《無異之局》荒村異聞（十）
為咗查出岳少嘅真正死因還個清白，我同無二去到西貢「白湖村」嘅外圍，途中遭遇到「城寨幫」一對孖生姐妹「燕」同「蝶」嘅伏擊而需要分頭行事。由無二對付佢哋，而我負責去搵岳少嘅遊魂。
然後喺半路，我再遇上一位叫做蘇子儀嘅少女，佢喺危急之際向我交代岳少嘅遺言，接住隻身面對「黑使者」最後不知所蹤……
等我同無二會合完將事情梳理好後，我哋決定前往下個目的地……如初屋企。
*
＝＝＝＝＝＝＝＝＝
另一篇長故《扮工鬥室》Patreon 連載中！歡迎訂閱支持！
https://www.patreon.com/echoofheart
《荒村異聞》連載中：
https://www.facebook.com/pg/Echo.of.Heart/photos/?tab=album&album_id=2067100083421797&__tn__=-UC-R
《惡夢島》全集：
https://www.facebook.com/pg/Echo.of.Heart/photos/?tab=album&album_id=1861298627335278
《極樂謊園》全集：
https://www.facebook.com/pg/Echo.of.Heart/photos/?tab=album&album_id=1736011713197304
【廣告】《無異之初》、《無異之地》各大書局有售！
＝＝＝＝＝＝＝＝＝
場景一轉，呢刻我已經身處喺如初嘅屋企樓下，企咗喺佢間房窗口可以望到嘅窄巷位。呢刻無二並唔喺我旁邊。除咗唔想騷擾我打電話，當然仲有另一個安排……
「喂？」如初好快就接聽電話，好奇咁問：「今晚咁早打嚟嘅？」
「因為發生咗啲事……」我一直抬頭望住，正好見到如初嘅身影出現喺窗邊，「初，我而家就喺妳樓下，妳望落嚟就見到。」
因為我都唔係第一次咁做，所以如初即刻識擰轉身望落嚟，然後露出一意外嘅表情。
「你話發生咗啲事……係同無二有關？」佢機智咁問。
「真係要講嘅話，係同我嘅關係大啲。」我無奈咁回應。
「咁你等陣，我而家換返套衫落嚟……」
「唔洗！」我第一時間制止佢，「妳留喺上面就得，我都係講幾句就要走。」
「聰，件事係咪好嚴重？」聽得出佢越嚟越不安。
「同我哋之前經歷過嘅比還好，但妳聽完一定要冷靜……我同無二而家俾一班人追殺緊。」
本來有諗過用啲冇咁嚴重嘅詞彙嚟形容而家嘅狀況，譬如「捉」、「追捕」之類，但最後都係決定如實咁講。
「追殺？點解突然間會咁嘅？」
「妳記唔記得上個禮拜我提過『城寨』件事？岳少佢……喺嗰次見面之後俾人殺死咗，而家『城寨』嘅人懷疑係我哋做……」
「但你哋係冤枉㗎嘛！有冇辦法同佢哋解釋到……」
「佢哋班人好重情義，應該唔係簡單解釋就可以過關，我哋只可以試下抽個真兇出嚟。」
「咁我……有冇嘢可以幫到手？」
「冇，其實比起我自己，我更加驚佢哋會搞到妳……不過無二而家喺妳屋苑範圍做緊防禦措施，佢叫我提妳呢兩三日盡量都唔好離開屋企……」
「嗯，好彩我爸媽又唔喺香港啫……」
「計落真係次次都咁啱，唔講真係以為夾好咗。」我笑道：「如初，我諗呢幾日未必可以再同妳聯絡，但我應承妳……」
「聰！」如初突然打斷我，語氣變得緊張起嚟，「我好似見到有班人落車行緊去你度，佢哋……手上面仲有刀！」
「唔洗擔心。」我抬頭向佢展露出一個微笑，老實講都開始佩服自己嘅勇氣，「我一定唔會有事。」
因為，呢個情況我同無二早就預計咗……只係冇諗到佢哋會出現得咁快。
