好少可會響呢度講網台嘢，但基於都有小貓幾隻問我幾時會做番網台節目，所以特別響度宣佈：由今個星期開始，小弟成功R倒啤梨哥同鱷魚兄比個機會，等我逢星期四下午六點至八點可以上《啤梨晚報》學下嘢。
落腳《啤梨晚報》其實都有三個原因：第一原因當然係佢地肯收留我──之餘仲可以同番林匡正呢條友做番拍檔。其實當初都有諗過同SOHO開節目，問題係呢條友仔要全力搞選舉，睇個款呢兩個月都係超忙，所以唯有揀番前者。所以無需要用咩人事關係或者政治立場去猜度我點解會去MIHK，同邊個人夾得開心先係最重要考慮。
不過講到我同啤梨哥嘅合作機會，我諗就未講得實，因為我應該係介乎拍檔同替工之間，我上果日都未知佢會唔會響度，不過呢兩個月都至少會有幾次一齊做節目炒下氣氛。詳細情況到時會再同大家報告。
第二個原因就係其實今次想開咪講嘢，主要都係想講香港選舉，所以我只暫時應承由八月開始至九月為止，所以除咗啤梨晚報，我亦會同林匡正額外開一個以選舉為主題嘅一小時節目，暫定會響星期六直播（連名都未諗），詳情又係等我問清楚再同大家匯報。
至於第三個原因，當然就係鱷魚比咗一個條件好好，難以推卻嘅Offer比我：講真，無論你咩立場，不能否認嘅係，做網台其實就係義工，好彩嘅搭車食飯有人同你幫補下，唔好彩就自己嘔突：咁好幸運同謎米到而家，都遇倒好好嘅台長同埋老闆／金主。不過我響某兩個條件下，我係會「嘔」番哂出黎派比大家（可能嘔突），詳情亦可以等遲d響節目公佈。
當然大家要明白，啤梨晚報始終係一個艱苦經營嘅網台，所以難免要靠收費經營。以我所知成個八月《啤梨晚報》都會免費直播，但重溫就要收每月$58；而九月就無論直播定重溫都要收月費$58。我當然希望會有一個平啲嘅價錢齋聽直播，又或者響我比較得閒嘅八月爭取做多一日《啤梨晚報》同大家見多啲面。不過我始終過門都係客，啱啱入門打擾都係唔好咁多意見。而家我可以講嘅就只有：呢兩個月希望大家多多支持啤梨晚報，可以嘅話最好比錢訂閱埋（不過錢唔係直接落我袋），等佢地唔駛因為請我而蝕錢~_~。
直播link：http://www.mihk.tv/barry/
記住係到時直播先有嘢睇……
