人住沙田，新城市的餐廳是我解決飲食的重要來源。每有新餐廳也特別留意，當然我不會第一時間去試新餐廳，因為阿媽細個時候都有教，酒樓新開張唔好去住，等佢啲蒸籠用返咁上下，人手順暢至去。所以我前日先至去呢間新開嘅Cafe。
在訂票機訂了位，去到啱啱好輪到我，都明白呢啲小餐廳嘅位係會安排得比較逼夾，其實你喺新城市廣場開餐開得多，都會知道個位一定聽到隔離講嘢，但係點都估唔到佢俾我呢張二人枱，基本上同隔離果張枱中間嘅距離係少過半吋！我一見就話：咦，有冇第二張啊！結果坐咗上吧枱，都幾好鬆鬆動動，仲可以睇下周圍環境。
食物唔算貴，百幾蚊有湯有主菜有咖啡有雪糕。
湯嚟啦，亦都係大家會追看呢篇嘢嘅重點。我當晩係飲過兩碗湯嘅，留意，係飲過，唔係飲咗！因為第一碗粟米忌廉湯，係酸嘅。之後同個着黑衫看似高級嘅姐姐講，佢好快收返入去之後，換左一碗雜菜湯俾我。之後就解釋佢有兩㷛粟米忌廉湯，一㷛壞咗，一㷛冇壞，可能嗰個𢳂過壞湯嘅湯殼用咗嚟𢳂我哋兩碗粟米湯，所以至會酸，基本上啲湯係冇壞嘅！
其實佢想講乜嘢呢！壞咗就認，打就企定！
之後食物相繼到達，幾大份，材料足，一定飽肚係我嘅結論。
由於我坐喺吧台所以對於水吧嘅服務員睇得好清楚，佢全程𢲡埋口面，我明白佢一個人做水吧，沖咖啡係佢、𢳂雪糕係佢，調飲品係佢、放水蜜桃落杯又係佢，真係忙到唔停手，公司完全俾唔到咖啡師應有嘅優閑時間佢。另外我亦有留意其他侍應，基本上冇一個係有笑容嘅，其實唔好講有笑容連寬容少少都無，相信唔關員工事，管理層要諗下啦。
係乜嘢令到嗰煲湯酸咗都仲攞出去賣呢？係員工冇時間去發現呢個問題，定係壞咗都唔敢倒怕影響條數呢，希望管理層好好反省。
最後我必須要講，杯咖啡係好飲嘅。
#何嘉麗CallMeGaGa #何嘉麗 #新城市廣場 #MellowBrownCoffee #UCC #杯餐啡真係好正 #係乜嘢令到嗰煲湯酸咗都仲攞出去賣呢 #希望管理層好好反省
