《他只有兩個選項…餓死與病死》
「喂…係…係…知道，
睇到新聞…咩都停晒呀嘛。知知知，咁但係，我開咗一日工，嗰份糧幾時會出埋佢？」
「我都追緊判頭呀。判頭就追緊展商。你等下啦。」
電話被掛上了。
男人深重的呼吸聲，即使隔著口罩，也聽得到。
他之後再打了個電話：
「喂，阿張呀，今晚餐廳使唔使要人呀？」
電話筒內的阿張先是沉默，然後語氣頗不友善地說：
「今晚...都唔撚畀坐人，要咩人呀？」
他笑笑說：
「咁廚房仲要整外賣呀嘛，都要有人包下嘢嘅。仲有...」
阿張未待他說完：
「我自己包緊啦。挑，小貓三四隻都無，得嗰一兩隻咋。自身難保呀，江湖再見啦。」
『咔。』掛線了。
看來，未來幾天的工作，同樣無望。
男人有一個習慣，心情不佳時，
找一條最會繞遠路、最會塞車的巴士線，用HK$10.4，消磨一個半小時。
晚上8時，在巴士上層俯瞰，
在人生這40年中，他從未見過在這個鐘數，旺角的店舖有一半已經落閘。
而諷刺的是，在半空中依然高掛著新樓盤的廣告。
「誰會買？至少不是我。」
他自嘲了一下。
有些餐廳即使開門，內裡也大多空無一人，員工坐在一角，眼神沒有盼望，空空洞洞。
似是看不清未來，又或者根本沒有。
大大隻的「抗疫價」/「外賣自取」的Label，
在他眼中都變成掙扎求存的最後手段。
在這一年，
他終於明白，甚麼叫「苟且偷生」。
對，是一個成語。
他還記得，學生年代時，他還很喜歡看《成語動畫廊》。
YY：「博士呀！我知道點形容狗仔嘅生活啦！」
博士：「YY，咁係咩呀？」
YY：「就係苟且偷生！」
博士：「哈哈，YY你又錯咗啦！苟且偷生並唔係用嚟形容狗仔㗎。」
YY：「吓，咁呢4個字係形容啲咩呀。」
博士：「哈…你就當係一個男人，人到中年，公司先執笠。
佢又無咩技能，讀得書唔多，搵唔返份工，炒散都無人要，追返份人工都畀人笑。
畀唔到保障屋企人，
連喺社會上想講句真心話，都會隨時犯法畀人拉～
嗱，呢啲就叫苟且偷生啦。」
YY：「我明啦博士！即係佢連隻狗仔都不如啦。」
此時男人小聲地說：
「無錯啦YY。就係咁啦。」
下車後，他找了一個人煙罕至的地方，抽了一根煙。
在個多月前，他以為疫情會完結，自己會出現生機。
誰知情況急轉直下。比往時更差更差。
自己的積蓄已經所餘無幾。
他不像朋友阿強，儲的錢，捱一年不成問題；
也不像舊同學Joyce，工作不受影響，最多WFH；
也不像舊同事David，父幹無雙。
世界上，依然是有些人...面對最殘酷的選項。
病死 與 餓死。
橫又死，掂又死。
奏起哀歌者，必有令其傷悲的原因。
但又是誰逼得他們連一口氣都喘不到？
男人知道是誰，卻又苦笑：「一陣屌班垃圾官，分分鐘又要拉要鎖。」
防疫不力，永遠市民硬食。
滑稽的政策，往往是他們的聖經。
煙滅，路還是要走、家還是要回。
關上門後，
他的老婆輕輕的問一句：「啱啱睇咗新聞，啲展覽應該開唔成…咁你份工…」
男人說：「係呀，應該都無得返啦…」
老婆卻拍拍他：「唔緊要啦，再搵下囉，你都唔想嘅。」
幸好，他老婆是個比他樂觀100倍的人。
但男人依然想給她一點希望：
「唔怕呀，啲Fd話而家啲外賣App好缺人，我諗住送陣外賣頂住先囉。」
老婆借故開個玩笑：「哈哈！你都無車！畀唔畀你送㗎！」
男人也笑說：「可以做『步兵』㗎嘛！我好行得㗎。」
二人閒談至此，話題也像是完結。
可能是老婆亦想男人安心，於是…說出另一句話。
老婆不經意地說：
「不過老公呀…好彩呢，年頭嗰時，個BB流產無咗咋…如果唔係，而家多個B…都唔知點算。」
聽到這句，男人應了一句：「係呀可…我去洗手先。」
接下來，他關了廁所門，開大水喉。
默然地哭了。
因為他知道…
流產怎會用「好彩」來形容？
絕對…不會是「好彩」？
自己是多麼沒用，
才要令她將「不幸」都當成「幸運」，在生活中苦苦掙扎？
洗手的時間一般而言是20秒…
但今天他，洗了2分鐘仍未止得住眼淚。
明明只是想努力下去，為甚麼卻愈努力，愈掉下去。
他只想…抬起頭時…望到一點點光。
讓他捱下去。
老婆在外面像說了些聲音，可是被沖水聲覆蓋。
對呀…洗手的時間太耐了，老婆起疑了。
他告訴自己一定要硬淨，要頂住。
就如這個城市的所有人一樣，頂到…看到光為止。
不過他之後會知道，光，總是存在的。
因為老婆當時說的話是：
「老公老公！出嚟呀！
啱啱美國宣佈話，製造到武漢肺炎嘅疫苗啦！等到啦！等到啦。」
等到啦。
IG: cheungson88
https://www.instagram.com/cheungson88/
你的一下Follow，我的無上成就
