評《1917:逆戰救兵》- 吊靴鬼鏡頭逼力震撼 故事人物難免被削弱
《1917:逆戰救兵》標榜係戰爭嘅臨場感，同埋對隨時攞命突發狀況嘅無力感。吊靴鬼式嘅鏡頭全程緊隨主角置身敵方陣地，一步一驚心咁將觀眾放入看似平靜，但係其實陰險處處嘅絕望險境。
要了解1917出色之處，你可以當部戲係一章影像交響樂，樂曲分開唔同章節，每個章節時而由爆破大場面加士兵衝鋒陷陣組成，時而透過夜空訊號彈嘅畫出嚟嘅光影同無情嘅追殺奏出，總之一幕一幕，導演都用咗唔同嘅影像元素(樂器)編寫合奏出渾然天成嘅樂譜。
電影最大功臣當然係攝影總監Roger Deakins，鏡頭設計大膽得嚟精心細密，構圖同走位亦都充滿野心。除此之外，導演Sam Mendes嘅遠見同視野加上一眾劇組演員諗起都起雞皮，重覆又重覆嘅彩排時間同心血，都係令呢部戲喺金球獎成為大贏家嘅關鍵。
1917嘅戲軌簡單，單線性兼實時嘅推進逼力十足。主角全程俾分秒必爭嘅任務緊逼；只有前進，沒有退路嘅設定，令到苟延殘喘，死下死下嘅主角無力感倍增，觀眾睇得格外肉緊。
不過電影一鏡過嘅賣點，鬼哥覺得其實過份執著，部戲一開波主角就臨危受命要嚟料執行任務，令到角色背景同性格較為淡薄。前面提到嘅時間逼力就顯得機械欠缺血肉，令觀眾共鳴感略打折扣。
實時一鏡過嘅處理亦都難以避免人物行行企企休息傾偈嘅情節，時有出現畫面中「冇乜嘢發生緊」嘅情況。導演已經聰明地嘗試加入其他細節「填窿」，例如負傷絕望嘅軍人、武器大炮殘骸、戰死沙場嘅士兵屍體等，但係都襟唔住故事平平無奇，欠缺追看性嘅特色。
整體嚟講，《1917:逆戰救兵》以鏡頭同畫面制霸，入場未必係睇佢嘅人物同故事，但係就一定要買飛入去感受一下嗰種身處戰場嘅臨場震撼體驗。記住一定要睇IMAX版!
口味傾向著重電影故事同角色嘅鬼哥，俾75分。
呢個亦都係當年《引力邊緣》，鬼哥覺得麻麻地嘅主要原因。
#1917逆戰救兵 #逆戰救兵 #一鏡到尾 #SamMendes
引力邊緣 在 輔仁媒體- 當筆者觀看完《引力邊緣》(Gravity)... | Facebook 的美食出口停車場
先評價一下這齣電影的片名。原先英文片名為《Gravity》，中文的意思是「引力」，在物理學上，是指有質量物件之間互相吸引的現象，亦即是萬有引力。英名片名中「引力」一詞 ... ... <看更多>