【壹號皇庭？聽到主題音樂都傷心！】
當年係Yuppies，依家都唔知係乜？
唔係扮小丑同寵物，就係做法律塔利班，再唔係就做勤奮偽中產！
香港近期重播【壹號皇庭】，厘套係當年屋企人會全部錄起晒，留比我番香港好睇嘅劇集（錄影帶，哈哈哈）。當年律師真係香港嘅精英、專業同中產嘅代表，嗰時有樣嘢叫做"Yuppies"，即係Young Urban Professionals。同舊香港一樣，絕咗種幾十年。
律師响世界上，好多時都會從政。可能係因為佢地嘅學術同職業，比較其它行業講求多點理性、邏輯同分析，而且佢地嘅表達技巧亦較高。不過咁嘅一班人，對當年嘅殖民管治就緊係唔多好啦，印度甘地就係最佳例子。所以當年港英政府利用精英制加上搵錢能力，令到法律界除咗識自豪自己嘅身份同專業之外，就係享受生活，政治就唔多會理。其實【壹號皇庭】裡面，大家都可以多少聞到嗰陣味嘅。
上一輩嘅律師，退休嘅搵夠退休，走嘅亦見唔對路晨早走晒。留低嘅呢？無咗原裝法治制造者嘅主人，結果咪靠當年祖宗剩落嘅法律自己玩囉，你估真係「英國人做到的，中國人都做到」咩？再加上港英政治留低嘅德政，每年大量制造律師，再令律師費自由競爭，質素減但係數量多（厘個我覺得真係地雷），死未？最慘就黎咗個出名無髮（法）無天嘅新主人，咁有乜辦法唔「法治已死」呢？
結果大家睇到晒，可以話係慘無人道！
無良知嘅呢？
就為求利益，利用自己嘅所謂專業身份，去爭取主子嘅歡心囉。不過佢地叻在讀壞書，能夠用盡佢地所學嘅詭辯能力同似是而非嘅邏輯，去為主人嘅指意護航。更甚者，就再用自己嘅專業身份同詭辯能力去做扮小丑同寵物，真係可笑、可恥、可悲~
有良知嘅呢？
我感覺又唔好得幾多，就只係識對著啲法律條文當聖經，變通能力低（唔敢講係零）。佢地嘅理性、邏輯同分析，只懂得用黎攞道德高地，營造自己嘅地位。一講唔合理嘅法律條文或者法庭判決，就變咗塔利班（原教旨主義），除咗識搵理由去認同，辯駁同分析機能就完全關閉。嗰啲唔洗律師都應該有嘅獨思考，好似响差館報失咗咁！
無立場嘅呢？
能力高嘅就只會勤勤力力，為咗張卡片，為咗間大行，為咗個title，搵多普通人少少，做個有時間做，無時間洗嘅偽中產囉（我識嘅真係唔小）。學術成績比較低嘅嘅，就為咗搵食，得個銜頭，死做爛做，辛苦過以前新界啲牛。每日香港嘅報紙，都有好多律師行話你知佢地收幾多啦。離婚，做破產，平安紙，收得真係平過...唉
香港剩番一班「法治中流砥柱」，真係唔敢想象所謂法治社會重可以玩到幾耐呢？（可能係外籍法官「被退休」之時！）
#壹號皇庭
#唔想再睇
#只可以懷念
#因為唔會再有咁嘅香港
#亦都唔會再有Yuppies
#一聽到個主題音樂就毛管戙
#英國人做到的
#有啲人真係做唔到
