《星座》
♂：早晨，你鍾意未知，定安定？
♀：安定
♂：我鍾意未知
♀：我唔係鍾意安定咁簡單，我係恐懼一切未知，我要將所有野都睇得清清楚楚先可以
♂：處女座？天蠍座？白羊座？
♀：你點估都唔會估到，我呢個性格同星座無關
♂：我係射手座，所以我毫無計劃
♀：典型射手座
♂：我係
♀：射手座出名唔專一
♂：係世俗人認為，事實我認為射手座係最專一
♀：讚緊自己？
♂：射手座好喜歡未見過既事物，好易動情好易動心，但真正入到佢心既唔會多，而且佢發現到一個真正與眾不同既人之後，係專一到你唔信
♀：我的確唔係常見既類型，你會中招都好正常，但你慢慢去了解就會知道，我同你係好唔同
♂：所以你都對我好有興趣？
♀：某程度係，因為你都唔係常見既類型
♂：愛情係由共通點而組成，再由分歧點去消滅
♀：所以我地依家好似由搵共通點去到搵緊分歧點咁？
♂：係，所以我今日問你一個我一早知道答案既問題
♀：所以……你係想表達，你已經諗清楚我地之間既關係？
♂：你想要短暫既愛情，而我想要長久既愛情，係我地第二個分歧點
♀：唔錯，繼續
♂：從你之前講西遊記既討論入面睇到，比起一生一世，你認為短暫既愛情更合乎你既觀點
♀：係
♂：你問過我，二揀一，我想同你拍一陣拖，定係做一世既朋友，所以你唔相信愛情會長久
♀：係
♂：最後一點，你拒絕我，但唔離開，亦想同我見面，呢種反差，唯一解釋係，你唔介意同我有愛情，但你唔希望我認真
♀：寫開野既野，閱讀理解都真係出色
♂：呢種諗法，從賤男口中聽好自然，但從女性口中聽見，我都係第一次
♀：我係好有計畫既人，亦唔容許有意外出現，我同你係兩個世界既人，照常理我係唔會理你，但你竟然可以令我去到咁在意既地步，我真係好欣賞，但係我預期入面，我地最終一定會分開，為你好，為我好，大家唔好太認真會比較舒服
♂：我曾經聽過一個人講過，佢男朋友係日記裡面寫埋打算邊日同自己分手，佢覺得對方好恐怖，當時我無乜感覺，但依家我終於明呢種感受係點
♀：如果你清楚明白理解並同意呢種關係，我地可以繼續
♂：如果我執意係想同你長久發展，你會消失？
♀：我地都唔細，呢種承諾，你唔覺得好令人嘔心咩？兩個人可以一齊行，行到盡頭，再講一句我地一生一世係珍貴，但如果兩個人一開始就講一生一世，係路上面因為呢個承諾而唔開心都繼續一齊，到頂唔順就分開，咁不如一開始就唔好講
♂：我明，但你無答我問題
♀：我唔會，因為受傷既唔會係我，而係你自己，我唔會相信你所謂既長久，亦唔會對你既承諾當係一回事
♂：你真係好有趣
♀：你都唔差
♂：呢一招，有幾多個男人中過？
♀：你係第一個，亦希望你係最後一個
♂：我有個問題想問你好耐，你結左婚？
♀：我呢種愛情觀似係結左婚？？
♂：的確我好似問左個好愚蠢既問題
♀：喂，你令我呢個黑暗既世界，有返少少光明
♂：如果我唔再發光，你就會好似一個壞左既燈膽咁將我丟棄？
♀：呢條問題，不如問返你自己，一個壞左既燈膽你會點處理？
♂：當我無問過
♀：射手座，係好矛盾既星座，對於好奇既未知，你地好喜歡，但對於負面既未知，你地好抗拒
♂：但對於一種必定出現既負面結局，射手座會好易接受
♀：咁咪好囉
♂：我都想知三分鐘熱度既自己，可以捱幾耐
♀：加油，我相信你，亦相信我自己，可以令你捱得比之前更耐
♂：如果我係燈膽，你就係火，而我就係飛蛾，你成日話我好危險，其實最危險既係你
♀：你唔危險，我唔危險，呢個故事就唔會精彩啦
♂：你又好似講得啱
♀：【圖片】危唔危險？
♂：你覺得我大約知你咩樣之後仲會怕你既相？
♀：哦，好，晚安
♂：【圖片】咁我危唔危險？
♀：突然安全晒喇！！！！！！
♂：好啦，安全既一晚，晚安
♀：如果你壞左，我都會將你好好收藏
——
長傾·不見 第一回 @筆友
https://bit.ly/LongchatEP1
長傾·不見 第二十四回 @最初
https://bit.ly/LongchatEP25
好久 不見 第一回@久違
https://bit.ly/LongtimeEP1
好久 不見 第三回@破窗
https://bit.ly/LongtimeEP3
