《肥冬的少男時代》
「你記唔記得上年我地去睇古巨基個音樂會？」
「嗯……？」
「其實我以前並唔鍾意古巨基。」
上年，古巨基告別我的戀人們音樂會。我好興高采烈咁拉左呀雪去睇。
我問佢，佢平時有無聽開古巨基，佢答我佢一路都好鍾意。
原來…係想要迎合我。
「係……係呀？」我發現我咩都講唔出。唔知點解我有一種好負面既感覺係心入面。
「你記唔記得，係果一日，我地講過咩啊？」
－－－－－－－－－－－－－－－－－－－－－－－－－－
「哇肥雪，今次真係好好睇呀，基仔唱到喊，今次成隻碟都好正好正呀！」
「係囉，估唔到基仔唱得好有感情，咁好聽呀！」呀雪睇落都好享受岩岩既音樂會。
「妳唔係聽開架咩～佢次次都係咁好聽架！」
「咁…咁今次特別好聽丫嘛…」肥妹仔都識面紅。
「唉真係好正，請曬堆前女朋友去聽自己音樂會，對住佢地唱自己有幾掛住佢地。跟住佢現任同埋前女友既老公男友仲要在場，癡線既。」
「乜愛情真係有咁大威力咩…？」
「係掛，我又未拍過拖我點知呀。」我望住個天，一早已經黑得唔能夠再黑。
「咁你…你想唔想試下拍拖？」唔知點解肥妹既語氣怪怪地咁
「想，邊會唔想呀！不過妳睇我個款都知我係有單身症候群，邊有人鍾意呀。」我笑左一笑。
「唔好講到咁肯定啦，或者…都有人鍾意你都未定呢？」
「扯，我自己知自己事啦！做咩啊肥雪想拍拖咩？」
「想架，如果而家搵個人同我表白，我即刻同佢拍拖添呀！」肥雪真係搞笑。
「夜媽媽係邊度搵條友同妳表白呀～～話說啦，妳唔係鍾意果個咩俊架咩？」
「佢係幾靚仔同幾好人既…但係…」
我聽唔到佢講咩野但係，就打斷左佢。
「咁妳仲唔減個靚肥去追佢？！上啦等咩姐。」我真係吹水吹到無人有。
「肥冬！我而家好肥咩！！！」佢啤住我。
「嘿嘿，少少咁啦，臉肥左少少，手腳又肥左少少，腰又肥左少少咁囉～～」我就當然要笑下佢啦。
其實肥妹仔都唔算係太肥。
「打死你呀！」
「妳副眼鏡就快大過妳塊臉喇，仲有呀好心妳就full下mask啦，如果唔係果個咩咩俊會嚇親架。」
當然我係用緊一種完全開玩笑既語氣同佢講啦。
「肥冬你好鍾意靚女架咩？」
「傻架咩，邊個唔鍾意靚女，幾養眼，聽講話望多Ｄ靚女會長命呀！」
「係咩………」唔知點解佢好似無咩心機咁。
「肥妹雪，睇怕我都會孤獨終老架喇，不如咁啦，如果第時過左四十歲妳都無人要，我地結婚啦。」
「肥仔冬你而家咒我無人要呀？！！」
「嘿……對唔住囉對唔住囉，唔結囉唔結囉好未。」我偷笑。
「如果真係有咁既一日…咁你就儲定老婆本喇，四十歲仲有排，你可以慢慢儲架。」肥妹無啦啦笑曬咁望住我。
「頂妳個肥妹唔係諗住直接等到四十歲食我副身家下話？」
「肥冬叫左你咪鬼再咒我呀！你有幾多身家比我食姐～～睇死你四十歲都係窮人！！」
「哈哈咁咪好囉，到時我四十歲就食妳既軟飯等妳養埋我。」
「哼！」
－－－－－－－－－－－－－－－－－－－－－－－－－－
從上年既回憶番番黎，原來果陣時呀雪比左不下三次暗示，而我都不下三次忽視左佢既暗視。
而且我果陣仲要滿口都係話佢肥同唔靚女，再提起呀俊黎抽佢水。
如果我果陣時一早知，如果我果一日同佢講我鍾意佢，如果……
可惜沒如果。
「你知唔知我真係有諗過去到四十歲就可以嫁比你。」
「……」
「自從果一日之後，我不停咁諗方法去變靚變瘦。」
「……」
「最後我成功左，番到學校我問你我靚唔靚既時候，你知唔知你話靚，我真係好開心好開心。」
「……」
「當你提起話我係因為呀俊而減肥變靚女，我無否認。因為我知你唔會信我係因為你。」
「……」
