https://www.patreon.com/posts/52778834
蘋果宣佈執笠，好多人對香港無蘋果嘅日子感到徬徨無助，而我作為一個老屎忽，卻響呢個時候打算回顧一下，當年蘋果由無到有嘅日子究竟係點嘅。
響壹週刊出版之前，屋企只係會訂極其悶蛋嘅《城市週刊》同懶高竇嘅《號外》，再加本專講國情嘅《百姓》咁樣，壹週刊卻完全令我對八卦雜誌嘅印象完全扭轉：一邊係極其咸濕腥臭嘅娛樂新聞，另一邊楊懷康同張五常卻大談經濟學同藝術，尤其係楊懷康更係我經濟學上嘅啟蒙導師。（林振強當年反而無乜興趣睇）
跟住去到《壹本便利》獨立分售，最初賣一蚊定唔知兩蚊大大本，搞到成間中學啲人都人手一本，果陣我已覺得黎智英一次過打哂老豆老母仔女市場真係好撚勁。
去到1995年，黎智英宣佈拎七億搞《蘋果日報》，仲記得當時輿論一面倒笑9佢，話香港報業門檻成本極高，同一個禮拜印一份週刊概念完全唔同；加上當時報業銷量同廣告收入已出現萎縮，各份報紙都有固定擁躉難以搶走，呢筆錢同倒落咸水海無乜別。
跟住正式出版果日，可能好多人都會睇番wiki話當日買蘋果日報有蘋果送，我就記得老豆唔係響便利店買所以無蘋果拎番黎，但份報紙個視覺真係令人有好大震撼：響蘋果之前，我屋企主要係買《新報》同《華僑日報》，簡單黎講個版面設計就係一堆細細密密嘅字，有時再加一幅半幅照片咁樣，但從來都只係因應新聞內容考慮。
結果當日《蘋果日報》一出，我就好似由黑白電視世界走入彩色世界咁，大大幅頭版相，鮮到唔鮮嘅藍紅報頭，煽動性嘅頭條，好多一般報紙平時唔會登嘅流血死人相，突然間一次過堆哂響你面前，對於今日對「蘋果式新聞」已習慣如常嘅各位，我真係好難形容當日果種震撼你聽。
仲記得當日蘋果出版只買兩蚊雞，結果引黎報業聯盟集體杯葛：邊間報販咁拎蘋果黎賣，就其他報紙發行都唔派紙比佢，結果搞到後尾蘋果要用「蘋果金」3蚊現金券先可以用2蚊特價買倒，算係勉強繞過呢場杯葛風暴。諷刺嘅卻係，響蘋果加回原價之後，各份報紙反而因為要保住被侵蝕嘅佔有率，反而爭相割喉減價：最誇張都可以話係《新報》，竟然可以減到一蚊，當時報販話就算一份都賣唔出，靠回紙都可以淨賺夠飲餐茶。
之後當然係優勝劣敗，好多原先作風保守嘅報紙，即使響大幅「蘋果化」，參考佢嘅排版設計同報導形式丫仍然難敵競爭，之前睇開嘅《華僑日報》、《新報》、《天天日報》仍慢慢走入歷史墳墓中。
呢度又要講講，《蘋果》出版當日其實香港仲未回歸，所以《東方》同《蘋果》嘅衝突主要都係業務上嘅競爭，並無好似而家有咁明顯嘅政治分歧，《東方》當時雖然仇視殖民地政府，但主要都係因為一啲法律判決問題認為司法不公，同唔少民主派人士仍維持良好關係。
然而響回歸後，因為慢慢摸到共慘黨紅線，開始選擇性批評部份政府部門同高官，但絕對唔會再質疑中共政治路線，慢慢同《蘋果》響商業同政治層面都企響絕對對立面──當然，只將呢種指責放單單放響《東方》身上亦唔公平，因為TVB、星島、明報、商業電台等媒體，皆無一不在進行自我審查。
所以去到最後響03年，先會有「壹報壹刊兩枝咪」嘅說話，因為當日除咗黃毓民、鄭經翰、壹周刊同蘋果日報以外，真係再無敢於同共慘黨對抗嘅主流媒體代表了。
再之後當然就係進入蘋果動新聞時代，我諗呢個反而係新一代嘅朋友認識蘋果嘅主要印象，而我響近20年接觸蘋果嘅主要途徑，亦都係網頁同動新聞。但由於篇幅寫到差唔多，呢一Part就去到呢度為止，有緣有時間，先再寫埋蘋果新聞網呢部份，請請！
大談經濟 在 老黃談經濟 的美食出口停車場
結合自身在北美工作生活20多年的親身體驗，與大家分享我個人對經濟，金融，投資理財，資產配置及國際局勢的研判。與興趣相投的朋友們切磋探討，共同成長。 ... <看更多>