關於 好多改詞甚至原創詞都愈來愈唔啱音 ，我們在網路上蒐集到這些相關的討論、資訊與評價

【獅子狗之我見】

明明呢一位新移民可以發表自己意見，但佢選擇咗阻止人地發表意見。

一個人被圈養得太耐，去到有言論自由嘅地方反而不願面對異見並參與辯論，連自己嘅權利都唔敢行使，諗深一層，其實好可悲，我唔希望我地會一步一步被同化成更可悲嘅人。

最近有件小事令我感受頗深。

仲記得喺發生完元朗警黑合作嘅翌日，表哥喺一個淨係講飲講食講旅行，猶如思想烏托邦嘅親戚群組入面轉發咗有關反送中同近日事件嘅文宣圖片，打算為民主盡幾分綿力，隨即有長輩義正詞嚴地表示：我唔希望呢個群組出現呢啲內容。

表哥只好反諷一句：噉我做返淨係識返工嘅港豬。

雖然只係文字，但係我睇出咗佢嘅失望同無奈。

有見及此，廢青阿挽當晚亦有將【米奇話高飛狗同唐老鴨周圍斬人咬人，叫大家唔好去迪士尼】嘅錄音轉發去同一個親戚群組，以此為表哥分擔一二，暗表支持嘅同時，亦話畀親戚們知，香港好危險，唔好出街。

過咗一陣，家母就收到長輩來電。

但由於家母正處於烹飪狀態，所以就由我代接。

阿挽：佢煮緊飯喎～

但原來長輩搵嘅正正就係我。

長輩劈頭第一句便是質問：你做咩事？
阿挽：我做咩事？
長輩：你喺個group度post乜嘢呀，你自己話？
阿挽：咪話有人斬人叫大家唔好出街囉。
長輩：我今日已經講過我唔要喺個group見到呢啲嘢。
阿挽：你不找政治，政治會找上你。

呢句已經係我諗到嘅最好回應。

畢竟，喺我唔認為自己有一丁點錯嘅情況底下，我認為任何嘅「質問」都係惡意嘅。

其實我地班親戚關係一向密切，相處舒服，雖然我平時無乜禮貌，但我都好鍾意一眾親戚，而長輩都好鍚我地，所以為免自己同長輩展開激辯，我隨即就將電話移交家母。

當然事後亦少不免幾場我同家母嘅激辯，哈哈。

但講真嗰句，一國兩制未完，香港言論自由都尚且苟延殘喘緊，大家又何必自我審查，避而不談？如果我唔係覺得你地係對我重要嘅人，如果唔係覺得眼前嘅問題同大家息息相關，我都慳返啖氣費事同你地講啦。

當大家講緊政府幾時派$4000嗰陣，已經係談論政治啦。

更何況，我只係「黃藍皆宜」地話畀你地知香港好危險，而呢個事實就算你地日睇夜睇紅媒TVB都否定唔到。

當然，我唔會繼續要啲長輩接收佢地睇唔入眼；聽唔入耳；記唔入腦嘅資訊，但我並唔鼓吹任何一個群體入面有我上述嘅呢種以言入罪查水錶慣性。

——————————————————————

題外話，大家睇嘢要睇完整啲呀，炒車炒得多好無癮呀。

講個例子：

當你見到一段片入面，一班反送中嘅年輕人圍罵一個拖住行李長驅直進，準備離開嘅老人係「廢老」嘅時候，你啲同情心混雜道德水平千萬唔好馬上拉高，因為段片從零秒開始就係個老人離開緊，無人知道個老人喺「影片開始錄影」之前做過啲乜嘢。

任何有理性嘅人都唔應該對影片入面嘅雙方作出任何評論。

因為你睇落好可憐嘅人，佢嘅可恨程度可能更高。

正如我係反送中嘅，我都絕對唔會話一個反送中嘅人打一個撐送中嘅人就係啱；反之亦然。

一日未見到完整片段，所有取向都只係閉眼駕駛。

＃新移民每日一車一車噉送入香港已經唔係新鮮事
＃好多人都低估咗文化上嘅滲透率
＃香港好多地方都聽唔到本地口音
＃小朋友返學放學都用普通話溝通
＃年輕人開始唔聽廣東歌
＃好多改詞甚至原創詞都愈來愈唔啱音
＃講真真係好多唔啱音