力定會減低當中的風險，大前提一定是投資優質股。另外，老師都說過要投資你自己在認知範疇裏的行業，對行業要有充分的認識才可投資。說到這裏，我又想問問老師。（1177，1448，788）都是很優質的潛力股。
我認為現時我對於買入和賣出的時機已有一定認知，和這3隻股票的平貴範圍都清楚知道了。我想只買這三隻股票，我專門研究他們的年報可能研究10年，每年都研究，集中研究這三隻，任何關於這三隻股票都接收
確保對這三隻股票的認知是最高的。如果我能做到（只局限這三隻）把握時機買賣，分析企業的平貴能力，研究年報，是否令到風險得以減低？
因此，就上述而言，我年輕，不怕高風險，能把握時機買賣，分析企業的平貴能力，不斷研究這三隻優質的潛力股（1177，1448，788）的年報，我能夠只集中投資這三隻股票？
或者撇除買樓外，我是想憑這3隻股票可以滾存到大概200萬，然後擺落收息股，假設回報率5厘，每月取得8333蚊，之後再將這筆錢集中投資潛力股，這做法可以嗎？謝謝！
龔成老師：
首先，當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。
所以，你並不是組合中一成不變的，你年輕，這刻可以多一點潛力股，但過了10年、20年，你就要調整，潛力股的比例慢慢會減。
另外一方向，我地會分析企業的本質及增長力。
例如比亞迪（1211），我自己持有是因為佢有潛力，佢的電動車已發展，但如果過10年，大家都用電動車，產品已經普及，佢潛力的因素已完全出現，股價理論上升倍計，佢已不是「潛力股」，這樣，我到時就可能會賣出。
另外方面，我地要分析企業的質素，就算盈富（2800），也有機會賣出，但並不是因為股價，而是佢質素變左。一般的企業，每半年都會分析多一次，檢視佢的情況，佢的中期及全年業績，你要持續地睇。
你上述講集中3隻股票，你最好建立一個平衡組合，單一股票去到15%就好了不要過多。如果你見到貴，適當賣出是可以的。
另外唔建議你太快投資收息股，你賣出潛力股後，應該將資金找另一潛力股，到你年齡較大先考慮收息。
------------------------------------------------
Q18224：
老師，我一直都有買9988，每個月出糧就買一手，因為覺得佢公司發展唔錯，有潛力，又有盈利，業務亦多元化，但最近表現真係有d失望
無論有d咩利好因素/消息都升唔上，反而一有壞消息就跌得好勁，我諗緊好唔好先係依家有小小盈利情況下離場，轉研究另一隻股票，請問你意見如何？
本身都諗住睇長遠小小，被d耐性，但怕之後keep住都係咁
龔成老師：
阿里巴巴（9988）有質素，有增長力。
其實你的策略不差，無問題，你唔好理中短期股價，你要有買入企業持有3年，當中啊理股價的心態。記住「中短期股價絕不能反映企業真實價值，唔好被影響」
你最好買入後「唔好睇股價」。
另外，你每月入一手的方法，與月供類似，這類動作最好是長線，同時，你應該希望股價「先下跌，慢慢再上翻」，這你就能夠買到最多平貨，得到最大利潤。
反而當股價不斷向上，你愈買愈貴，更不利。
------------------------------------------------
Q18225：
老師想請教一下，我是股票班學生，在分析年報時 公司不會彼露客户佔比 那麼如何得知客戶對其公司的營收佔比 是不是只能從其他資訊上收集？
例如 華為佔對瑞聲科技在金屬外套上大部份收入 這個信息是從其他資訊來源獲得 。
假如我找不到或看不到這則資訊 而碰巧這對該公司佔了一個大佔比 在分析時會不會有個大影響？應該如何處理較合適？
另外 有關於瑞聲估值一問 因為對數學缺乏信心 想問問老師看法 我嘗試用上堂學習的計算了平均值其合理範圍大概是16.9－18.4，因此其合理股價為55－74 附近 請問這是正確嗎？
經常打擾老師 不好意思 再次謝謝老師指導。
龔成老師：
年報其實有講「5大客戶」的佔比，需要未必好詳細，但當投資者聯同外部的資訊一同分析時，就會有更立體的情況。
年報其實有好多有用資料，但你要睇得好仔細先得，例如附註往往有100頁，你要盡力找一些有用的資料部分。
至於估值方面，如果未有信心，就多做練習先，要分析超過10間企業先正式入市。你應該應上述估值，調低少少，就能有效反映佢的風險度。
------------------------------------------------
Q18226：
老師，我近排因為短炒輸咗10幾萬
我唔知點算好。睇詳書增加知識？
龔成老師：
你可首先睇：
《80後百萬富翁》
《股票勝經》
《財務自由行》
之後再睇其他。
你睇完《股票勝經》，就會明之前點解輸錢，因為短炒從來都唔會賺錢，只是無知散戶先會做的事。
------------------------------------------------
Q18227：