「如初，我愛妳……萬事小心。」
我講到呢度隨即收線，下一秒面前就出現五位著住黑衫嘅男人。雖然仲隔咗段距離，但我已經認出其中三個今朝係有份突襲無二嘅辦公室……
而帶頭拎刀嘅人，正正就係嗰位叫做「域少」嘅人。
「好一對苦命鴛鴦呀，到咗咁嘅關頭仲可以打電話談情。」域少一邊揮動手上把刀一邊講：「朝早俾你哋走得甩……今次一定唔會。」
睇嚟佢哋真係有監聽到電話內容……果然一切都正如無二所料。
*
三十分鐘前。
「點解要去搵如初？」我當時聽完當然唔明，「你唔係話『城寨』人好講道德，唔會用親人嚟要脅我哋……」
「咁我驚你唔放心嘛，咪俾個機會你哋見下面，我都順便可以做啲措施保佢周全。」無二解釋：「當然仲有另一個目的。」
「目的？」我皺起眉。
「我哋要引嗰位阿域出現，活捉佢然後帶到一個可以放心對話嘅地方……而最好嘅辦法，當然係你直接現身做餌，而如初樓下就係最佳嘅地點，簡直可以話係一石幾鳥。」
「雖然你講到好肯定，但萬一嚟嘅係其他人……」
「聰，我哋不妨試下位思考。你仲記唔記得朝早先係陸孝忠嚟搵我哋？」
「嗯。」
「佢當時身上散發嘅氣息同殺意，同凌永岳係非常相似，再加埋對話嗰種相熟嘅程度，我有理由相信，佢就算唔係凌永岳嘅師父，都肯定係有份訓練佢。」無二解釋：「跟住輪到嗰位域少，你喺後樓梯都有眼見，佢係率先行頭第一個走入我公司。」
「你嘅意思即係……」
「唔係我自大，但既然係要對付我，當然要預咗有生命危險，仲未計咁大動作之後可能會引伸其他後果。既然明知係咁都夠膽行頭，咁就更加證明佢哋關係非淺……」
「就因為佢哋係死黨……」
「正因為係死黨，所以都可以推斷，只要我哋直接現身……第一個趕到嚟面對危險嘅人，肯定會係佢。」無二接住講落去：「正如如初有事，你都係會第一個出面。」
「又或者杏姐出事，你一樣會咁做。」我回應。
無二聽完並冇回應，只係微微一笑帶過去。
*
時間回到現在。
事情發展確實好似無二所諗咁，問題係接住落嚟……係咪又會咁順利？
「既然你有偷聽我同女朋友嘅電話，咁應該聽到我係冤枉。」我回應，隨即注意到窄巷另一邊又出現另一班人，將我僅餘嘅退路都封截埋。
「我又係唔識得讀心，點會知你係講真定講假？」阿域邊講邊觀察周圍，應該係想睇下有冇埋伏，「但講真喇，我都唔覺得你呢條友有能力殺死岳少……你可能係無辜、亦可能係無二嘅幫兇，唔理點都好，我而家畀個機會你，放棄掙扎跟我哋返去，只要查清楚就自然會放你走。」
「聽落好似幾吸引……但我嘅答案係拒絕。」
「咩話？」阿域聽完眼神變得銳利起嚟。
「正如你唔信我哋，我都唔信你哋當中嘅一啲人……所以我係唔跟你返去，但我向你保證，我同無二一定會搵出真兇……」
「夠喇！你係唔肯跟嘅話，咁就講幾多嘢都係廢話……」阿域側一側身同其他人打個眼息，然後大嗌：「兄弟，為咗岳少！我哋上！」
說罷，佢即刻身先士卒第一個衝過嚟，而佢嘅同伴跟住其後。面對咁嘅場面，我內心當然係好驚，但我知道如初係一直望住……作為佢嘅男友，呢個時候當然係唔可以退縮。
所以，我照住原先嘅安排，舉起雙手，擺出一個準備握實嘢嘅手勢……當然喺佢哋嘅眼中係另一回事。
「如果你係企定定嘅話，可能我都唔會落重手！」阿域邊跑邊嗌，下一秒已經就去到我面前，「但既然你打算出招，咁就唔好怪我喇！」
呢一刻，時間就好似慢落嚟一樣，本來阿域已經舉刀準備劈落嚟。而同一時間，佢身後馬路亦都出現一架的士……
