打橫嚟講：恥與「說三道四」為伍
老老實實，唔係香港無人才，只不過，有思想、有識見的精英分子，面對香港這個廢柴政府的騎呢同事，就算搵槍指住魂井（讀ZENG音），打死都唔肯同流合污囉！吖！正確的講法，應係「恥與為伍」！
嗱！先有囤地局長劏房波厚顏死不認錯，已夠齒冷啦！大家知你衰格嘞！好心你做好份工，博番少少同情分啦！唉！點知唔熟書，畀「同事」跣，放流料，「提供資料」話香港土地有七成係郊野農地，證明佢讀稿都唔用腦，喂！點叫人同你合作呀！低B仔！
另一件，即使伙記畀足料，佢都有本事讀錯，兼一Pat屎咁，要人同佢執手尾的廢中廢，就係中學生都打沉佢嘅吳得掂教育局窩囊！喂！北區幼稚園學額咁嘅小事，你也能搞到成為「政治風波」。叫你宣告「一人一位」新措施嘅「統一登記日」，平息雙非暴動，佢老哥竟又睇住貓紙噏為「臨時註冊日」，再惹禍端，搞到下屬連開兩個記招澄清，咁弱能嘅垃圾，收幾百萬年薪，點搞呀！
真係有若另一粉皮卡片蘇話齋的「一次性接觸」！講起此無知無能無心的另一得主，喺APEC部長級會議後表示，菲律賓方面願意與港人苦主作「一次性接觸」，哦！咁你自己去「中出會」（中華出入口商會）試吓「一次性接觸」啦！
有關用詞不當的賤精，又怎及前白鴿黨成員，那一人獻身入局的公關公司董事那白癡仔。香港廢柴政府新聞專員一職懸空兩個多月，今有人自我放風，話做硬「白宮發言人」喎！點知，消息一出，全城插爆，話呢條粉腸，只得三個字：「說三」變成「道四」！
有說熱廚房難請人，查實，垃圾崗幾臭，都會有好多烏蠅飛埋去的！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
