救一個二十年前死咗嘅女人（下）
上集：https://bit.ly/2Svgzpm
我勸咗小雯好耐，佢始終都係冇勇氣離開呢段垃圾婚姻，只係想諗啲小手段逃避7月14嘅死劫。
咁多年嚟小雯都被吳大用控制，加上缺乏經濟來源，佢已經冇晒自己生活嘅信心。
我哋爭論咗成個星期，有一日，我喺日記裡面發現咗一張書籤。
我問：「點解會有張書籤？」
「咦，我張書籤唔見咗，喺你度？」原來小雯隨手夾咗張書籤落本日記度，然後書籤就嚟咗我度。
估唔到，呢本日記居然有「帶物品穿越時空」嘅能力。
我開心到彈起，我即刻拎咗幾千蚊現金，夾落日記度。
小雯收到錢，好驚訝，但依然猶豫不決。
我再搵番當年呢單凶案嘅報紙，剪咗好多張落嚟，寄畀小雯。
睇到報紙繪聲繪影咁描寫佢嘅死狀，小雯終於恐懼到極點，決定離開吳大用。
我再畀一筆錢佢，等佢可以安排租屋住。
跟住落嚟嘅日子，我哋一齊商討離婚嘅事，同埋之後嘅生活。
小雯仲叫我幫佢查，二十前嘅六合彩號碼同股票號碼，諗住賺一大筆錢，好好生活，佢變得咁積極，我都好驚喜。
但去到2020年7月10號，亦即係小雯嘅2000年7月10號，本日記消失咗。
我百份百肯定我擺咗本日記喺枱面，亦冇人入過我間屋，本日記係憑空消失。
點解會咁？唔通吳大用提早郁手，殺死小雯？但本日記都冇理由唔見㗎。
我去搵鄰居，試探「過去」係咪被改變咗。
「吳大用殺妻？邊有啲咁嘅事，係小雯自己走咗佬，後來吳大用就搬咗。」
鄰居嘆氣：「吳大用成日打老婆，小雯逃走都唔出奇，佢咁驚吳大用，咪隱姓埋名囉。」
我好驚訝：「你話過，你親眼睇住吳大用斬死小雯。」
鄰居反問：「如果我真係見過啲咁嘅事，唔通我會唔記得咩？」
我查番當年嘅新聞，果然冇咗吳大用嘅殺妻案。
至於小雯嘅失蹤，由於佢哋都唔係名人，一單普通失蹤案，報紙根本冇報導過。
假如小雯自己逃走，佢肯定會話畀我知先，亦肯定會帶埋本日記，我哋唔應該失去聯絡。
小雯到底去咗邊？
我搵私家偵探幫手，搵到吳大用依加嘅地址，佢住緊豪宅。
我忿忿不平，一個殺妻嘅男人，憑咩有咁富貴嘅生活？
對於我嘅到訪，吳大用一啲都唔驚訝，佢好平靜咁回答我嘅問題：「小雯死咗。」
我成個彈起：「我就知道你殺咗佢。」
吳大用解釋：「我係話，二十年前小雯失蹤，一直都搵唔番，七年後，法庭已經宣告佢死亡。」
我狠狠睥住吳大用：「佢冇理由會失蹤，一定係你殺咗佢。」
吳大用反問：「點解你咁肯定我會殺小雯？唔通嗰幾張剪報，就係你偽造嘅？」
剪報！原來，吳大用當年發現咗，我寄畀小雯嘅剪報。
吳大用睥番我轉頭：「有人整咗幾張假剪報，話我會斬死小雯，被判終身監禁，真係太荒唐。」
我終於估到事情嘅始末，吳大用發現小雯諗住離開佢，所以佢要殺小雯。
但呢個係一場有計劃嘅謀殺，唔再係「走廊上斬死老婆」咁衝動粗暴，於是，吳大用從容處理好小雯嘅屍體，並偽裝成失蹤。
我介入呢件事，就係令本來會被繩之以法嘅吳大用，逍遙法外？
吳大用繼續講：「不過，你畀咗六合彩同股票號碼我，令我有今日嘅富貴，我都唔知多唔多謝你好。」
我瞪大眼睛：「你發現咗本日記，之後殺咗小雯，繼續扮佢嘅字跡同我溝通，呃我畀股票號碼，然後銷毀日記！」
「我冇殺小雯。」雖然吳大用咁樣講，但從佢沾沾自喜嘅神情，我已經估到真相。
可惜，我唔知小雯嘅屍體喺邊度，事隔二十年，間屋都裝修咗幾次，咩證據都冇晒。
我忍唔住講：「你好狠心，小雯對你咁好，你係都要殺佢。」
「我平時對小雯唔係好好，但我係愛佢㗎，我唔會殺佢，但佢偏偏要離開我……」
吳大用冇講落去，但佢眼神堅定，似乎佢真係相信，佢本來唔會殺小雯，係我偽造剪報令小雯想離開佢，佢先會痛下殺手。
我咩都講唔出，我以為我會拯救小雯，結果我令殺佢嘅凶手，由階下囚變成大富翁。
甚至連吳大用都以為，係我誤導小雯，先令佢「不得不」殺咗小雯。
當你幻想，如果可以改變過去，未來就會變得更好，
通常，都會愈改愈衰。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #救一個二十年前死咗嘅女人
六合彩結果號碼今期 在 香港六合彩-105期・2022年12月15日・重溫現場攪珠 - YouTube 的美食出口停車場
即上【六寶APP】網站睇更多精彩 六合彩 分析走勢啦！ ... 六合彩 攪珠 結果 # 六合彩結果 # 六合彩 開彩#我會中頭獎# 六合彩 # 六合彩 大數據#六寶APP #網站#... ... <看更多>