Thank you老師， 今晚上完堂，雖然我maths不嬲好差，不過你教既野又無想像中咁難，温多d就ok , 會比心機做好六福個評估下星期教功課。
另外之前問你意見個到，最後無係課堂到請教你，其實自己沉殿完都有答案，都知道而家真係要做好基本功，努力温習你d notes/睇多d 書, 增加長知識，繼續開源節流，同埋等個疫情好返再轉工增加收入，要耐心咁改變個困局。
不過都想請教你，開源個方面，有無d idea可以比我(or你覺得其他讀者分享過都可行既), 我之前有返party room part time但疫情關係無左
有做過foodpanda步兵，晚晚銀行放工就去，星期6/日每日12個鐘，每月都係最多3千幾蚊額外收入，不過最後行到膝頭哥痛就無做啦
我好清楚知道呢d人工唔高，又唔專業既part time只係短暫性，但一直發掘都唔知開源個到向邊方面發展，所以好想睇下你有無suggestion > <
龔成老師：
你要保持溫書，睇企業年報，運用「企業評估表」。
課堂是比你用一世的，因此你可以不斷用「企業評估表」分析企業，除了可以找到市場未發現的潛力股外，同時會令你不斷進步。
至於增加收入，興趣、你的強項，是當中的核心，你要向這方向發展，只要找到一個專業，你不斷投入時間，1年後你都能成為專家，你的身價就大不同。
做兼職是增加收入方法，但要做一些高時薪的，例如補習等超過$100的。
另外，兼職只是一些短期的解決方法，長遠要建立生意，或提高你的身價。香港有好多好好賺的生意，只是行內人唔會出聲，你要多尋找，唔好只睇大路的（大路即是開食店、賣衫等）。
你要從「解決市場需求、幫到人」的角度出發，同時要專不要做雜。
------------------------------------------------
Q18228：
有朋友話美國大選後，大市會大跌，應該遲D先入市
你點睇呢個選舉年而產生嘅經濟周期？
龔成老師：
唔好信選舉的預測。
我用4年前做例，4年前，個個以為特朗普會輸，但最後佢贏（這反映無得估）。
另外，當時民調，每次如果特朗普贏的機會率增加左，美股就下跌，選前，每一次都是這樣，市場認為佢會推跌個市。
到佢選到後，美股反而大升多個月。
所以，我唔相信有所以的模式走勢，唔相信有能預測到。
------------------------------------------------
Q18229：
龔成老師你好，想問你對新股農夫山泉的睇法，如抽到後可以留嗎?
另外，152 現時$13.2是合理價嗎?
龔成老師︰
農夫山泉（9633）是中國包裝飲用水及飲料的龍頭企業，旗下品牌包括農夫山泉、東方樹葉、尖叫等。
其產品覆蓋包裝飲用水、茶飲料、功能飲料及果汁飲料等類別。根據弗若斯特沙利文報告，2012年至2019年間，連續八年保持中國包裝飲用水市場佔有率第一的領導地位。
業務上，的確有吸引力的，不過，我一向都新股半新股都無興趣，因為真實面要慢慢先見到。此股可投資，但只建議小注，同時你要明白當中的風險。
深圳國際（0152）本質不差的，但中短期受中國情況影響，相信都會弱，現價合理，分注投資可以。
------------------------------------------------
Q18230：
老師麻煩你，想問下512遠大$8.5買入（不多）現在7.32，應否沽出？（可以中線持有）有否投資價值？感謝老師
龔成老師︰
首先，一定要了解股價下跌的原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。
遠大醫藥（0512），係中國從事製造及銷售醫藥製劑及醫療器械、生物技術產品及營養產品、精品原料藥和其他產品。
佢旗下公司係中國最大之安乃近製藥商之一，其另一產品替羅非班作為治療心血管疾病之主要抗血小板藥品主導中國醫療市場。
整體質素是有的，但未去到好高。你持貨不多的話，可以守。
------------------------------------------------
Q18231：
龔sir您好！本人今年37歲，在疫情期間開始關注您的FB專頁，至今已經買了九本您的書籍，獲益良多。
本人在31歲的時候買了一份供五年的儲蓄保險，每年供USD6,250，合共USD31,250，已供完，定在65歲開始每月提取一筆款項。
請問我應否現在取回並投資在平穩增長股及潛力股？謝謝。
龔成老師：
好！多謝支持！記得要將知識「運用」，要跟書的指引去做。
我地進行理財，要建立一個攻守兼備的組合，如果你財富組合，沒有其他防守類配置，可以將這筆儲蓄保險，視為這部分，等佢自己滾存。
如果你本身已有防守類資產，而你想財富增長力強翻D，就可以將資金，轉到平穩增長股及潛力股，投資ETF如盈富（2800）+恆生科指基金（3033）都得。
------------------------------------------------
Q18232：
Hello 龔Sir,
我想問下你意見
