[方以文問兩句][ViuTV][詭探][駱振偉]
《詭探》今個星期就大結局，大家都想知神婆入去邪教做卧底成唔成功，梳打又會唔會入埋去幫拖呢？今次多謝 駱振偉 Thor Lok 趕住飛去第二度拍嘢都答完我問題先上機出發。
---------------------
問：梳打最後階段成唔成功學法？結局嗰個星期有冇發揮呀？
答：梳打其實都係偷師比較多，所以其實佢學到與學唔到都唔算太大分別。跟住個大佬咁耐，點都學到啲嘢，你話同阿全哥個level 當然無得比較啦。其實去到結局會多少少戲，發唔發揮到就留俾你哋去睇啦！你睇Trailer我都有啲崩潰嘅場口，拍到隻手瘀咗一大個印都唔知，都幾好玩！
---------------------
問：梳打同你有咩最相似？有咩最唔似？
答：梳打同我似嘅地方都好多，所以要多謝製作團隊寫咗個咁啱我演繹嘅人物畀我。最似我諗係我同梳打都係嘴串串得把口嘅人，做嘢俾人感覺永遠都唔認真，似一個大唔透嘅小朋友。
最唔似就係，我同神婆嘅愛情故事上，我本身個人就無咁輕挑嘅，私底下都係比較靜嘅人，所以追女仔嘅時候其實會細心啲同溫柔啲。去到故事最後都多啲我脾氣暴躁嘅情節，依方面同我真人都好唔一樣，因為我都幾冷靜嘅人嚟嘅（私底下）。
按：有冇睇過Thor同女朋友接受訪問呀？女朋友話佢溫柔又體貼。至於佢話佢私底下比較靜，呀，同外表好大反差喎。訪問呢度 >>> http://hk.apple.nextmedia.com/…/supplement/20170702/56897523
---------------------
問：呢套劇你話參考咗張繼聰嘅《幕後玩家》嘅演法，但我覺得都似張家輝嘅「化骨龍」喎。你覺唔覺？
答：其實監製搵我傾話拍《詭探》嘅時候，就係因為睇過我扮張家輝😂。所以其實佢畀我嘅要求就係，梳打就係化骨龍。不過我自己都好怕人哋模仿得太勁，所以拍嘅時候都好驚做多咗。問咗好多朋友嘅意見，都話張繼聰做《幕後玩家》有張家輝嘅影子但唔討厭，所以我就參考咗佢嘅演繹方法。希望我依個有化骨龍影子嘅梳打對你哋嚟講都唔會太討厭啦。
按：我就覺得好正喇，誇張位拿捏得好。
---------------------
問：其他主持成日話你嘴賤，你認唔認同？
答：我嘴賤呀，其實我都認嘅。因為我係一個好鐘意講笑嘅人，所以好多時候都會諗好多唔同嘅笑話，唔同嘅類型。再加上我都真係睇好多外國嘅棟篤笑表現，其中一種佢哋成日玩嘅都係人身攻擊，不過佢哋就真係睇得好開，開玩笑咋嘛，洗咩咁認真。我諗我都好想做一樣嘢，就係令到生活咁大壓力嘅香港人對自己對其他人都放鬆啲，正所謂「頂你個肺」真係會起腳咩？😂
---------------------
問：身為英皇新秀金咪得獎者嘅你，仲想唔想唱歌呀？之前你同ToNick主持嘅《粵詞越愛》我都有睇呀，係正。
答：其實唱歌真係我好鐘意嘅一件事，但係都要睇機會。好多謝有支持《粵詞越愛》嘅朋友，同都好開心可以同ToNick合作！佢哋真係好好嘅樂隊，都好鼓勵我！但係見到佢哋咁畀心機，同時都令我明白到自己喺音樂上唔夠努力，一日得廿四個鐘，依家我都想花曬喺做一個好演員！如果有一日再有機會再做一個歌手，我會花多好多時間喺上面！
按：各位監製大人可以搵Thor唱吓劇集主題曲插曲呀，想聽。
---------------------
問：嚟緊仲有冇劇上呀？有咩新搞作？
答： 6月尾就會同Helen譚凱倫出發去法國同德國拍一個旅遊節目！其實仲有一位主角同我哋一齊拍攝，不過就真係唔可以透露係邊個住！賣個關子先！因為佢人見人愛，太受歡迎，我怕大家會羨慕我哋兩個 😂 我都非常期待依一個旅程，記得留意之後嘅節目宣傳！
完咗個旅遊節目之後嘅工作都係拍劇拍劇同拍劇！公司之前都安排咗好多劇嘅casting畀我，好好彩都中咗幾套。所以嚟緊都會花曬所有時間去拍劇！劇名就遲啲再公布，不過今次演繹嘅角色就一定唔係小混混化骨龍啦！演戲界我仲係個初哥，而演戲最好嘅訓練就係演多啲戲。所以希望大家都會畀呢個「舊」新人多啲機會學習同挑戰啦！
----------------------
按：出道十年，由港台到英皇，由now到ViuTV，真係睇住佢畀心機努力成長。大叫一句「阿Thor阿Thor我哋支持你﹗」
#方以文問兩句 #ViuTV #詭探 #粵詞越愛 #駱振偉 #英皇新秀 #金咪大獎 #ToNick #張繼聰 #幕後玩家
幕後玩家 樂隊 在 「幕後玩家」是九十年代的一隊音樂組合，解散十多年後 的美食出口停車場
「幕後玩家」是九十年代的一隊音樂組合，解散十多年後，有感香港樂壇沉悶、社會問題嚴重，各成員最近不約而同都有發聲的衝動，遂重組起來再搞音樂。 如今幕後玩家是個獨立 ... ... <看更多>