【再一次心痛】
其實係怕事、穩暪同相互包庇嘅後果
（少有激動長文，怕煩或覺心痛真係唔好睇）
本來想先睇下今日嘅新聞，才可始動手寫今日嘅post。可惜無論世界上發生咗咩大小事都好，腦裡面都唔能夠離開呢一個跟進報導。報導裡面嘅內容，的確會令人極之不安及難受（至少我係）。件慘案嘅因由，歸根究底都係華人社會嘅怕事、包庇同穩暪嘅基因天性！
原來呢個小朋友被虐殺前幾個月，老師已經兩次拍低佢受虐嘅傷勢，亦連同相片遞交報告比「路德會富泰幼兒園」嘅校長余美英！學校無跟進不特止，報告一個月後小朋友就缺課，又繼續無理！我唔會講太多「如果」，因為慘劇已經發生咗，小朋友結果係被殺。
對於大是大非，世界上係無如果嘅，只有後果。呢個校長睇到報告同啲相，簽埋名都無報警（係報警呀，唔係轉交社工或者乜嘢政部門！）。呢一點我唔敢講去到見死不救，屬於誤殺，但一定係一嚴重個疏忽。咁尚且未必係刑事罪行，咁事發生後大大聲同傳媒講下面呢段嘢，有冇落咗口供？？？
//「她無異樣，她無任何的傷痕，如果我們覺得有異樣的小朋友，我們都會去留意她，檢查她，其實我們都有留意她(臨臨)，早前9月(校服)都是短衫短褲，好明顯會看到，但她都沒有被虐的情況。」//
路德會作為宗教界嘅辦學團體，記者都攞到啲相，而路德會搵唔到份報告同相。係未做完所謂嘅「內部調查」，還是「家醜不外傳」呀？
另外我又想知寫報告同影相嗰位或者多位老師，點解校長唔理自己又唔做啲嘢呢？依家人都死咗幾個月，先走出黎做「消息人事」咁正義？
原來學校裡面由辦學嘅到校長、老師所有人，都可以互相隱瞞包庇嘅。虐兒事件全世界都有，但係因為做教育搵食嘅（叫工作者係抬舉咗！）怕事、穩暪同相互包庇而令慘案更慘，我肯定係華人（一定包括香港）先會發生！
#怕事隱瞞包庇
#呢啲唔係基因
#唔知係叫啲乜
