【我是住在香港的外國人】
噚日因事分別去咗大窩口同青衣，喺前者嘅便利店有個女人衝出嚟打尖，我同個後生仔店員都擰晒頭，個女人用普通話話要買電話卡，期間仲好大聲同店外兩位同鄉講嘢，類似唱「妹妹你坐船頭」嗰啲雄厚聲線，震懾整間便利店。
然後喺青衣買嘢食，前面3個人幾乎想買晒全店食物，所以後面嘅人都等咗好耐，唔使估，因為好大聲講普通話，佢哋買嘢期間又係用「妹妹你坐船頭」嗰啲力拔山兮氣蓋世音波，向坐喺好遠嘅同鄉詢問使唔使加嘢。
須知道呢度並唔係尖沙咀銅鑼灣，喺大窩口同青衣冇LV、Gucci同埋Chanel買，但我仍然喺呢兩個區聽到好正宗嘅普通話。
你哋係咪覺得我公司日常用英文溝通呀？以前係嘅，而家我身邊嘅同事都係講普通話，我必須要強調一點，呢班普通話同事係好人嚟，佢哋對我非常友善，問題只係我唔習慣，一個香港人，喺香港做緊嘢，然後耳邊盡是普通話，嗰種感覺有啲穿越時空同埋國度，覺得自己唔係身處香港。
我身邊呢班普通話同事好叻，做嘢有一種狠勁，將公司其他鬼佬、講英文嘞嘞聲嘅經理，仲有最潮最In嗰班港仔港女通通比下去，因為呢班普通話同事嘅中資客係最有錢，個個財大氣粗，佢哋嘅生意亦係我哋全公司最好，得寵實至名歸，所以佢哋冇問題，問題只係我適應唔到。
離開公司返到屋企，我附近有棟超貴私人樓，我識地產商個經理，有次話:「喂，你哋啲樓終於滯銷喇？成棟樓夜晚冇人開燈既。」
佢答我:「一早賣晒啦，不過唔係香港人買之嘛，國內客買晒等收租等轉賣。」
普遍香港人買樓都係想有瓦遮頭，點解會個個都買唔起，又或者買完要捱得咁辛苦？短短兩句對話已有答案。
我其中一位朋友都有同感，所以佢話想離開香港去第二度工作，我問:「吓，你捨得香港咩？你去到咪變咗外國人囉。」
「咩捨唔捨得？香港兩個字只係一個詞語，實際上仲係香港咩？我寧願去外國成為全公司唯一嘅外人，都唔想喺土生土長嘅香港感覺到自己先係外人。」
我明，因為我活在香港，但更多時候覺得自己唔似置身香港。
圖片from : The dark knight rises
