當地球變成垃圾站（下）
上集：http://bit.ly/3uSkDSz
我直情放低自己原本嘅工作，專心處理聯會嘅事。
我嘅專注受到吳博士嘅賞識，冇幾耐就被任命為吳博士嘅助理。
「反垃圾處理聯會」嘅進展好順利，我哋組織咗幾次大型和平示威，次次都聲勢浩大，連「星際聯盟」嘅媒體，都有提及地球上嘅示威。
吳博士將呢啲報導收集咗，整理、翻譯再公開。
一時間，成個地球嘅人都好鼓舞，大家都相信，「星際聯盟」好快會向火星施壓，終止「垃圾處理協議」。
與此同時，一架架飛船將垃圾源源不絕咁傾瀉落嚟。
地球嘅污染愈嚟愈嚴重，亦愈嚟愈多地球人患上唔同嘅疾病。
今晚，我收到一個大消息，話有一批受到嚴重輻射嘅火星垃圾，將於三日後運到地球處理。
我馬上去搵吳博士，我連門都冇敲，直接衝入吳博士嘅辦公室。
吳博士拎住一本簿仔，滿臉陶醉地望住本簿仔。
佢一見到我，即刻將本簿仔收去身後。
但我已經望到本簿仔個樣，應該話，嗰本簿仔係所有地球人曾經夢寐以求嘅嘢……火星移民證件！
「我……你搵我咩事？」吳博士扯出一抹牽強嘅笑容。
我連續問咗三個問題：「你仲想扮嘢？你要移民去火星？你點對得住成個地球嘅人？」
吳博士見掩飾唔到，臉色一變：「有邊個地球人唔想移民去火星？就算冇『垃圾處理協議』，地球本身都冇未來㗎啦。」
我突然諗到最重要嘅問題：「你作為『反垃圾處理聯會』主席，應該係火星政府嘅眼中釘，點會畀你移民？」
吳博士迴避我嘅目光，好似唔想答呢個問題。
我冷笑一聲：「你唔講都唔緊要，我將呢件事講出去，記者都會查到原因。」
「唔好！」吳博士阻止我：「我講……唉。」
據吳博士所講，佢初初成立「反垃圾處理聯會」，的確係為咗地球著想。
但聯會成立冇幾耐，就有火星人聯絡佢，用一家人嘅火星移民資格引誘佢，為火星做事。
我問：「火星要你做啲咩？」
「咪叫我搞大個聯會，搞多啲示戚。」
「吓，火星想你搞示威，反對『垃圾處理協議』？」我難以置信。
「係啊，火星人話，要畀地球人一個宣洩情緒嘅渠道。大家多啲和平示威，以為有希望，咪唔會搞三搞四。」吳博士有啲尷尬咁答。
我又問：「咁『星際聯盟』嘅媒體報導……」
吳博士解釋：「嗰啲報導係真嘅，但『星際聯盟』根本唔關心呢件事。因為火星政府喺『星際聯盟』有相熟媒體，先出到呢啲報導，畀地球人一個假希望。」
我所有嘅努力，原來都係一場笑話；乜嘢「反垃圾處理聯會」，根本係一場騙局。
吳博士小心翼翼咁問：「你可唔可以，唔好將呢個秘密講出去？」
我用一聲冷笑作為回答。
吳博士忽然講：「咁如果……你都有得移民火星呢？」
我呆咗。
「我移民之後，需要搵個人接任『反垃圾處理聯會』嘅主席。火星人承諾，新主席只要做好『份內事』，五年後，就會得到全家移民嘅資格……」吳博士意味深長咁望住我。
我想拒絕，我想鬧佢不知廉恥。
我忽然諗起我個仔，佢先三歲，如果佢留喺地球，五十年內佢一定會死。
佢可能會俾各種污染物影響，可能會受到輻射，會死得好慘。
地球已經冇將來，無論我地點樣努力，留喺度嘅人都係死路一條。
我可以揀，有尊嚴地同地球一齊死，或者，無恥地出賣地球，換取一條生路。
最後，我嘅選擇…….大家都明白。
吳博士離開後，我成為新一任「反垃圾處理聯會」主席。
我行喺隊伍嘅最前面，大聲叫口號：「保護地球！」「守衛人類母星！」「地球唔係垃圾站！」
每個人，企喺隊伍後面嘅時候，都曾經想拯救地球。
但爬得愈高，權利就愈大。
最後，好多人喺有得選擇嘅時候，選擇咗拯救自己。
跟班易做，英雄難求。
—完—
鳴謝一位學識淵博的同學友情提供幻想，絕非真人真事，
如有雷同，實屬不幸。
#短故 #短篇 #小說 #陳美濤 #廣東話 #粵語 #tomatochan #當地球變成垃圾站
大英雄聯盟粵語 在 迪士尼《大英雄聯盟》(Big Hero... - Bandai Candy Toy Hong ... 的美食出口停車場
迪士尼《大英雄聯盟》(Big Hero 6)廣東話配音版預告推出啦！！ 12月最新的聖誕檔期電影《大英雄聯盟》，廣東話版本由C ALL STAR配音，12月13日優先場，12月18日集結 ... ... <看更多>