我嘅職業係：時間管理員（上）
「你涉嫌違反『時間管理法』，已被拘捕。」
我將手銬戴喺疑犯手上，同時自己都有少少眩暈嘅感覺，我知道，「時間囊」嘅藥效已經過去。
幾年前，市面上出現咗一種叫「時間囊」嘅藥，食咗之後，人嘅感官動作都會加快十倍，即係時間變相放慢十倍，好似閃電俠咁，做咩都快十倍。
初時，藥效只有幾秒，大家只係買嚟玩，整蠱吓朋友咁。
後來藥廠研發出更先進嘅「時間囊」，藥效由幾秒，上升到一分鐘、十分鐘……
開始有人用「時間囊」嚟犯罪，盜竊同非禮係最常見嘅，打劫、殺人都有發生。
於是，政府全面禁止「時間囊」嘅銷售，「時間囊」正式變成非法藥物。
但就好似毒品一樣，只要利潤夠大，自然會有人冒住犯法嘅危險，偷偷賣「時間囊」。
於是，用「時間囊」犯罪嘅人，依然存在。
由於罪犯嘅時間比正常人慢十倍，所以無論係搜證、拘捕，都變得好困難。
「時間管理員」呢個職業應運而生，專門負責同「時間囊」相關嘅罪案。
作為時間管理員，我哋被允許使用「時間囊」，而且我哋嘅「時間囊」比市面上嘅更加先進，可以將感官同動作加快十三倍。
我哋比罪犯更快，先有機會捉到罪犯。
我好鍾意呢份工，除咗可以維持正義之外，仲可以名正言順咁用「時間囊」，享受嗰種所有人都比我慢、眾人皆醉我獨醒嘅感覺。
但最近，我覺得有啲唔妥。
使用「時間囊」嘅罪犯，好似突然間以倍數上升。
有次我食咗藥，追緊一個疑犯：「你走唔甩㗎啦，我嘅『時間囊』比你更快。」
呢個時候，我眼角嘅餘光見到，另一個人喺街邊跑過。
我覺得佢跑得唔慢，而我嘅時間係加快咗十三倍，換句話講，佢都用咗「時間囊」，先會跑得咁快。
呢個人好明顯有濫用「時間囊」嘅嫌疑，但我本身追緊一個疑犯，我應唔應該改為截住佢？定應該通知其他時間管理員嚟處理？
未等我諗清楚，我又好似見到第三個人，涉嫌濫用「時間囊」……
最後，我只係捉到一個疑犯。
返到總部後，我匯報咗呢件事，但居然發現，其他同事有類似嘅遭遇。
大家都接到好多報案、遇到好多疑犯，根本捉都捉唔晒。
原來，「時間囊」不嬲都係由一間大藥廠生產，立例禁止後，藥廠就剩係生產藥物畀時間管理員，同埋作研究用途。
黑市上都有人高價賣「時間囊」，可能係之前嘅存貨，又或者係藥廠內部流出，總之數量唔多。
但最近，懷疑有其他藥廠得到「時間囊」嘅配方，大量生產，銷售牟利。
一時間，市面上流出大量「時間囊」，唔止有人用嚟犯罪，仲有人食嚟玩吓咁。
主管嘅意思係，政府會努力處理「時間囊」流出嘅問題，我哋部門都會增聘人手。
但所有嘢都需要時間，喺呢段期間，我哋只可以更努力工作，盡可能將疑犯緝拿歸案。
於是，我哋幾乎日日都開OT，由朝做到黑。
我成日喺度諗，到底件事幾時會搞得掂？既然配方已經洩露，政府點先可以令「時間囊」唔再流出？
下集：https://bit.ly/3a2F0DI
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #我嘅職業係時間管理員 #我嘅職業係
廣東道打劫 在 兩名南亞匪持刀闖尖沙咀廣東道珠寶店劫走價值2200萬港元 ... 的美食出口停車場
兩名南亞匪持刀闖尖沙咀 廣東道 珠寶店劫走價值2200萬港元翡翠頸鏈. 橙新聞. 橙新聞. 25K subscribers. Subscribe. 6. I like this. I dislike this. ... <看更多>