我因為頭半年信錯人，導致損失30幾萬。依家后半年，要好努力還錢俾屋企人
甘我想係呢段時間增加自己嘅財務知識
咁我買左致富藍圖，因為我覺得書內容已經包括好多市面上嘅投資工具
而我對佢哋係零知識
咁我想問吓我睇完呢本書其實會適合邊一本書？
因為我想喺呢半年還錢嘅時間入面，好好吸收財務知識。等我真正還完錢，就可以踏出第一步
龔成老師：
過去的我地翻唔到轉頭，唔好再想，只要做好這一刻就得。
你努力在這段時間，保持知識的增長，之後就可以正式啟動財富的增值。
你可首先睇：
《80後百萬富翁》
《股票勝經》
《財務自由行》
之後再睇其他。
書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。
以下是我的12本書：
《80後百萬富翁》（第8版）
《80後2百萬富翁》（第4版）
《80後3百萬富翁》（第2版）
《財務自由行》（第6版）
《大富翁致富藍圖》（第4版）
《50優質潛力股》（第3版）
《50穩健收息股》（第3版）
《50值博倍升股》（第1版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第1版）
------------------------------------------------
Q18233：
龔成老師，想請教一下，隻981，$31 入，現在應等回升，還是止蝕？因我見到佢陰d陰d跌。
另外，我想買2800，現價買會貴嗎？
謝謝你
龔成老師：
中芯（0981）業務有增長力的，但你要注意幾點。
第一，佢是熱炒股，這類股一定高風險，可以升得勁，跌得多。
第二，你在貴的價位入，就算現價仍貴。
你如果貨多，宜減，如不多，暫時可以守住先。
至於盈富（2800），現價合理，你分注投資就得。
------------------------------------------------
Q18234：
你好，成哥，請問6049有能力反彈嗎？
我$77入場
龔成老師：
保利物業（6049）並不是無質素的，不過之前的估值較高，就等是這刻仍未算平，你要注意股價仍會較波動。
這股有得守，只要你持貨不過多就得，雖然中短期股價上落大，但長遠並不是無質素，基本上都有增長力的。
------------------------------------------------
Q18235：
龔成老師你好，我今年30歲，月入$12000，
但因畢業到現時常常失業，故此儲蓄只有一萬幾千
另仲還緊之前讀書時欠落o既學生貸款，大約4萬幾左右，
因為見自己年紀逐漸增長，希望可以改善現時貧窮的狀況，想問有咩方法建議？謝謝
龔成老師：
你要從收入方面著手，首先，要找出你長遠的大方向，你現時30歲，是發展事業方向的最後機會，要找到屬於你的行業職業。
你要從過往工作的經驗，了解翻自己，那些職業自己最喜歡，最有發展，自己較強。
唔好只想一些短期的事，要從長期方面去計算，唔好見步行步！
------------------------------------------------
Q18236：
老師，想請教下現價太古地産(1972)處合理水平，這刻應該增持還是將資金投放至潛力股？
因(1972)已經佔我投資組合的16%，過往買入價為24元，所以才考慮低價增持。
另外，謝謝老師讓我認識了什麼是價值投資，眼見身邊朋友炒炒賣賣已損手爛腳，還del了投資應用程式
龔成老師：
太古地産（1972）有質素的，但你預佢中短期較一般，不過長遠仍是正面，但就要耐心D。不過，你去到16%已差不多，唔建議再加，否則會太集中在單一股票。
我相信唔少人都經歷過短炒的誘惑，我20年前都試過，但當我明白這方法跟本賺唔到錢時，當時就決心唔再短炒，其中一個訓練，就是唔會經常睇股價。
你已行對了方向，保持進行就得。
------------------------------------------------
Q18237：
龔成老師，不時瀏覽你的文章，總係會打破到自身係思維，而係的分享亦到好實在好貼地同埋可令到我地呢啲普通人具執行性
最近我瀏覽到你的文章中見有唔少朋友個主動收入其實都好高(6萬以上)，彷彿財富層級越高的人可以財富幾何級增值的機會就會就會越大
反之我地啲打工仔，好似永遠都只可以做到加數，想做到乘數同子數似乎係無從入手。
我係澳門生活，我相信高收入的人士好多，但感覺上自己要躍升上去成為高收入的人好似有重重的障礙，好似冇一點門路冇一啲方向去努力咁。
早2年都有相同的感覺，但個時以為自己仲後生仲可以摸索下，但至今依然係咁依然係好迷茫，好想揾一啲方向去努力，好想提升自己同愛的人的生活質量。
雖然依加自己收入都有22K/月，每月都可以草到10K左右，但係咁樣好似冇乜生活，草埋啲錢都好似做唔到啲咩咁
所以我的目標會想每月收入會達到40K，所以都想向老師請教一下有冇一啲踏實D的努力方向可以去探索一下!
