電話響起～
我：「你好，乜乜診所」
佢：「我而家喺乜乜酒樓，你即刻派幾個人嚟！」
我：「…小姐，請問咩事呢，我哋診所嚟喎，你會唔會打錯？」
佢：「我睇開嗰間診所呀嘛！乜醫生呀嘛！我呀！我嚟睇開你㗎！」
我：「請問有咩事呢…」
佢：「你嚟到咪知乜事囉！問問問！你派埋法證人嚟呀！」
咩係法證人呀？咩事先要出動到法證呀？我哋診所仔嚟咋喎…
我：「我哋醫生冇出診㗎，你要睇醫生嘅要過嚟診所㗎」
佢：「我唔係要睇醫生呀！」
咁收得線啦BYE。
我：「咁我哋應該冇嘢幫到你…」
佢：「我喺酒樓呀！我食到啲唔乾淨嘅嘢呀！酒樓俾咗啲咁嘅嘢我食呀！你哋要過嚟呀！」
我：「…咁你可能要同酒樓經理講啊，如果你有咩唔舒服嘅過嚟診所睇醫生啦」
佢：「經理而家喺我面前囉！養兵千日用在一時，過嚟呀」
Sorry呀，醫生唔係你隻兵，我都唔係。
我：「你有咩唔舒服都係要過嚟睇醫生㗎，我哋今日收七點，你七點前嚟到就得㗎啦」
佢：「我喺乜乜酒樓呀！」
我：「我知呀小姐，但係醫生唔會過嚟㗎～診所都仲有其他病人呀，你要睇嘅就要過嚟㗎啦」
佢：「你唔派人嚟我去醫委會扑你囉。（應該唔係同我講）你唔好笑呀！我去食環署扑埋你呀！你笑咩呀吓？你個樣同我慘啲呀！如果唔係我一定唔放過你呀！」
我：「….」
佢：「俾多最後一次機會你，你唔派人過嚟呀？」
我：「真係唔好意思呀小姐，我哋真係唔會出診㗎～」
佢：「我實扑你！」
嘟。佢cut咗我線。
我好期待你嘅實扑啊～
