的確，葉朗程很喜歡Ms Yu，私下會提起佢。佢地應該係同一個世代的人，有共通的時代語言
身邊唔少從事金融業嘅朋友，可想而知，每當佢地見到我個 page 出現喺葉朗程個 page，會有幾雀躍：cap圖嘅cap圖、抽水嘅抽水、嘲笑嘅嘲笑，百花齊放，令我充份感受到言論自由嘅可貴。然後緊隨有一系列 #喂阿哥點解覺得我會知 嘅問題，我極其量可以帶住頭盔答到半題：「我諗佢應該真係一個男人啦，齋睇佢寫字語氣，應該係正常偏賤叻唔切嗰種掛？」
早幾個禮拜同幾位朋友飲嘢，碰杯後其中一位話第一次見 po，感覺好似睇睇吓 Captain America，Sound of Music 嘅 Maria 突然帶住班小朋友入鏡唱首 Do-Re-Mi 一樣。
我都覺得呢次亂入確係幾有趣，但想回帶去 Captain America 嗰句先。
即係咁，Ms Yu：Sound of Music，都明，起碼叫做有少量共通 hashtags，如 #老師 #音樂 #小孩 #唱歌
但身為一個每次見到 Chris Evans 前面後面左面右面都會缺氧&心心眼嘅港女嚟講，拒絕認同有一名港男可以媲美顏值、機能、智能爆錶嘅超級英雄係合情合理嘅。
於是我加點意見，可唔可以係《仙樂飄飄處處聞》crossover 《華爾街狼人》或者《精裝追女仔》？Wolf of Wall Street 啊？勉勉強強啦。精裝追女仔關咩事啊？妖係咪玩嘢？而家講緊葉神啊！
噢，即係 IFC 張智霖嘅英雄指數係超越 DiCaprio 同周潤發嘅。
本來想澄清返，我其實係想用兩套戲入面 Jonah Hill 同馮淬帆飾演嘅兩個小人物打個比喻，但見到大家攞住杯靚靚 cocktail 你一句我一句咁講返啲葉神蹟，我就提醒自己 Happy Hour 啫，唔好再掃大家興，Cheers～
絕對無意貶低男神，小人物自有小人物嘅價值。
大家都好明白，乜乜時勢造英雄係嘥氣嘅，古今中外無人見過咩英雄喺災難降臨時，轟一聲撲出嚟為大家托住個地球瞬間化險為夷。你睇氣候問題搞到一鑊粥就係例子。但人類依然無氣餒，正正因為身邊有好多值得珍惜嘅小人物。
細個時人人都崇拜英雄偶像，渴望自己有一日可以好似佢地咁拯救世界。到世界變大、天真不再，就發現即使自己幾叻幾掂，都不過係一個小角色。依然仰慕英雄人物，但其實內心已經變咗節，寧願做一個稱職嘅小人物，譬如蝙蝠俠隔離個羅賓，或者叮噹身邊嘅大雄。
細心一諗，自己究竟係因為叮噹而鍾意《叮噹》定其實係因為大雄而鍾意叮噹，就知道小人物份量一樣舉足輕重。因為微小，所以先可以鑽入人心留低腳印，好似 Antman 咁。
生於大時代，你我都係小人物，不求驚濤駭浪，只望細水長流。飾演小角色又何妨？能夠扮演好自己角色直到最後已經係不枉此行。環顧身邊好多同自己萍水相逢嘅人物，即使英雄指數係零，到最後都會成為生命中不可或缺嘅經典角色。
