Come on James：（人哋）被炒記之德意志銀行大屠殺（下）
（上集在此： http://bit.ly/2l7DIR1）
寫完篇文，先醒起有個舊同事都在袋住。算唔算熟？應該唔算，因為我寫完篇文先醒起。所以亦都冇去研究佢係生係死。但又畢竟我都仲有佢聯絡方法（冇轉的話），所以又未算完全唔熟，後來都好似撞過一兩次，大家點下頭，問候一下，然後已經唔知講乜好。
但講真，少擔心啦，係架，畀人炒係好慘的。但，投行員工，呢啲畸屎，點都賠返三五七個月糧起碼，甚至可能賠夠一年。袋住啲友，一個月搵嘅人工可能已經係你一年，即係佢畀人炒一次，等於你返十年八年工。聽到呢度你就唔覺得要擔心佢啦，係咪？正如你唔會擔心違約金獵人（摩連奴？）幾年畀人炒一次。我有位朋友，就真係勁過盧博士（你懂的），去邊間爆邊間，真係幾年都收一次安家費，一次等於普通打工仔做三五七年工。
固然，由奢入儉難，搵開咁嘅人工，再節儉，都會洗返咁上下錢，就不可能返去拎最低工資嘅日子。但雖然有啲人話痛苦好主觀，我都同意，但始終，拎咁高人工，畀人炒咗，都係好難有人同情的。何況，你仲拎住人地幾年人工走喎（我冇呀下）。
特別提我呢個同事，因為當日我畀人炒，佢都仲請我食飯。都有啲意外，因為真係唔係好熟。但真係人情冷暖世態炎涼啦。我亦師亦父嘅老馮，一早就請咗我食飯，相熟啲同事都有。但去到嗰日，請我食咖喱嘅，就係呢個唔係太相熟嘅同事。講真，我唔覺得我有乜利用價值。可見雖則佢平時雖則火爆暴怒（我諗我已經幾客氣），但工作外都真係個普通女人啫。係呀，女的。
所以特別寫呢段後記。但真係唔使點擔心嗰啲員工，佢地慣的了。有冇睇過《魔球》（Money Ball）套戲？好戲，好書，但我想講係呢幕 （http://bit.ly/2l5fYwS）
（編劇嘅正係Aaron Sorkin，多次提過佢，The Social Network, Steve Jobs , 仲有Newsroom都係佢編劇）
畢彼特演嘅主角，教炒人，同助手玩角分扮演，叫佢示範一次。助手明顯冇經驗，難以開口，結果畢彼特還擊（我啱啱買咗樓！我細路啱啱入學！），佢就冇聲出。畢彼特示範返正確做法：呢堆係專業球員，搵咁Q高人工，佢地第一日已經知個遊戲點玩。唔使咁多廢話，直接講，大家明白，just business，nothing personal。助手之後照用，你望下，個球員，有冇搞到又喊晒咁？梗冇，因為，你估佢冇錢開飯咩（如果真係冇，就係自己理財不善）。他日你要炒人，都留意呢樣嘢，唔好陷入泥沼，唔好玩感情，正面負面都唔好，就事實，get the job done．
呀，最後講埋，耆英當然冇賠好多畀我。都係跟足勞工法例，再酌量多少少，意思意思。但，當時我已經係RO（RO嘛，理論上係孭鑊位，但要孭嘅唔使做RO都有得孭，要冇事嘅亦都好多RO冇事。最有用就係：唔夠RO你開唔到檔，好似藥房要有藥劑師咁）。三個月通知，提早解約咪賠三個月。另外仲有嗰個月未出糧嘅糧。另外仲有積埋嘅假（唔多，留意當時係2月咋下，按比例的)，仲有遣散費。
都真係唔少錢，幾爽的
直到月尾供樓！
係喎，當其時其實買咗樓冇耐，真濕滯。但係咪好驚？都唔係真係好驚。李嘉誠教大家要乜？要量力而為嘛。畀人炒嗰一刻，我應該儲埋可以食三五七年嘅穀種（視乎點食）。一早叫你儲錢架啦。都仲未計囡囡仲有返工（係喎，結婚冇耐，真係恭喜），可以食軟飯，如有必要。
