尋日終於都播咗我自己最鍾意嗰場，唔知道大家有冇睇呢？
我成日同啲人講，唔使講客氣說話
照直話比我知做得好同唔好就得㗎啦
觀眾嘅反應係我最關心同擔心嘅
希望下一次做得更加好💪🏻
希望呢個訪問令到大家知道多啲呢個角色啦
I love this role 李凱欣
#已讀不回 #viutv #李凱欣 #可以上網重溫番 #已經有得睇啦 #全公司嘅演員都好努力
#希望大家睇到啦
https://www.facebook.com/1059324757464902/posts/2042726622458039/
[方以文問兩句][陳俞希 Hailey Chan][已讀不回]
睇《已讀不回》睇到氣餒，但都有啲位支持住我去睇，其中一個就係Hailey喇。佢係第8集天台嗰段戲，仲有琴晚第9集坐監嗰段都做得唔錯，第一次演嚟講我覺得交咗功課。今次搵到Hailey問佢兩句。
前晚Hailey喺IG出咗個post有關《已讀不回》，內容如下：
「追思會完結之後
靜下來想一想，記得當時
失去咗依靠，家人病又復發
當時喺度拍呢套劇嘅當中
幾樣野同時間發生，壓力大得誇張
加上自己其實都未叫真正拍過劇
擔心自己做得唔好，
真係瀕臨崩潰嘅狀態
呢個角色，好多訪問入邊我都會話佢係一個奸角
但係其實我覺得佢係一個好可悲嘅人,什麼人都不相信
卻偏偏係感情上相信了一個愛的男人
做錯咗決定，以為眼前既人會剩返既
財產係佢既最後依靠，但最後卻發現什麼都不剩
但我心底𥚃覺得她還不算是一個十足的壞人
大家睇埋今晚果集就會知」
你哋又覺得李凱欣係好人定壞人呢？睇咗咁多集，我覺得李凱欣最有血有肉，係個好角色。
---------------------------------------------
問：最初有咩契機接到《已讀不回》呢套劇？你當時有咩感覺呢？
答：公司當時冇話畀我知角色係啲乜，只係話嚟緊有套劇想畀個角色我做。對我嚟講新人梗係乜都試啦，都冇理過個角色係乜，就話好呀好呀，咁就做呢套劇、做呢個角色。
---------------------------------------------
問：平時見你做主持就得心應手，今次係咪第一次做有名有姓嘅角色？如果做主持嘅信心係100%，做演員有幾多%呢？
答：今次真係令我明白到主持同演員真係兩個完全唔同嘅專業嚟。我都成日講，今次呢套劇真係我第一套有背景background故事嘅一個正式角色。我之前做好多劇都係客串。今次對我嚟講係一個好好玩嘅角色，同埋當中有好多發揮嘅位。如果你話做主持我有100%信心，咁做演員可能只係得30至50%。因為呢個範疇真係唔算真正接觸過，所以我都當自己係新人咁去做呢件事，所有嘢都係從頭學起。開頭我都會擔心，但就盡自己能力做好。（按：得喎有潛力，加油）
---------------------------------------------
問：劇裡面嘅李凱欣係做PTGF，個角色對你嚟講最難係咩呢？做咗啲咩功課去演呢個角色？
答：對呢個角色我做啲功課就係睇好多有關援交女仔嘅戲。其實最難嗰樣嘢就係要說服自己呢樣嘢係啱嘅，同埋要諗個角色點解要去到做PTGF呢一步呢？我冇接觸過呢個行業，個價值觀又可能同呢個角色好唔同，要說服自己佢係啱之餘，亦都成日諗呢個女仔係咩原因去做呢樣嘢？因為個角色好多嘅決定同我都好唔似，所以做要做多功課。
---------------------------------------------
問：最難忘、難演係邊一場呀？最後出嚟嘅效果你滿唔滿意？
答：就係我同阿妹（岑樂怡）有一場喺監倉嘅戲份，嗰一場睇劇本時我都想像唔到我會點演。但真係去到嘅時候，嗰場戲我好鍾意，個感情起伏好大，導演又好好，同我哋講可以一take過，等個情感可能由頭帶到落尾。因為驚可能中間停咗，我哋個情感好難返返上去。同埋有一樣嘢係比較難，就係我哋喺監倉入面係對住咁坐，其實幅牆係隔晒啲聲，完全聽唔到對方講嘢。導演就搵人鑿爛咗幅牆，咁幅牆唔係真嘅係板嚟（按：應該係指嗰塊透明板），但好多謝導演，唔係個個導演都肯鑿爛幅牆。我哋又新，如果唔鑿爛幅牆畀我哋聽到對方講啲乜，我哋都好難演。出嚟效果滿唔滿意，我就留返畀觀眾去定奪，但我好開心自己可以挑戰啲情緒起伏咁大嘅戲，我真係第一次演。同埋嗰幕係我同導演第一日合作，就拍啲咁高難度嘅戲，所以我要好多謝佢。（按：呢場真係幾好睇）
---------------------------------------------
問：做主持同做演員，你自己有冇preference？
答：由我出寫真集嘅時候，我已經好想做主持（按：Hailey喺2009年以「周秀娜師妹」、「八模兵團」身份出寫真。2011年參加now TV嘅《CEO選拔賽》以季軍成績加入now TV成為主持）。依家都做主持一段時間啦，試過做戲之後我真係幾鍾意。現階段嘅我就想試多啲做戲方面嘅工作。
---------------------------------------------
問：演員方面想挑戰咩角色？主持方面又有咩想做但到依家都未有機會呢？
答：演員方面我成日都想做啲精神分裂嘅角色，因為可以鑽研好多唔同嘅性格。或者做啲變態殺手，會好好玩好好發揮。因為嗰啲係現實生活唔會做到嘅嘢，所以成日都想試呢啲。主持方面，我之前都有講過，就係想做一個同動物有關嘅節目，希望嚟緊會做到，希望可以參與多啲製作嘅部份，唔係淨係做主持，可以同大家一齊諗、去度個節目，但呢樣嘢都需要時間去諗去寫啲橋。
---------------------------------------------
問：除咗《全民造星》同埋《Girls’ Talk》仲忙緊咩呀？有觀眾話想睇你再《借宿一宵》呀，如果真係開第四輯，你有咩新idea？主持同埋演戲方面嚟緊有冇節目出街？
答：嚟緊嘅《廣告女皇》我都會做呀，依家都係忙緊呢個節目。呢個都係一個真人騷形式嘅節目。我今次唔係做主持，而係做製片嘅角色，帶住其他女仔。呢件事比我想像之中係複雜好多，對我嚟講係好大挑戰。因為我從來冇教過人，今次要帶住啲女仔，去教佢哋，去做mission或者task，係難嘅、幾大壓力嘅。可以講係我今行以嚟，做主持類型嘅節目嚟講，係最大壓力嘅一個。《借宿一宵》監製話暫時應該唔再開喇，再開都開其他節目。但唔知呀，有一日可能再開，大家就有機會見到囉，但短期內唔會有呢個計劃。
---------------------------------------------
#方以文問兩句 #陳俞希 #ViuTV #已讀不回 #廣告女皇 #借宿一宵
