[免費開放舊文][個案分析]30歲人工唔高去創業有苦自己知！點用投資平衡收入？
原文link：https://www.patreon.com/poorlhk?filters[tag]=個案分析
讀者Y：
窮生你好，
本人剛剛踏入30歲，27歲前一直冇特別嘅儲蓄目標，戶口經常只有2萬作fuck you money，通常都係辭職用。
我從事文職工作，月入萬零至2萬蚊，後來決心儲蓄，用咗一年時間，戶口終於儲到10萬。雖然對好多人黎講10萬儲蓄其實好少，但第一次儲到呢個數，心底係好開心的。
上年年中因為工作上遇到好誇張嘅人事問題，毅然決定辭職同朋友一齊開公司，但因為生意唔穩定，加上屋企有事，戶口一度只剩4萬。我唔想就咁放棄開公司，於是有keep 住搵freelance去令自己有多d 嘅收入渠道。
現時每月可以維持至少萬零蚊收入，有時公司生意好就有近3萬。雖然收入唔穩定，但賺到自由以及唔需要再理辦公室政治，感覺舒一口氣，當然有時我都會好擔心接下來嘅收入問題。而就喺上個月，戶口終於重回10萬了。
我嘅問題就係，我諗住投資都諗左一年，一直都有留意財經，國際及國內時事新聞，會去嘗試去了解當中關係同變化，但係一直都未敢有投資行動，主要唔知應該買月供股好，定係應該直接去試下買d ETF，又或者其他股，變左一直stuck 喺度觀望。
我每月各項洗費合共約$6000-7000(冇買任何保險)，家用$4000，其餘會用作儲蓄。
我迷惘咗好耐了，希望窮生可以比d 意見我。無限感激！
窮生回應：
好開心終於有返d冇咁高門檻既個案，大家需要知道，有時唔係我唔想揀大家d case，而係大家d case太勁，個個都係百萬年薪專業人士，有一千幾百萬樓。我答完一個，第個又覺得太似。而家終於有個係典型香港刻苦男出現！
首先阿Y，27歲2萬唔算係fuck you money，我地一般講fuck you money係要維持到自己生活大約6個月。2萬真係明顯不夠。但有一點我係好支持你！就係創業，坦白講，以你30歲從事文職工作，收入真係唔高，而好多呢種工都係相對比較舒服的。係咁既情況好多人會寧願係自己既Comfort zone就算。而你可能都因為錯有錯著，有野迫到你走出黎辭職同朋友一齊創業。當然由於我唔知你開咩公司，都唔知你做成點，所以都俾唔到意見。但係我有時覺得後生仔，其實係好應該嘗試下挑戰自己的。
講到創業，其實你講得好岩，尤其係初期收入唔穩定，好多時做好多好多都出唔到自己糧，係有苦自己知。創業既人係孤獨既！不過好似你咁講，自己可以掌握既野同打工真係冇得比，呢份滿足感令好多人一做過老闆就好難再打返工。不過我必須提醒你，以一個30歲既人黎講，10萬既儲蓄實在太少了！呢個先真係叫做fuck you money。而你應該要係呢10萬以外努力儲一筆錢作靈活性高既投資。fuck you money只可以做穩定收息既部份。
所以我既建議係，首先你個心主力應該放係如果擴大你既生意。投資之道始於現金流，你要有水入，個水車先會轉。而你既增加現金流既方法，就係利用生意既收入黎推動個水車。而由於你做生意，仲係初期階段，公司規模同收入都不穩。所以你不宜係投資上都做太高風險的。你應先當儲錢，買入一d例如reits，港股既公用股，美股可能可以揀一d指數類既被動型etf買下。先有一個投資既感覺！我經常提到4大收入係互相補足，你收入唔穩定，就用穩定收息既投資平衡。你係公務員，你既投資就係俾你冒風險。所以人人不同。
最後我要用呢個個案講一樣野，就係大家唔好放大投資既力量。大家唔係全職炒家，投資對我地而言唔係一個主要收入來源，而係透過多年累積，等佢既回報可以係20－30年之內慢慢取代你既主動收入，達至財務自由。當然，其中你可能有d機會係升市贏到比較多既錢，但係唔好因為見到股市既好，忘記左風險。始終，我地都係有自己事業，有自己生活既人。錢係身外物，用左就唔再係你，所以有錢唔係好有用，而係係你獲得金錢既過程，同時為你帶來乜野。例如你有左你既公司，有左你既Network，有左公信力，呢d野更加值得大家投資。
