呢篇文，唔配圖，以後唔配圖既，都會係關於我自己既野，只想睇散文同故事既讀者無時間可以直接skip，唔會有咩影響。
有唔少讀者都覺得最近好反常，出名爛尾任性斷更既蔣薇轉死性，日日出，愈出愈多，有人問我，你係唔係有病？我話無，佢話，如果你唔係有病，咁你應該好快就病。
啱，尋日，我寫左五篇文，個人覺得好唔妥，呆滯，想嘔等等，然後係凌晨三點，我終於可以訓。
講左先，我唔係想買慘，我咁努力，你俾下面like，俾下面subscrible啦！唔係，真係唔係。
N年前，我曾經發過一次全職寫作夢，去澳洲工作假期，同時寫作專欄出書等。
試過係露台飲住白酒打文，試過係真．黃金海岸發呆半日寫靈感，試過係路邊同陌生人吹足半日，試過係酒吧狂歡邂逅。
Well，作家的生活應該係咁，Chill and Relax，任性，隨心，充滿未知，加一點嬉皮士的感覺。
當然，事實證明，失敗！然後我陷入左一個作者常犯既誤區。
唉，香港係文化沙漠，無人會為文字埋單，靠寫字唔夠開飯等等。
返香港後，我認識左老婆，要腳踏實地，搵返份工，然後一切作家Chill既回憶，好似一場夢咁，但都真係幾令人回味。
三十有五，好記性同好彩既讀者應該睇過我有篇文講，我得68歲命，係，細細個就批，一直都好準，甚至連我會寫野呢件事都描述得出黎，神奇，所以我對於68呢個數字好敏感。
人生如果過左一半，下一半係點？
然後我寫多左文，發現真正令我會快樂既，係寫野，而每日正常工作開始形式，如果要衝破，就要付出更大努力，花更多心機時間，但工作上既麻煩同意外，令我一直都覺得好辛苦，有時唔係自己錯，都要負責，有時明知件事唔係咁做，都要照做。
性格上我真係唔太夾呢個行業，但為生活，頂硬上。
寫文養唔養到自己？傻的嗎？你知我知大家都知，有幾多個靠文字可以生活既作家？
直到一日，有個朋友問起我，一日用幾多時間寫野，我話兩三個鐘左右啦，佢話，咁你當係興趣無問題，我話我想全職既，不過太難。
佢話，全職的話，我依家一星期返五日，每日八個鐘，未計OT，如果你想全職，先要花咁多時間係呢件事上面，唔係要你八個鐘都打字，但你呢八個鐘係唔係全程投入去做寫書呢件事先？定係你花左好多時間係吃喝玩樂上面啊？
我諗起澳洲既Chill生活，我先發現，原來全職，唔係簡單，付出同努力係必須，至少我都要做到普通上班族每日工時先可以話，無呢個最低工資係唔公平，係市場問題，但連呢八小時我都無付出，學乜人去呻？返工唔辛苦咩？寫野又特別吃力啊？人地寫program既寫到無頭髮咪仲辛苦！
聽完後我改左自己既思維，想全職，我就先要付出全職既努力，放工後八小時，努力寫！當打兩份工囉！想進步想改變就係要咁，力不到不為財。
所以，第一篇既長傾不見，誕生了。
我唔係亂黎，你地有留意既，我係一直慢慢加上去。
《長傾不見》，《好久不見》，《Patreon獨家長傾不見》，《Patreon獨家兩個人的酒吧》，每次我習慣左之前既工作量，我就會加少少試水。
而尋日，我終於觸碰到心目中可以對得住「全職」兩個字既努力。
係攰，係辛苦，但事業有邊個唔辛苦？其實無乜野好慘，所有野都好正常，辛苦得黎撐到就係贏家。
我希望呢種習慣可以維持得愈耐愈好。
唔駛擔心我太多，留言／PM同我傾計，等我無咁腦閉塞，已經好幫到我放鬆。
講完，我又要做野喇，今日有唔少野出，有追開既就留意喇！
嬉皮士 香港 在 Hello Hippie 你好嬉皮 的美食出口停車場
HELLO HIPPIE 你好嬉皮｜EST.2014 "We are vintage weirdo" 𝚅𝚒𝚗𝚝𝚊𝚐𝚎 & 𝚂𝚎𝚕𝚎𝚌𝚝 𝚂𝚑𝚘𝚙 Base Hong Kong 香港葵涌葵豐街53號福業大廈19 ... ... <看更多>