讀者投稿《親娘不及老爺奶奶篇》
你好，想搵個渠道宣洩下，講下我同我媽相處既問題。
我父母係我好細個已經分開左，以前會嬲爸爸有第二個令我冇個完整既家，但長大左就明白以前爸爸好辛苦好難頂，係我做野有經濟能力已經快搬左出去，雖然花費多左好多，但自由真係無價，以前屋企住日日都唔開心，成日搵地方去都唔想番屋企，到自己住先覺得有自己既人生
我一年前結左婚，慶幸老爺奶奶都好好，覺得佢地比我親父母更親。
一齊住果陣勁多問題，搬走之後已經好左好多，但間中見都有好多野令我想更減少見面機會
計較：
1. 果陣想結婚，一開口就問禮金比幾多，然後覺得應該要有十萬以上，好在最後都講店數
2. 其實我完全冇試過唔比家用，但有時唔經開櫃員機未必會準時，總之一遲就日日wtsapp/電話狂追，父母分開後佢一直有問爸爸拎瞻養費，爸爸唔算好充裕，有時周轉不靈都會狂追，其實佢自己有工作有積蓄，我同爸爸加埋比既家用都接近兩萬，經濟上完全冇問題，但永遠遲小小就追債咁，一見我買野就開口埋口：比家用又唔見你咁爽手，又成日話佢邊個邊個fd個女比幾多幾多家用
麻煩，咩都怨
總之咩都可以怨同小一大餐，買野比佢/出去食飯都要比佢罵，嫌3嫌4，一日小到黑
控制狂
咩都要依依哦哦，要人跟佢既意思
1. 話飽/唔想食/胃痛都要迫你食晒d野，明明我覺得熱，佢覺得凍就迫我著3
2. 知你去飲，問你做幾錢人情，又話洗咩做咁多，又話成日有朋友結婚賺埋都唔夠比人情，去黎做咩之類
3. 成日話想同我地去旅行，但試過兩次都太麻煩，又係嫌3嫌4，諗起都怕，明知我地唔想都成日提住想迫我地去。
完全唔識尊重別人
有時我地番娘家會帶埋狗仔，有次狗仔食淨既狗糧佢竟然用袋入番起，幾個月後拎番出黎比佢地食，又成日想亂比野佢地食，我地講左唔好，佢口頭禪就係：唔怕啦，狗咋嘛，以前d唐狗都係咁養，有冇咁巴閉。
慳家
節儉本來係美德，但有d位係矯枉過正。
1. 鐘意儲到d野過期然後比人食，d過左小小期既都算，有一次拎2013年過期既豉油，有一次我仆親佢拎左d過左期十年既藥水同紗布比我，然後又：唔怕啦有咩咁巴閉。
2. 鐘意將用過既紙巾儲起，屋企有個盒收藏佢用過既紙巾，都唔緊要。有一次出街我地去廁所，我拎包紙巾出黎，佢話抹一次唔好用新咁浪費，拎左我包紙巾然後係佢褲袋拎左張用過既比我，我果下嬲到跳制，然後佢又出果句口頭禪：怕咩姐有咩咁巴閉，大佬我真係唔想為左慳張紙巾搞到尿道炎。
好在我冇兄弟，如果唔係有個咁既奶奶都幾惡頂...佢早排仲係咁叫我地生小朋友，其實都講左好多次我地唔鐘意小朋友，迫唔黎，其次我真係驚佢亂比野佢食又唔聽人講，到時一係反面收場一係我會抑鬱。
其實有時都覺得一個女人冇老公係身邊會好悶好慘，心理上想對佢好d同多d時間見佢，但實際上真係好難頂呀！ 其實我都係想借個平台傾訴下，辛苦晒....
#退一步海闊天高
#我的極品四大長老