就喺下一瞬間，我眼前嘅景象變了──我再唔喺身喺窄巷，而係轉移到的士前座嘅駕駛位，因為已經做足晒準備，所以我即刻握實軚盤，再一腳踩落剎車掣剎停的士。
接住，我即刻擰轉頭望返去窄巷嗰邊……無二而家企咗喺我本來身處嘅位置，一手擋住咗阿域嘅揮刀。
呢個就係「轉移術」──無二事前喺我身上安置好術式，等到緊急關頭同我轉移位置。結果就好似而家咁，我移到的士裡面，由佢嚟面對阿域佢哋……
「你把刀……簡直鈍到我懷疑你係咪有心想殺人。」無二微笑道。
佢一講完，身上即刻爆出一道衝擊波。威力大到即使身處喺的士裡面都感受到股衝力，到我重新望清楚，本來將佢重重包圍嘅人，包括阿域在內都全部瞓低晒……
確認清楚阿域失去意識之後，無二即刻抱起佢過嚟的士呢邊。我回想返佢事前嘅提醒打開車尾箱，等佢可以順利將阿域放入去，最後讓返個司機位畀佢。
「搞掂。」無二上車後講，「真係輕鬆到連我自己都覺得意外。」
「而家咁樣情況完全就係犯罪咁……」我心有不安咁講：「希望途中唔會遇到警察截查……」
「等我仲以為你慣咗添。」無二笑住講：「放心喇，到時我踩盡油佢哋想追都唔會追到……」
「聽落係更加令人不安……咁我哋而家去邊？係咪返去安全屋？」我問。
「搬住個人上去太明顯啦。」無二回應：「而且，嗰度係阿杏準備嘅，我都唔係咁想曝露個位置俾其他人知。」
「咁樣……」
「去搵老查啦，佢應該有唔少地方可以俾我哋同後尾廂條友傾下偈。」
語畢，佢即刻踩盡油，向住下一個目的地進發。
（待續）
有時間可以睇埋下面…
首先要講聲抱歉，之前因為好多事一齊處理緊，所以新一集遲遲都未出。我諗對於一直追到而家嘅朋友，可能有唔少都會對我有啲失望吧。
不過老實講，我寧願遲下停下，都唔想格硬去寫一啲無意思嘅故事出嚟。
長篇故向來唔係一件輕鬆嘅工作，每集都要有一定嘅量、字多會養大讀者嘅胃口、一少返字大家就開始唔慣、然後每集都要有驚喜、每集都驚大家會悶，左改右改，其實好多細節安排，大家可能幾分鐘睇完唔會留意到。都係呢句，你哋五分鐘睇完嘅文，實情可能係我寫咗大半日先得出嚟……
我當然可以換個方式，每日隨便寫幾百一千字，然後篇篇差唔多篇篇都冇靈魂、但我知道呢個唔係我嘅寫法。我鍾意寫長故，亦希望可以一直寫落去……因為仲有好多有趣嘅想法喺腦海裡面，希望同大家分享。
到呢刻依然不離不棄嘅朋友，感謝你哋，《無異之局》今晚開始連載返，雖然都係唔敢保證速度，但我會嘗試努力。
最後，都係推廣下自己嘅 Patreon，《扮工鬥室》故事馬上就會進入白熱化階段，希望各位多多支持。
https://www.patreon.com/echoofheart
第一集（試閱）：
https://www.facebook.com/Echo.of.Heart/posts/2085452518253220?__tn__=K-R
第二集（試閱）：
https://www.facebook.com/Echo.of.Heart/posts/2091293244335814?__tn__=K-R
－－－－－－－－－－－－－－－－
IG：echoofheart
張仲景死因 在 當張仲景遇上史丹佛- Bye Bye, Hotel California! 的美食出口停車場
Frey）過世，死因被認為是長期服用類風溼性關節炎的西藥，深受很多人喜愛歌曲Hotel California（https: //www.youtube. ... 心難過！R.I.P. Glenn Frey! ... <看更多>