巨龍娶咗老婆後（下）
上集：https://bit.ly/3fVAyIW
之後，所有村民走晒，得番小美同我，你眼望我一眼。
小美「嘩」一聲喊咗出嚟：「就係因為你，我無家可歸啦。」
「呢度就係你屋企，你就係女主人，我都聽晒你話，你話乜我都話好，我會愛你一生一世……」我千方百計咁哄小美，好不容易先令佢唔再喊。
小美半信半疑咁問：「你真係會聽晒我話？」
「會，女人就係要嚟錫㗎嘛。」我點頭如搗蒜。
小美又問：「你唔會逼我嫁畀你？」
「唔會，我都期待心心相許嘅愛情，逼番嚟嘅嘢有乜意思。」我答得爽快。
小美沉默咗一陣，突然問：「咁你唔覺得，人同龍好唔平等㗎咩？」
「吓？」我終於呆咗。
跟住，我哋就展開咗一場激烈嘅辯論。
小美問：「我係一個人權主義者，點解人要將靚女送畀龍做『龍妻』，唔係將龍送出嚟做『人妻』？」
「因為龍冇雌性。」我下意識答。
小美又問：「咁點解唔可以係龍主動追女仔，自由戀愛，莫道你在選擇人，人亦能選擇你？」
「因為龍唔可以離開龍洞。」我答。
小美問：「離開咗會點？」
「龍始終係氣運所在，祖宗擔心，如果龍頻繁同外人交往，最終會俾人利用。所以限制龍唔可以離開守龍村，連龍洞都少出。」
我再答：「等龍留低後代，修練得道，先可以飛升成仙。總之人間嘅龍一定要留喺守龍村，守龍村亦至少要有一條龍。」
小美再問：「你唔悶咩？」
我答：「所有龍都係咁㗎啦，守龍村會送食物玩具，大把嘢玩，畀你睇我部新PSP……」
小美打斷我嘅說話：「咁咪即係廢柴囉。」
我完全唔明，佢點解會得出呢個結論。
小美大聲問：「你享受龍嘅身份，根本冇自己奮鬥過，就係等守龍村提供所有嘢，連老婆都畀埋你，你唔覺得羞恥咩？」
「但我真係龍，人間唯一嘅龍，龍享受龍嘅身份，有咩問題？」我完全唔明。
小美強調：「我唔希望將來我個仔，係恃住龍嘅身份去享受，我希望佢自己去奮鬥。」
「咁我要點做？」我愈聽愈迷茫。
小美答：「你要離開守龍村，放低龍嘅身份，同其他人公平競爭，先係我心目中嘅強者！我先會嫁畀你！」
吓，我哋龍族已經喺守龍村住咗二千幾年，祖祖輩輩都冇走，突然要我打破傳統？
我冇即刻應承，但小美成日講：「做龍妻唔係一個童話故事，係悲慘地失去咗自由同自我認同。」
「我從來都唔知龍係點㗎，我雖然住喺守龍村，以前從來冇search過龍。」
「做龍妻真係令我想自殺，我覺得好羞恥。」
我真係好愛小美，最終我下定決心，帶佢離開守龍村。
我唔知自己要做啲咩，唔知要去邊度，總之我化為原形，揹住小美，飛向天際。
下一秒，守龍村化為灰燼。
我呆咗，小美都呆咗。
小美口都震埋：「點解會咁嘅？」
「守龍村嘅存在，就係為咗守龍。可能祖龍設咗禁制，只要村裡面唔再有龍，就……」
我都係估㗎咋，兩千年嚟都冇龍咁樣離開過，我點知啫。
「我嘅父母、我嘅朋友……」小美泣不成聲。
可惜，我哋已經返唔到去。
好多人都要奮鬥，好多人透過奮鬥都有更好嘅未來，但唔代表每個人都適合奮鬥。
有啲人嘅身份，注定佢哋唔鬥好過鬥。
同埋，千祈唔好女人話點你就點啊！
—完—
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #巨龍娶咗老婆後
巨龍娶咗老婆後 在 陳美濤Tomato - 巨龍娶咗老婆後（下） 上集：https://bit.ly/3fVAyIW ... 的美食出口停車場
巨龍娶咗老婆後 （下） 上集：https://bit.ly/3fVAyIW 之後，所有村民走晒，得番小美同我，你眼望我一眼。 小美「嘩」一聲喊咗出嚟：「就係因為你，我無家可歸啦。」... ... <看更多>