而結果呢，個幾月後我已經返咗新工。人工當然減咗，但，好感激，因為仲要係高人幫我安排。好似你睇黑社會片（槍火？）咁，有人畀張卡片我，同我講：「你去見呢個人啦，你話我介紹，佢會幫到你」。（OK，張相係無間道2，但你明我意思）
就係咁，2月18號被炒，4 月頭我已經返咗新工。中途勉強快手去咗次老撾，畢竟高人介紹，唔想拖人太耐（其實我幾乎想睇埋世界盃先返工。拿，2014年呀下）。
記得初入行時睇陶冬寫書，佢有講，他日佢離開呢個行業呢。第一件事就係掉撚咗部手機（佢冇講過撚字），然後訓返七七四十九日。
我在耆英8年，再之前教過書，做過蕉行，全部都係工接工。亦即係由2002年我開始教書，到2014年我被炒，中間冇乜點放過長假。我指真係段月計嗰啲。即使2014年呢次都只係一個月多啲。
直到2018年9月我離開星展。
但不幸地，呢個訓返七七四十九日，都係冇出現到。人在江湖嘛。你見我日日都寫文。呢度就另一個故事了。適當時機自然會解封。講過啦，太近嘅故事我唔想寫，費事影響人。
— — — — — — — — — — — — — — — — — — — — — — — —
BTW，當年我都見過袋住。講緊係做咗耆英之後，入行做分析員後，唔係當年啲咩煙腸青衣之類，我呢啲撈高大學二級榮譽乙等嘅友點會有呢啲嘢。
當然最後冇請我，但我想講，真係有個門檻的。嗰時，我見過最接近「大行」嘅，就係袋住。至於咩金人摩緊嘅真正一線行，真係波皮都未摸到，煙都冇得煙，見下HR或者尊尼亞都冇。可見都真係竹門對竹門。有啲人就係永世踢唔到大會。
而正如活地亞倫話頭， I’d never join a club that would allow a person like me to become a member．由袋住會見我，就可想而知間嘢都幾冇眼光，由當時就見到日後嘅問題。
講笑啫，星展夠請我啦，東南亞第一大市值企業呀大佬，股價很堅挺的說，不過唔關我事。
又，雖然有人覺得都一樣，執著於呢啲你飛我定我飛你無謂。但我都係要強調，真係唔同，在星展我係自己辭職的，仲係裸辭，並冇人迫我走或乜。當然我上司不見得好滿意我，但亦肯定冇明示暗示我走或乜。我話走時佢都有啲意外，但當然亦都完全冇打算挽留我，咁就證明我在佢心中有幾重要。適當時講多啲，我亦唔使特登扮大方，簡單一句，佢唔信我，我亦唔信佢，就冇乜可以再傾落去的。
———————————————————————————
都係嗰句，人貴自知。我其實只係掂過袋住嘅袋皮，都要拎嚟講一輪，證明都係唔多掂—而因為真正大行連波皮都揩唔到嘛！所以而家搞到好似喻可欣咁，唯有靠爆下劉德華搵食。但始終喻可欣聲稱劉德華嘅初夜畀咗佢，我就當然喻可欣都不如了，人地拮都冇拮過我。
但，唔緊要，自知就得。好多人真係做過喻可欣，甚至做埋劉德華。但真大行分析員，又未必有時間好似我咁寫呢啲故事啦。就算有時間，又未必肯爆咁多嘢你知。就算有時間又肯，都未必有我寫得咁.......到肉嘛
上星期在果燃台（我一路以為係果撚台），開過個30分鐘嘅討論（http://bit.ly/2l7E2iH），講大家關嘅各種大行分析員問題。例如點入行，搵幾多，係咪好易畀人炒之類（而冇人理係做乜的）。肯定30分鐘唔夠喉，下篇文就試下整個訪問自己。Stay tuned
喻可欣近照 在 爆笑娛樂公社- 53歲喻可欣和52歲朱麗倩近照，差距巨大， 網友 的美食出口停車場
53歲喻可欣和52歲朱麗倩近照，差距巨大， 網友：劉德華眼光真好！ ... <看更多>