【語言藝術】
的士佬之所以乞人憎，其中一個原因就係講嘢太直，對客人嘅不滿往往直言不諱。問題係，即使錯在乘客，正常人都唔會鍾意被人話，更加唔會認錯。被的士佬鬧完一輪之後，只會得出的士佬好乞人憎嘅結論，唔通會反省咩。所以除非個客好乞人憎，否則可以考慮用另一個講法處理。各位司機大佬，以下係一啲例子，要對客嘅打工仔，都值得一看。
1.短程
在一輪等待之後接到短程，就好似重注買馬然後唔中，唔會有人想。但記住係自己決定買，而且派咗彩，怨都無用。言歸正傳，上咗短程客我建議咁講：「唔緊要，有咩問題，長短都要去㗎啦，係呀係呀，梗係無問題啦，仲好歡迎添呀，快上快落。唉，啲師傅睇唔開啫，我覺得幾好丫，仲好多客見短程畀多啲添呀，多數唔駛找，所以做短程我真係無乜所謂。」通常咁講完，真係唔洗找，好過無啦，乘客又開心。
2.禁區落客
對駕駛人士嘅常識，可能係乘客嘅冷知識，佢地唔會識分禁唔禁區，只會覺得的士佬玩緊佢，所以我建議咁講：「呢度？呢度唔落得㗎，我都想畀你呢度落呀，落完又多客，但係啲差佬好狗㗎，會匿埋捕我地㗎。你唔知呀？而家仲會捉你過馬路、搭車唔戴安全帶㗎，你一個女人仔實恰你㗎。同埋呢度停，後面啲盲毛一個唔為意撞埋嚟，我無事呀，你斷腳咋，我兜你去嗰度啦，安全啲呀。」同乘客企喺同一陣線，講到嚟都搵到位落車啦。其餘cut雙白、不准調頭位調頭、不准左轉位左轉都可以用同樣手法處理，加啲交通意外死亡事例就更好。
3.500找續
我知法例規定我地唔洗找，不過遇到都係麻煩，仲要到咗先知，無得唔處理。「500？唉死喇，我啱啱畀個客找咗我啲散紙wo，我通常都預多㗎，但真係無咁多錢帶出街。嗱，我載你去嗰度唱啦，唔唱？都得，我畀哂啲一蚊兩蚊五蚊你都得，驚你太重咋。根本銀行櫃員機就唔應該出500/1000啦，都唔方便，搵我地啲小市民嚟搞嘅。」咁多數講完就忽然有散紙畀，好神奇。
4.行紅隧
其實好多人都唔想行紅隧，只係乘客唔明白情況有幾壞，分析完多數都ok。「行紅隧呀？我ok呀，咪又係咁做，你趕唔趕時間先？行西隧就半個鐘，行紅隧就一個鐘，急屎就麻煩喇，哈哈。你睇吓有無時間慢慢塞啦，或者我地去附近地鐵站、過海巴士站？我真係照行ok，驚你趕啫，呢啲路中途唔可以落車㗎。」最緊要強調自己行紅隧係無問題同樂意，純粹擔心乘客趕時間，行到一半仲可以補一補飛：「我都唔想畀隧道公司賺㗎，勁狗囉咁鬼貴，政府又唔做嘢，先搞到咁多人唔想過海，塞車你地都灰啦，坐喺度睇住個錶跳又唔行又落唔到車，唯有行西隧啦。」說之以理，好多乘客都接受，硬係要行紅隧嘅，可以遵守交通規則，唔好推左劈右，咁佢地就會明白個情況係幾咁差，下次就會作出明智嘅取捨，咁對司機乘客都好。呢個真係真心話，塞紅隧完全係雙輸局面，做司機有責任分析同推介更好方案，而非拒載。
5.嫌車廂臭
車廂臭唔臭真係見仁見智，唔可以怪哂乘客。「臭呀？我都覺呀，我地開一開窗好唔好？之前個大陸佬囉，成身汗又煙味，攻到我都同化咗。佢頭先坐你呢個位㗎，你坐另一面啦，係呀，唔好坐嗰度。」或者賴上更：「係啦，個衰早更成日喺部車食煙，呢，呢啲煙全部都係佢㗎，叫極都唔聽，我都無佢辦法。食煙啲人無公德心上嚟真係好乞人憎㗎。」sorry親愛的拍更，借來做擋戰牌。重點係轉移目標，一齊攻擊，咁就無乜問題。
好似有啲長，講住咁多先。如果有其他情況唔知點解決，留言再研究一下。簡單啲嚟講，就係同客人企喺同一陣線，所謂以客為本，最好再豎立一個稻草人，一個不在場嘅偽攻擊對象，咁成件事就好理想，自己都舒服啲。落咗客，點插都得啦，不過如果個客真係太乞人憎，我都同意直斥其非嘅，個個客都唔同，自己判斷點做最好囉。咁做好虛偽咩？係虛偽㗎喇，服務業係咁㗎啦，唔止揸的士，其他行業都一樣。好似叫雞咁，我估個個都讚你靚仔有型碌嘢又粗又勁㗎啦，唔通笑你短咩，係咪先？
#lazytaxi
#的士
#taxi
#我的你的紅的
