雖然係有啲長，但有時間請睇下，對自己或家人朋友，日後遇到相同事件，亦可作參考：
起因：
https://www.facebook.com/jessicaleungmakeup/posts/1526262294103378
住左三晚醫院，專科醫生再三提醒我嘅「頸椎間盤」問題唔輕，手術係必須。但其實頸椎嘅手術並唔係小手術，頸椎附近神經線、淋巴腺…等等眾多，有少少嘅閃失都可以影響極大! 嚴重嘅可能至癱!!! 身邊朋友都紛紛提供中醫、針灸師、脊醫、物理治療師…等等嘅資料俾我，基本上係無人建議我做手術，而老實講，我自己都心中有數，唔到最後一步，都唔會考慮做手術。
入院第一日情況係最嚴重，雙手完全麻痺，手都洗唔到，輕輕接觸都會好痛，醫生話神經痛比較難預計，有啲人可能幾日就慢慢消退，有啲人可能要幾個月。而神經痛嘅藥亦唔係可以即時止痛，只係輔助性。但我第二日、第三日雙手嘅痛楚&麻痺感都有逐啲逐啲嘅明顯減退。醫生雖然都要我繼續瞓床休息，但其實喺醫院又係瞓，返屋企都係瞓，咁我就要求醫生俾我出院返屋企瞓啦。而最主要係，其實我想快啲出院，去睇中醫&針灸!!!
一出院就去左睇一個朋友介紹嘅中醫，朋友幾年前「腰椎間盤突出」引致雙腿麻痺，瞓左成個月醫院都行唔到，當時西醫專科醫生堅持要佢做手術，但佢當然唔想啦，但又苦無對策，終於有另一位醫生朋友介紹佢去睇一個中醫，朋友當時堅持出院，醫生話佢出院有機會令情況惡化，至失禁及下半身癱瘓，但佢都堅持出院。去到呢位中醫度，幫佢做左針灸、啪骨及一啲推拿，佢雙腿已可落地，行到!! 當然唔係神到即刻乜事都冇啦，但瞓左成個月醫院，終於可以落到地已經係好神奇嘅進步啦!! 慢慢睇多一排，朋友無需做手術已經完全康復。
咁我出院都第一時間去睇左呢位中醫，醫生睇左我嘅MRI片，再觸診確認後，就立即幫我施針(梅花針~放血)，我覺得一啲都唔痛，只係有啲興興哋，但聽醫生講好多病人都會痛到呱呱叫，之後醫生再幫我啪骨，包括腰、頸、手，只要放鬆，眨下眼就搞掂，最後就有幾分鐘類似推拿嘅動作。其實啪完嗰幾下，已覺筋骨立即舒緩左，不過我最辛苦嘅並唔係頸、腰椎嘅酸軟痛，而係對手嘅神經痛，不過睇中醫並唔係一朝一夕嘅事，相信都要俾啲時間。
到左第二日，雙手麻痺痛仍然冇乜好轉，我突然諗返起幾年前睇過嘅一位「自然療法」醫師，如果有睇開我facebook應該都記得我有一輪雙手經常都要睇跌打，又去刮痧又拍打，而其實後來我有去睇過呢個自然療法醫師，跟住我自己亦接少啲較辛苦嘅jobs，雙手就逐漸好返。
呢位「自然療法」醫師嘅concept係，骨骼移位啪骨係無乜用嘅，因為啪骨只係治標，啪完嗰下啲位置啱左，但如果本身啲肌肉都唔夠力，郁兩郁，啲動作/肌肉就會又推返歪啲骨，所以佢會對症下藥，邊一部份骨骼移位，就增強返有關位置嘅肌肉。
去到診所，醫師首先都係問診，跟住就觸診，然後就會大致講下佢嘅理念，之後會教一連串嘅動作，每個人睇都可能會教唔同嘅動作，啲動作其實非常簡單，但款式可能比較多，我無記性，自己就會用電話拍低短片，返屋企跟住做。禽晚瞓覺前做左一連串動作，用左只係差不多二十分鐘唔夠，完全唔辛苦，少少汗都唔會流，每個動作只係做八下，醫師話唔可以做太多，每日一次，每次每動作八下左右就夠，做太多反而會勞損，鍛鍊返啲肌肉，等啲肌肉知道點樣行，唔好走錯位就OK。到今朝起身，竟然有前日做完運動，瞓醒有少少肌肉酸痛嘅感覺，唔係好強烈，但總之就好似去游左個水，打左場羽毛球，第二日瞓醒嗰種感覺啦，但其實我做嗰一系列動作時係少少都唔覺我係做緊運動咁喎，只係好輕微咁郁下咋喎~~~
瞓醒大概兩小時後，左手嘅痺痛突然放鬆左，之前一直係拉扯住嘅痺痛，就好似條筋扭埋一個結咁，但突然個結鬆開左，淨返嘅係少少好似肌肉發炎嘅痛感，但已經舒服好多，因為再冇扯住嘅感覺，鬆左好多。再過多兩個鐘左右，肌肉發炎嘅腫痛感都減少左七八成!!!真係好神奇!!!
我出院後keep住有食專科醫生嘅神經藥，睇左一次中醫針灸，睇左一次自然療法。而我暫時會選擇繼續食專科醫生嘅神經藥 + 自然療法，及每日做自然療法醫師教我嘅動作。
但究竟係邊一樣野令到我突然好返咁多呢?天曉得!!! 之後繼續再update各位!
##大家唔洗擔心，因為我用倉頡，我打字其實好快，而且用電腦鍵盤打，唔係用手機打。呢篇野我亦分開左幾次打，每次都俾30分鐘左右自己休息下。以後都要更愛錫自己身體lol。
##各人身體狀況不同，究竟信西醫好呢? 抑或信中醫好呢? 應該自己親身感受下，唔係人講就信，而且醫生都係人夾人，我睇得好亦未必個個同我一樣效果。不過當要面對嘅唔係普通傷風感冒，而係一啲要動刀嘅手術或者一啲比較手尾長嘅病痛，最好都係consult多於一位醫生，唔好太快作決定會好啲。
各人身體狀況不同 在 【和順健康資訊】涼冷氣、飲凍嘢隨時變潺仔 ... - Facebook 的美食出口停車場
原來呢啲習慣好容易降低人體扺抗力，甚至令你變成虛寒體質。 想知道乜嘢係「冷氣病」？ ... 由於 各人身體狀況不同 ，如欲就個人體質及身體狀況進 ... <看更多>