【藍色清雞湯拉麵】HK$85│油麻地隱世拉麵小店 真係食到日本地道的豬骨湯拉麵感覺!
今次經朋友介紹，去左油麻地試一間新拉麵店，叫做MAKI，佢竟然身處於廟街牛雜隔離，完全幻想唔到會有一間日本拉麵店。
我都係抱住無咩期望嘅心情，因為香港做日式拉麵，好多都做得唔似樣，我係日本食過好多拉麵，總係有幾種口味特別喜歡，係香港食唔返的。
睇睇餐牌，就係佢啦！
傳說中要來一試的藍色雞湯拉麵！
除左藍色雞湯拉麵，我仲說服我朋友叫一D比較顏色鮮艷嘅拉麵比我影，為求畫面豐富D呀嘛！
所以我地另外點左辣味豬骨湯拉麵 + 味噌拉麵。
先黎講下呢碗【藍色雞湯拉麵】
話說日本東京「本所吾妻橋」有一間叫做 「吉法師 KIPPOSHI」，佢原創左一款鮮藍色的藍色雞湯拉麵，觸目度甚高！
我當然就係為左佢而來一試，到底係咪抄襲日本名物呢?
藍色
【清雞湯拉麵】HK$85
但估唔到係，佢用左另一種食材「蝶豆花」去製作湯底，加入大量雞肉，湯汁有好濃重雞肉味，但佢感覺唔油膩，好清新，唔會覺得食左好肥咁。
而且佢配料都好多，有兩片豬肉叉燒，就算咬過佢都唔會散開，做得好結實。
仲有原隻雞蛋，好足料！雞蛋上面仲插住支野，係咩黎?
麵質較粗身，吸湯力夠，麵質彈牙，唔錯。
原來佢會比一支檸檬汁你唧落個湯，令佢變成紫色！呢個就係蝶豆花嘅特性！落完檸檬汁，食落仲有檸檬酸咪咪嘅感覺！
紅色
【櫻花蝦辛辣豬骨湯拉麵】HK$70
呢碗橙紅色的 辣味豬骨湯拉麵，店主話佢係以九州拉麵以福岡最出名嘅豬骨湯底風格製作。
果然真係豬油味好重，豬骨湯好濃極濃，可以話係我香港第一次食到真係日本食嘅味道，大驚喜！
麵質同雞湯拉麵都唔同，佢係用左幼麵，因為濃湯用幼麵會較適合，真係相當認真！而且口感同味道都係我東京中野「豔MARU」食到嘅感覺，真係好似去左日本食拉麵！
湯底落左好多櫻花蝦所以好香蝦殼味，好似蝦餅果種香味。
湯底微辣，唔係真係想像中咁得人驚，而且仲帶少少甜味，應該係豬油嘅甘甜，超好食！我連湯都飲埋！
上面一件非常搶眼就係櫻花蝦餅，雖然比湯浸過，但佢變成上脆下軟，軟得黎唔會腍哂，反而似食緊蝦餅好煙韌，真心正！會再翻啅！
橙色
【味噌豬骨湯拉麵】HK$75
以豬骨湯底製作，所以豬油味都好香好重，超濃郁嘅口感，味噌味好香，咸咸地，微辣帶甜，呢一碗比較簡單，但都好好味！ 豬肉叉燒唔會散開，肥瘦均勻，真心抵讚！
問返老闆，點解佢碗碗麵嘅質地都唔同，原來係因為佢每一款都以日本唔同地區拉麵為主題，所以要配合返當地湯底口味同麵質口感。
認真傾談之下，原來大廚係日本拉麵店學師4年，每年都會轉去不同地區學習拉麵製作，所以我真係食到好多日本地道嘅拉麵口感！
大感動！
大廚表示而佢地所有麵條都係採用日本材料於香港廠房製做，相當新鮮可靠！
另外我地幾個人，仲叫左一碟串燒試下
每款叫左一串一齊SHARE試下
雞心 -彈牙，醬汁好甜，唔苦唔腥，少甘香，呢個有驚喜
泡菜豬肉 - 好香泡菜好fresh，豬肉油花好重，兩者平衡得好好
雞軟骨 - 卜卜脆，黑椒香，帶少少雞肉咬口，中規中距
雞腎 - 爽彈牙，好原味，無乜調味。
牛舌 - 好厚肉！但有筋，難咬少少，好香牛油味，都好腍好易咬。
HK$28咁大串性價比算最高。
大蔥雞肉 - 大蔥好香甜，帶辣。雞肉好結實好大件，但嫌醬汁唔夠多，可以再多D。
鰻魚 - 味道正常，不過不失，無驚喜，份量有點少，嫌唔夠喉。
成餐最滿意係紅色櫻花蝦湯拉麵，我諗我黎緊可能一星期要食一次，止下日本癮先！ 店內環境都好有日本居酒屋小店感覺，當去下旅行咁止下癮都唔錯，好過去好多連鎖拉麵店呀！
MAKI 拉麵
油麻地鴉打街48號雅寶大廈地下8號舖
Shop 8, G/F, Arts Mansion, 48 Arthur Street, Yau Ma Tei
電話號碼 - 61276820
#ramen #拉麵 #日本
好厚肉 在 好厚餐盒· 崇德創始店 - Facebook 的美食出口停車場
好厚 餐盒· 崇德創始店, Tainan, Taiwan. 1986 likes · 33 talking about this · 184 were here. ｜新品味現代餐盒｜ 新鮮。品質。美味/以原型食物為食材基礎/ /低鹽、 ... ... <看更多>