而我依加就從事緊社工，知道呢份工冇乜可能躍升到；我都試過收工時間去外賣車手，但發現會極度影響到我正職的狀態，但我要轉工嗎?
但轉工我又暫時諗唔到有咩技能可以產生到高收入，但唔轉又會永遠卡住係呢個死循環，所以好想向龔成老師財富層級較高的前輩學習多啲平時係學校唔會教到GE野
龔成老師：
你做兼職，一定要做一些高時薪的工作。同時這只是一些中短期的幫補下，不能成為你累積財富的核心。
另外，你要想想長遠的發展，如果你只是為打工，人工做這份工，你就要想想，長遠（10年）後，你想怎樣，你要在仍有機會改變時改變。
好好想清楚，你的興趣、強項、發展。
自己如果真的在社工興趣這行，你就保持這行的發展，但就能力利用空閒時間，去做好投資，以及開發小生意（希望能幫你發展副業，初頭不多，但可能日後有發展）。你可以找一些網上業務等。
另一方面，就是要增加投資知識，你現時每月儲到$1萬，長遠都能累積一定的財富，只要做好理財，其實已經比好多人唔錯。
------------------------------------------------
Q18238：
老師你好啊。想請教下
我依家25歲，月入18k
每月草現金$8500
月供
$2500-2800
$1500-66
1. 諗緊加多$1000月供放係潛力股好定草現金之後一手手買潛力股？同埋需唔需要再調整下月供個金額個到？
2.另外潛力股方面睇中左幾隻，分別係1211，9988同1810，如果呢3隻入面邊隻會較好？
3.我想買你個本股票聖經，但搵過幾間書局都唔見有，知唔知道邊到有得買？謝謝
龔成老師：
1）現時不少潛力股都唔平，你用月供的方法，能更有效分散風險，月供$1000，已經可以進行。長期進行就得，如果股價上落好大，就有機會改金額。
2）都可以選，都是優質、有潛力的。比亞迪（1211）、小米（1810）潛力度較高。
3）書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。
------------------------------------------------
Q18239：
你好，龔sir, 驚美元與港元脫勾，港元會大幅貶值
但美元儲備不是無限，只有幾千億，足夠？
龔成老師：
香港要發行港幣，就要有足夠的美元，聯匯是1美元兌7.8港幣。
即是如果香港要發行780港幣，就一定要有100美元在手。
現時香港手持的儲備，是貨幣基礎的兩倍，因此定全無野擔心。
------------------------------------------------
Q18240：
老師想請教下個問題。而呢幾年，有好一堆既股票，特別係醫療設備/生物醫藥股，例如百濟神州，沛嘉醫療，愛康醫療，藥明生物，啟明醫療，美東氣車。
都係一D冇盈利/B仔股，而且係處於快速增長，市場成交量非常之低，成個股市既結構都唔似得傳統既股票，例如1177/1211。
想問下老師投資呢D股有冇咩要注意?呢D股好多都係倍升而且仲唔需要半年時間就上到去。風險係咪會比較高?
龔成老師：
當有新興的行業經濟模式出現，就會造就一些股價大升的股票，其實市場一向都是這樣的，但佢地成功的背後，同時面對一定的風險，以及有好多公司失敗左。因此，我地只要用平衡的策略就得，如果你有信心，就小注投資，如果你以為佢地模式一定成功就大注，你就危險了。
----------------------------------------------
若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。
