#Nj：《#詭老》我就力撐，真心。你話有冇可能去返鬼眼水平，難啲，但係我仍然覺得係一套好有力量嘅驚慄片。M. Night Shyamalan作品時得時唔得係人都知，我又唔覺得需要跟人風所謂"恥笑"、睇死佢拍親都係爛片。《詭》片係有唔合邏輯、對白怪怪地嘅問題，可以接受。等於鬼眼布斯韋利士可以完全唔知個twist，思裂睇緊精神分裂痴線綁架狂去到最後突然變怪物爬咗上牆，有啲理解唔到但又覺得幾過癮無咩所謂。
.
呢個導演嘅作品，最好唔好執到太細緻分析個故事咁去睇，感受個過程重要啲。今次啲鏡頭用得極度奇怪，好似成日擺錯位咁。影啲唔影啲，講緊嘢嘅角色經常喺鏡頭之外。沙灘明明風光明媚令人放鬆，喺設計過嘅鏡頭之下就變得詭異不安。加上配樂成功製造不自在嘅感覺，一路有事發生，走唔到，係咁死人，絕望。《詭》片唔係鬼片，無打算突然嚇你一跳，但做到一種靜態入心唔尋常嘅驚慄效果。
.
戲裏面主要應該有11人，要講處理得唔係咁好就係成日有啲人消失咗，然後隔好耐先出現返，剪接分配戲份有啲問題。至於結局驚唔驚喜絕對係睇M. Night Shyamalan作品嘅重點，我唔會用意想不到去形容，但就認為足夠解釋到成件事，收貨。《詭》片唔會係經典，但依然充滿導演自己風格，依然故我唔易，我鍾意。
.
加入狂友fb群組【 #狂氏電影綜合症候群 】
*// http://bit.ly/32xJWLp //
直接交流 × 傾講電影有你起頭！
