是咁的，我女神Send咗個QR code畀我，問我會唔會add佢mewe。
我諗都唔諗就答：「會！我而家即刻Add！」
於是我立即dl個mewe，然後打開相機想scan QR code，再打開埋女神個QR code。
嗰一剎那，我當場呆咗，陷入沉思，腦海響起x file嘅音樂…
我得一部手機，到底點先可以scan女神個mewe QR code？！
喺我身邊嘅阿強問我：「做乜滿頭大汗？有咩幫到你？」
「無事，我自己搞得掂！」雖然我可以借阿強嘅手機，但我係唔會畀阿強有機會add到女神嘅mewe。
於是，我搵咗個公廁，想對住塊鏡試，但我嘗試咗幾次，無論我動作幾快，都無可能用一部電話，打開相機同時去scan QR code。
剛好，有個阿叔去完廁所出黎，我打算搵佢幫手。
「阿叔，可唔可以幫我一個忙，你用手機影一影個QR code，然後畀我用手機scan 你手機嗰張相！」
「咩影咩scan 啊？阿叔唔識玩呢啲科技嘢喎。」
「好簡單㗎啫，我一步步咁教你，你拎部手機出嚟，用相機對住呢個QR code先。」
阿叔照做：「咦，好趣緻喎，有個嘢彈出嚟喎！」
「你唔使理佢，影相就得喇！」
「我撳咗啦，咦？！個女仔幾靚喎！」
「阿叔你專心少少啦！我想你用手機影個QR code，唔係去add個女仔啊！」
「等我add佢做朋友先得，好彩我都有mewe。」阿叔。
「你唔好掂我女神啊警告你！」
真係估唔到，呢個阿叔仲快過我dl mewe。
如果女神見到阿叔add佢，可能會誤會咗阿叔係我，accept佢嘅邀請。我唔會容許一個阿叔去加我女神！
「阿叔你唔好亂嚟啊！你而家停低手上所有動作！畀我手機我！」
「我想add個女仔…」
「嗱！放開你隻手指公啊！我知你想點啊！」
就喺呢個時候，女神又send咗個msg嚟。
「點解咁耐都唔見你add我？你唔想add ？」
「唔係，我好想！」
「你唔係同我講你未有mewe嘛？」
「傻啦點會呢？連街邊去公廁嘅阿叔都有mewe，我點會無啊！」
「咁你仲唔add我？」
喺呢個時候，我終於忍唔住要爆喇！
「你畀條link我add妳啦，我得手機點用QR code add妳啊八婆！」
女神靜咗。
我靜咗。
阿叔靜咗。
阿強走入嚟，原來佢一早就add咗女神做朋友。
「哈哈哈，無兩部手機學咩人溝女啊！」阿強。
我用mewe搜尋女神個名去add佢。
佢拒絕咗我…
正八婆！
－－－－－－－－
我就貼心好多，想大家訂閱Patreon睇更多獨家故事
都會貼條link～
https://www.patreon.com/Bluegodzi
想大家買書，都會貼link
https://bluegodzistore.boutir.com/
