【36年後：Cobra Kai 再續 Karate Kid 前緣】
睇美劇，人人睇《Queen's Gambit》咁高級？我就偏偏低低哋，睇《Cobra Kai》。點解？
首先，潮流興懷舊80年代。君不見炒股炒 GameStop，多數人集中討論「大衛戰勝歌利亞」的散戶與對沖基金之戰，但也有人留意到這些社交媒體散戶捧的，多是「懷舊」股，還有AMC（電影院線）、Blackberry、Nokia 等之流。《Cobra Kai》來自80年代經典《Karate Kid》，有誰未睇過？哈，睇《Cobra Kai》，有入貨 GME 嘅 feel！
第二，竟然有名家介紹！疫情下有人日日幾個鐘頭玩 Clubhouse，我都係比較鍾意聽 podcast、webinar，學到唔少嘢。其中一個「飛佛」，係紐約時報 Kara Swisher 嘅 Sway，佢講科技、娛樂為主，之前訪問 Netflix 全球電視副總裁時，已經「表態」係《Cobra Kai》fan 屎，最近重訪問埋The Karate Kid 本尊 Ralph Macchio，點可以唔關注一下！
講《Cobra Kai》，要先講《Karate Kid》，電影拍咗三集，分別喺1984、1986同1989推出，第一集係經典，第二集主角去沖繩異國風情創出系列最高票房，第三集可以不理，其實仲有1994年女版《The Next Karate Kid》，勉強冇幸福，慘不忍睹（不過女主角Hilary Swank卻後來成為影后喎）。（其實仲有2010年Will Smith為咗捧個仔Jaden而監製嘅reboot，搬咗去大陸，師傅變咗成龍，空手道變咗 kungfu，delete 吧！）而《Cobra Kai》就承接《Karate Kid》最初兩個主角三十幾年後今日嘅事，徒弟變師傅，班中學生細路就繼續打落去！
《Karate Kid》係好 formula 嘅 teen movie，中學生爭女，被欺凌、瘦孟孟嘅𡃁仔，去學空手道，打贏惡霸，黑白分明，主角係好人，對手梗係壞人，加上上世紀80年代日本經濟起飛，收買不少美國資產，美國人當年都幾崇日，搵個日本師傅 Pat Morita，有《星球大戰》Yoda 大師 feel，一路拍咗四集都係佢，可惜佢喺2005年逝世，電視版無佢份了。
點 formula 都好，work！唔 work 嘅2010年成龍嗰集，差啲話拍續集，好彩無，但監製包括 Will Smith 就搵返頭三集《Karate Kid》男主角 Ralph Macchio，同埋佢嘅老對頭，當年蝦蝦霸霸嘅死靚仔 William Zabka，拍電視再 fight 落去，仲 work！2018年第一季、2019年第二季《Cobra Kai》，都喺 YouTube 播，後來 Netflix 買咗，第三季今年2021年一月上架，第四季嚟緊，每季十集，每集半小時，好快睇完！
當年世界好簡單，男主角梗係好人，對手梗係衰人，不過，《Cobra Kai》就較多以 William Zabka 飾演嘅角色出發，其實佢都唔係咁壞，細個時血氣方剛，鬥咗嬲咗三十幾年，十幾歲到五十幾歲，其實幾幼稚。不過，唔幼稚，又點懷舊？咁先好睇。上一代鬥到下一代，啲仔女同啲同學繼續互片，然後啲細路好人會變壞人，「成魔」後又從返良，好似《星戰》Kylo Ren，第三季最後兩個主角阿叔重遇初戀情人後，聯手抗敵，下季同真正大壞蛋班𡃁再戰空手道大賽，邊個贏唔重要，重要係過程嘛，搵故嚟講，先至過癮！
懷舊迷請留意，頭兩集電影女主角，分別係 Elisabeth Shue 同日裔嘅 Tamlyn Tomita，當年喺1984同86年係佢哋 debut 作，都係首次登上銀幕，兩人大概對 Karate Kid 系列都有點感情吧，會分別喺電視第三、第二季現身，當年兩位真係可愛美少女，而家都咁有味道，keep得好好，擘大眼唔好錯過！不過，有點感慨嘅，係第二季有一集搵返當年電影中四個金髮死𡃁仔聚舊，主角之外另外三個已經係光頭阿伯嘅樣，其中一人劇情話佢有絕症就快唔得，原來呢位 Rob Garrison，後來真係2019年因病走咗，拍埋呢集，應該真係為佢做定紀念遺作，有心。
將三十幾年前嘅原角以原班人馬重現，卅幾年前個反派死𡃁仔 William Zabka，而家雖帶點滄桑但算有型，而 Ralph Macchio 更加今年就登六，仍然 babyface，滿足哂一代 baby boomers 滿足自我型像，好似睇返自己同班老友咁，久唔久 flashback show 返頭兩集電影片段，加上 Journey、REO Speedwagon、Foreigner 等80年代 classic rock，無得輸啦。
睇《Cobra Kai》勝在唔駛用腦，不如荷里活話埋俾我哋知，卅幾年後嘅《Footloose》同《Flashdance》而家點呢？OK OK，適可而止，算了吧。
#光影評 #影評 #電影 #電視
