生死守恆村（下）
上集：https://bit.ly/3hEVNxR
我偷偷開咗錄音筆，扮到好為難咁話：「搬過嚟？但我啲錢用晒啦。」
村長答：「哦，唔駛要你嘅錢，係成為我哋嘅一份子，喺呢度落地生根。」
我冷笑一聲：「然後呢？幫你哋湊夠88人，等有一日，你哋嘅人數超過咗，就將我殺死？」
「你講咩？邊有人殺人？」村長臉色一變。
「男嘅細眼、女嘅短頭髮……」我形容相中嗰對男女嘅相貌。
李嬸尖叫一聲，匿到村長背後：「你點會知㗎？鬼啊！」
村長退後一步，然後穩住身形：「有鬼我都唔怕，我哋已經畀足錢，叫你搬出去，你偏偏獅子開大口，抵死！」
我都想扮鬼，但呢間屋開晒燈，我又冇咩準備，都唔知點扮好。
僵持咗一陣，佢哋就發現我唔係鬼，村長冷哼一聲：「原來唔係鬼，不過你咩都知道晒，唔係鬼都要變鬼啦。」
我心中一寒：「為咗維持『生死守恆村』嘅傳說，你哋不斷殺人？一旦村民數目超過咗88個，你哋就殺咗多餘嘅人？」
「邊有咁變態，如果死咁多人，早就俾人發現啦。」李嬸尖叫反駁。
村長擺擺手：「算啦，你都就嚟死，我畀你做隻明白鬼。」
村長講出真相，原來，「娘娘寨」本身好窮，稍有能力嘅村民都會搬出去，村民嘅數量一直冇大幅增加，大概係八九十人咁。
唔知點解，慢慢就傳出咗「永遠只有88人」嘅傳說。
有咗傳說之後，貧窮嘅村落突然成為景點，有遊客有收入，村民就協議好要維持呢個傳說。
一旦人數超過88個，村長就會畀一筆賠償，叫多餘嘅人搬出去，並且保守秘密。
初時係好順利嘅，因為條村窮丫嘛，大家拎到少少錢，足夠搬出去就好滿足。
但近年來，遊客數量增加、消費都多咗，村民開始有錢，冇咁想搬走。
今年年頭有個嬰兒出世，村長就叫村民小龍搬走，因為小龍單身寡佬，父母雙亡，最無牽掛。
點知，小龍唔滿意賠償嘅金額，更獅子開大口，唔畀夠錢佢，就將條村嘅秘密爆出去。
村民為咗共同利益，殺死小龍。
但估唔到，小龍同另一個村民小鳳有咗私情，殺人嘅過程咁啱俾小鳳睇到，只好殺埋小鳳滅口。
小龍同小鳳，被埋喺村後嘅森林。
但係，條村就少咗一個人。
所以村民開始物色遊客，睇吓有冇遊客係冇咩親戚牽掛，而又窮窮地，有機會搬過嚟，咁就揀中咗我。
村長講到呢度，似乎仲未講完，但我拔腳就跑。
該知道嘅都錄低晒，我知道村長一講完，就會搵人嚟殺我，唔通我等死咩。
果然，跑出李嬸屋企，門口有兩個壯男，即刻追住我。
好彩我跑得快，跑咗好耐，我終於逃離咗呢條村。
之後，我就返咗城市，公開「生死守恆村」嘅秘密，仲公佈埋條錄音。
一時間，呢件事喺網上掀起討論熱潮，警方都派人去森林度搵屍體。
但係，警方搵唔到屍體，我估，應該係我啱啱逃跑成功，村長佢哋就轉移咗屍體。
有遊客去過「生死守恆村」，影低咗嗰幅大合照，見到呢件事，就擺埋上網。
一時間，大家都知道小龍同小鳳係咩樣，有埋受害者嘅形象，就更加落力譴責條村。
點知，突然有一日，村長發表聲明，係帶埋小龍同小鳳一齊發表聲明。
佢哋話，真相係小龍愛上小鳳，但小鳳屋企人嫌棄小龍係孤兒，所以佢哋私奔。
兩個「死者」生勾勾咁走出嚟，當然證明村民冇殺人。
小鳳仲話，私奔後好後悔，見搞到滿城風雨，佢決定同小龍分開，返去娘娘寨。
即係話，「生死守恆村」又變番88人。
大家都鬧我造謠，我都完全唔明白，點解村長明明冇殺人，當日又要同我講佢哋殺咗人，仲俾我錄埋音。
冇人解釋畀我聽，不過，一年後，我又見到一個熱門Post，又係揭秘「生死守恆村」。
開Post嗰個人嘅經歷同我差唔多，又係去咗旅行，偶爾發現咗秘密，跟住村長講出真相，想殺佢滅口，佢僥倖逃脫……
唉，我明啦，所謂嘅「發現秘密」，只係村民嘅計劃。
當佢哋發現有遊客到處打聽，就搵機會將個「秘密」加加減減，洩漏出去。
發現秘密嘅人，好可能會努力公開件事，一來為咗正義，二來顯得自己好勁好有偵探頭腦。
一來二往，「生死守恆村」就可以爆紅，有熱度，先有源源不絕嘅遊客。
至於點樣保持88人？諗番轉頭，都有好多方法。
多咗人嗰陣，就叫村民搬去其他村落，少咗人就叫人搬番嚟，唔駛殺人咁嚴重嘅。
我以為我好聰明，可以發現秘密。
殊不知，真正聰明嘅人，已經不屑炫耀自己嘅聰明。
佢哋更在乎嘅，係點樣利用自己嘅聰明，換取更大嘅利益。
—完—
真人真事改編自「生死守恆村」，在湖北有一條小村，傳說在一百多年來，一直維持生死守恆的定律，永遠只有88人。
後來發現，這個傳說只是提升景區知名度的噱頭，村民見有利可圖，願意繼續這個謊言。
將專頁設定為「搶先看」/ "See first"，最新故仔馬上睇！
老公愛指甲：https://goo.gl/Lb24iq
全家都想食我：http://bit.do/fedrQ
#短故 #短篇 #小說 #陳美濤 #廣東話 #粵語 #tomatochan #生死守恆村
