【問題學生：母校】
*以下咁特別嘅圖片係我母校嘅課室，但千祈唔好誤會，依然係圖文不符嘅
關於學校，其中一樣我好想講下嘅野係，唔知點解有啲老師好唔中意學生問問題。
例如話，science 堂講起萬有引力，一個基本到唔基本嘅理論，例牌講下牛生個蘋果，mass 越大吸力越大，再向半睡半醒嘅同學介紹返牛頓隻G (條式)，咁哩個topic 就完滿結束架喇。
事關後面要計嗰啲數先係重點 ok?
哩個時候呢，就總會有個麻煩友舉手問野嘅。「點解mass 大就會吸力大啲嘅？」多數同學一路玩緊電話或者發緊白日夢，仲有一部分就心諗唔好搞事啦，快快趣趣講完咪計數囉。
而通常阿sir/miss 聽到個咁嘅問題都會表現出不奈煩嘅表情，然後求其講句，「你問返牛生啦」敷衍了事。有啲真係冇咁好老脾嘅會講句 enough with the stupid questions.
其實哩個問題一直問落去都真係冇答案。有心機嘅老師可能會同你輕輕介紹下out of syllabus 嘅廣義相對論，提一提你牛生嗰套有啲outdate，不過慢慢學啦咁。事關繼續問落去同學又唔明，老師又唔識，問到最後其實霍金都答唔到你，又變哲學問題喇。
重點係，其實嗰位同學嘅問題本身好合理。喂，你話係就係ga拿？唔明，咪問囉。但係如果因為一個咁嘅問題，俾人覺得佢麻煩，玩野，唔合作，你覺得嗰位同學仲有冇心機上堂？結果嗰一堂佢唯一學左嘅公式係：
Question = Stupid
一路大諗返轉頭就發覺，好多又有天分又聰明嘅同學，喺最需要空間嘅年紀，就俾人標籤為次等，定性做讀唔到書。其實我識好多都係好有想法同求知欲，甚至比一般學生精靈有活力。世界好大，但係學校容納唔到佢地。甚至，容納唔到真正滿眶熱誠嘅老師。有時老師們都好人難做。
係咪制度炮灰，高牆之過嗰啲我真係唔識喇。結構性嘅問題，殖民教育嘅遺物，地區文化哩啲野，斷估都唔係話加個科目，轉個年制可以改善到嘅野。點解決呢，就唔好問我。我都係諗住借個post懷緬下開始有少少褪色嘅學生時代姐😌
加句中同教我嘅百搭祝福語，充滿殖民地色彩：
「TLDR 共勉之」🙏
#一po難盡 #tldr #苟噏 #中學 #男校 #冇女都可以好開心 #毒到呢 #利申 #朋友都係我 #好老師一生銘記 #多謝你地 #collectivememory
Photo from 名校secrets
