《詭探前傳》進入三師弟劇情
第三集和第四集，詭探前傳終於進入三師兄弟，阿忠、阿伯(八爺)同阿全的劇情，小子成長戲，友情、團結、學習和勝利的黃金橋格局，暫時來說，只有司馬至全有較多描寫，阿忠同阿伯還未夠深刻，阿伯這角色自學茅山，應該負責搞笑，最容易跑出，不過陳安立的喜劇感和節奏，還是要磨練下，和《詭探》那成年的三師兄比較，年輕的三位暫時性格上未夠鮮明，希望故事發展下去會好些，大老孝那三位師兄弟，外型已經睇到性格分別，這個真的很難要求新的三位做到，非戰之罪。
成套劇目前最好睇是「鬼成」。自從陶大宇從良變成「師奶殺手」後，好少見到佢做番奸角，這次他做「鬼成」，囂張臭寸，即時覺得丁益蟹回來了，反而好有新鮮感。用煲滾中藥淥人「小弟」一幕，好反映佢夠心狠手辣，可惜那受害人令人感覺唔夠痛，男人最痛喎，一定會痛到瘋狂掙扎啦，第三、四集左陶大宇，真係悶左。
秋官做的彭百川，受角色的正氣所限，無鬼成咁突出，仍然係好睇(純因為版主愛睇秋官😅)。致於第七行動組隊長John Carter，憑似Ironman主角成名，演技上真是似著齊機甲的Ironman，不論捉鬼同查案，都是一個表情，見唔到變化，果然係超級英雄。製作上和劇本上是好過上輯，不過論到詭異氣氛，鬼節＋寃鬼(B仔)復仇＋搗亂戲班等等的整體氣氛做得未夠好，無乜心寒驚嚇感。今晚呢個故事應該完，希望有啲高潮啦！
#ViuTV #詭探前傳 #鄭少秋 #陶大宇 #EricKwok #游學修 #麥子樂 #陳安立 #江若琳
