我要賣老豆（上）
我老豆，肝癌末期。
唔好誤會，我絕對唔需要大家嘅安慰，亦一啲都唔傷心。
因為我老豆係個衰人，佢爛賭又唔顧家，搞到家無寧日。
喺我七歲嗰年，老豆為避賭債，離家出走。
從此，阿媽一個人湊大我，仲要忍住大耳窿嘅騷擾，屋企道門經常淋滿晒紅油。
大個咗之後，阿媽有病，我當然要傾家蕩產去醫佢啦。
但正當我籌緊阿媽嘅醫藥費嗰陣，老豆突然出現，帶住肝癌末期嘅診斷書。
我梗係想趕佢出門口啦，細個拋棄我哋，病咗就想返屋企，邊有咁著數？
但阿媽話，佢始終係我老豆，唔可以睇住佢死。
於是，我只可以畀老豆留喺屋企。
我當然唔會好似照顧阿媽咁，帶佢到處求醫，亦唔會對佢有好臉色。
但佢留喺屋企，生存多一日，就代表我要照顧嘅病人，又多咗一個。
但我可以點？好似當年佢離開我哋兩母子一樣，我冇辦法。
我忍唔住到處同人呻，漸漸地，所有朋友都知道，我屋企有個我好憎，而又擺脫唔到嘅老豆。
直到有一日，我接到一個舊同事嘅電話。
佢話，有人想買我老豆。
我忍唔住望向我老豆，一個身無分文，病入膏肓，又矮又瘦，身上仲散發住一陣臭味嘅阿伯。
講得唔好聽，貼錢都冇人要啦。
唔通有人想要佢啲器官？但佢病成咁，器官都爛晒啦。
舊同事神神秘秘咁同我講，兩年前，政府下令取消一切土葬，全部改為火葬。
但法例改咗，人嘅思維唔係咁快改到。
上一代仲認為，人死後，就係應該入土為安，燒成灰就係死無全屍。
但係政府規定，人死後，必須將屍體運到火葬場。
喺火葬場工作人員嘅見證下，燒成骨灰，先可以喺死亡證上蓋印，再辦理承繼遺產嘅手續。
咁樣一來，各位孝子賢孫為咗完成長輩嘅遺願，就開始搵破綻。
最大嘅破綻，就喺火葬場度。
嗰度有好多工作人員，加上每次開爐都有記錄，冇可能靠收買工作人員過關。
但係，屍體始終唔令人愉悅，即使係見慣風浪嘅工作人員，都只會隨便望一望，見到條屍基本上符合死亡證描述，就開爐燒屍。
換句話講，只要提供到一條相似嘅屍體，就可以過咗火葬嗰一關，再偷偷安排土葬畀親人。
舊同事就係做咗中介，想買我老豆……條屍。
「好。」我答得爽快，老豆後生都冇養過我哋，死後為家庭貢獻吓都公平丫，我仲唔洗處理佢嘅喪事，少好多麻煩。
舊同事有啲唔好意思咁講：「只有一個問題，個客嘅老豆今日斷咗氣……」
我問：「所以呢？」
佢答：「所以佢哋希望你老豆，最好喺呢三、四日內過身，咁屍體嘅腐爛程度，先可以符合死亡日期。」
我明白佢嘅意思，無理由死亡證上寫上個月死，但條屍好似啱啱死咁㗎嘛，一望就知有問題。
我老豆雖然病入膏肓，死就死梗，但我真係唔確定佢可以喺呢幾日內死。
即係話，要做到呢筆生意，只有一個辦法。
我相信在座各位都冇殺過人，更遑論係殺自己嘅親生老豆。
老豆對我哋兩母子嘅薄情，足以令我睇住佢病死而無動於衷，但唔足以令我落手殺佢。
下集：https://bit.ly/3gWMASP
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #我要賣老豆
孝子梗 在 [討論] VT本人接受抽菸梗的話粉絲能接受嗎- 看板C_Chat 的美食出口停車場