「甚至我有時係你面前提起呀俊，其實我係想聽到你一句叫我唔好接近佢既說話。」
「……」
「跟住呢一個月，我發現我同你愈走愈遠。當你暈左果一日，我去左買止痛貼比你，但係當我係醫療室既門口睇到鍾智汶扶住左你既時候，我發覺自己無行上前既勇氣。而當我果個星期五空堂，想同你好似以前咁去圖書館睇火影既時候，我睇住你偷偷地拎住書包，同馬家晞一齊離開左學校。甚至我行左上前，幫你拖延住果個係洗手間出黎既校工。」
原來……原來果日佢無去到音樂室活動，咩野呀俊唱歌彈結他好撚勁，全部只係用黎圓謊。
而當我同第二個逃學去唱Ｋ開心既時候，係因為呀雪，我先無比人捉到。
屌！
「妳…妳點解唔同我講……」呢條真係我唯一既問題。
「我怕。怕講左之後，以後我地就唔可以好似以前咁。」
「……」
「每次當我見到你係度同我講應該點點點追呀俊，應該同佢去邊度做咩野既時候。我都覺得個心好似比針吉咁。就連我地暑假前講好左要睇既果套戲，你都完全唔在乎咁叫我去同呀俊睇。我曾經以為我變靚左變瘦左，你就會發現一直係你身邊既我，其實都好好，都可以係拍拖既對象。但當你一步一步推我向呀俊果面既時候，我先發覺原來呢幾年黎我一直都係發緊夢，一個唔屬於我既夢。」
原來我，曾經係佢既夢。
「……」一直只係佢講野，其實我都好想而家就直接出聲講我鍾意佢，但係理智在叫著冷靜冷靜。
「我唔鍾意而家既你！我唔鍾意你忽然間身邊全部都係其他女仔。我唔鍾意你變瘦變靚仔。因為呢一個幾月我發現我唔能夠再做你身邊唯一既女仔。我曾經有諗過，如果你無變瘦變靚仔幾好。」呀雪居然講到喊。
其實我都有諗過，如果妳無變女神，有幾好？
「其實我……」
「三年以黎，我有主動過，有被動過。上年既時候我想直接同你講我鍾意你。但係你同我講你鍾意靚既女仔，所以我一個字都講唔出口。肥冬你真係好膚淺，但係我又好似著左魔咁跟住你既膚淺去改變我自己，但係去到今時今日，我先知道你根本就從來都無鍾意過我，所有咩野四十歲就一齊，全部都係戲言，係講笑。你只係當我係你最好既朋友，那怕岩岩我同你講呀俊同我表白，你第一時間都係叫我接受佢。其實有時我會諗，你係咪唔鍾意我係你身邊？呢一個月黎，我同你傾計既時候，你好似總係有一種唔想回應我既感覺。或者我係咪唔應該咁樣落去。」
「……我……我都鍾意妳…」我鼓起左我最大勇氣講出呢一句說話。
「太遲喇，肥冬。咁你話比我知，你又有無鍾意其他女仔？」
「………」我沉默，而呀雪笑緊。
「呀俊對我好好，我都慢慢對佢愈來愈有好感，我想嘗試一下。」
「真…真係？」
「肥冬你而家咁鬼花心，做你女朋友咪好慘囉！」點解佢笑緊，但係我唔覺得佢有任何笑意？
「係…係呀？」我到底做緊咩野？
「其實我只係想係自己拍第一次拖之前，放低一個自己鍾意左好耐既人。好想好坦白咁同你講我一路想講既野。」
「係……係咩…」
「從今日開始我同你就會係真真正正既好朋友，好唔好？到時我四十歲無人要既話都會搵你架，知唔知呀肥仔冬！好喇，有車黎喇，今次我唔同你一齊搭喇…你上車先啦。」
「嗯。」
今次係幾年來，我同呀雪咁多次一齊放學，最難忘既一次。
===============================================
唔知呢度有無人同我一樣等緊肥冬打埋落去？
如果有，咁我就可以話比大家知，佢好快會再打！
而且佢仲會自己唱主題曲，敬請期待！
想聽肥冬把聲就要留意喇！
（唉身為老友宣傳宣到咁嘅地步，點都值一餐放題掛？）
http://www.youtube.com/watch?v=ZGe92xSnZBc
