//支持本Page請Click入內文比Clap，已為Medium收費會員請直接Click入內文閱讀，謝謝！//
聽日就係「萬眾期待」嘅區議會選舉。最多人問嘅問題自然係：「搞唔搞得成」？事實上響呢幾日各方勢力都瘋狂咁四出收風，想知道「黑衣人」同「黑社會」究竟會唔會響選舉日衝擊／搞事。而我可以好負責任咁同大家講，相比起飯民，建制派係更加想區議會選舉如期舉行，仲要係急到瀨果隻。
好多人都誤解咗，建制班人一定好驚輸，一定好想區議會選舉腰斬以避過大敗。但事實上卻係，早響一個月之前，佢地經已評估過選情，有啲議席的確可能會輸，然而飯民想區議會議席過半卻係絕不可能發生，甚至響最悲觀嘅預測結果，都只不過係喪失幾個區嘅區議會控制權──你可以嘲笑佢地嘅天真，不過佢地嘅睇法卻係建基於超級電腦同長期掌握住戶數據，甚至擁有各式各樣「暗黑手段」結果之下嘅結果，信不信由你。
而就算撇除選情唔講，曾經有建制中人被問及究竟佢地想唔想選時反問：「今次唔選，係咪即係會延後選呢？如果始終都要選，我寧願呢一刻就選」而家香港人經已覺得自己無乜自由，選舉算係唯一可以出氣嘅地方，你每一次延後，其實就只會令香港人覺得連僅有嘅權利都被剝削埋，呢種怨氣累積到下一次選舉就會以倍數爆發出黎，而且仲隨時連累埋之後嘅立法會選舉。所以除非中共係決心完全取消香港嘅民主制度，否則響建制派立場從來都係，要選就即刻選。
掉番轉，企響勇武抗爭角度黎講，區選如期舉行係壞處愈大於好處：
1. 區議會大勝對抗爭者幫助其實非常有限：唔單止係講緊區議會職能同權限根本幫唔倒抗爭啲乜嘢，就當有幾十個抗爭者可以當選成為區議員好未（我好懷疑有無咁多）？同以千計面臨經濟困難嘅抗爭者數目相比，根本係杯水車薪；
2. 飯民對於今次區議會選舉將會獲得大勝實在吹噓得太勁， 一旦響區選得唔倒滿意嘅成績，隨時會對抗爭氣勢造成重大打擊，甚至觸發抗爭衰退潮；
3. 相反，好多溫和派以至飯民目前仍然拒絕放手一搏，就係因為仲有選舉呢個綺夢發緊。如果真係迫到政府延遲、腰斬選舉，甚至永久取消選舉，咁就真係可以將所有非建制派綁哂上抗爭戰車上面，萬眾一心同政府死過。（當然仲有一班移民死廢老，但佢地係唔係唔出手、坐而論道都等死架啦，可以不理）
即使有咁大誘因令勇武派響選舉日繼續發動抗爭，而幾乎可以肯定只要票站附近一出事，政府幾乎係別無選擇之下只能關閉票站、暫緩選舉、甚至無限延期。但我仍然相信星期日區議會選舉係會響一個近來罕見嘅和平氣氛下進行；除非有極其戲劇性嘅事件發生（例如黑社會騷擾選民、防暴阻礙市民投票之類），否則票站附近出現衝擊嘅機會係近乎零。
點解？因為勇武抗爭者同飯民黃屍唔同，勇武唔會好止黃屍咁樣樣計到盡，而且相比起對抗爭有利定有害，勇武會認為堅守原則更重要。
響六月以來嘅抗爭，勇武派當然明白無和理非嘅支持，抗爭只會孤掌難鳴。其實只有響呢場抗爭入面投入愈少嘅人，先會愈對呢場選舉有強烈嘅執著，因為佢地覺得對抗爭無作出過咩貢獻，就想像投票踢走建制派係一件好偉大嘅事。相反愈響前線逗留得多，其實先會愈明白現有嘅制度根本已被扭曲到連一個市民基本人權都保障唔倒嘅地步。
但既然和理非經已將自己所有希望託付響今次選舉上面，勇武派最終亦會以避免響星期日同警察發生衝突，作為對和理非嘅最大回報。
同時佢地亦明白，即使香港嘅民主制度係形同殘廢，但投票始終係香港市民嘅權利。固然完全撕破特區政府借假選舉維穩嘅假面具，先至會令全民覺醒，但既然仲有咁多香港市民仲想藉行駛投票權黎作Final Fantasy，勇武抗爭者亦順理成章要守護埋呢一部份。
所以唔客氣講句，區議會選舉之所以能夠順利舉行，就係出於勇武派對和理非嘅最大包容，甚至不惜犧牲本身對自己有利嘅發展。而之所以作為焦土派，我今屆區議會選舉都唔會鼓吹全線投建制，個原因亦在於尊重呢班前線勇武義士嘅意願。
和理非應該對勇武抗爭者嘅忍讓心懷感激，響選舉過後唔好當勇武係Condom，唔好口講不割席，但卻繼續不斷貶低勇武抗爭嘅作用，抹黑勇武派作為，甚至口講支持，連丁屎咁多支援都無。
講番今次區選預測，既然飯民同建制都分別將今次選舉定位成「變相公投」，即係話響現有452個民選議席入面，是但一邊起碼要攞倒超過226席先叫贏，否則就係輸。
目前非建制派響區議會有124席，換言之要贏，議席就起碼要增加差唔多一倍──有可能嗎？選舉嘅嘢，未到最後一刻都唔會知，但你問我，首先2015年其實經已係響雨傘革命嘅背景下非建制靠傘兵響區議會獲得小勝；換言之當時已發揮咗相當一部份嘅反建制潛力，今屆就算進一步推高反政府情緒，估計非建制派大概會響今次選舉再增長50%，亦即係180席左右，同過半數仍然係有相當距離。
所以奉勸大家，唔好對今屆區議會選舉結果抱有太大希望，甚至應該怒屌果班成日開口埋口將區選當成「公投」嘅騙子，保持平常心境，甚至響開票之前，經已要開始部署抗爭嘅下一步。
既然係區選前夜，我亦順帶提出我響今次區選嘅推薦名單，主要都係一啲堅決撐抗爭，或者比民主動力迫害嘅弱勢候選人：
1. 旺角北1號蕭德健：整個嘅樣響深紅區旺角北參選，肯定係抗爭死硬派
2. 大圍3號鄒家成：因為同民主黨個阿嬸撞區，被瘋狂抹黑為鎅票黨。但實際上就係佢響抗爭最前線食過彈，傷到而家都未好番
3. 盛福3號呂智恆，因為阻止藍屍清理連儂牆被捕，然後又因為同新民主同盟撞區比人話係鎅票鬼
4. 帝怡1號謝潔詠：網友報料：「帝怡選區係劉青拒絕初選嘅情況下，民主動力竟然可以忽略沙田區政謝潔詠嘅存在，直接推薦地區年資少而無論述能力嘅劉青。呢種操作究竟係民主協調定政黨分贓？我都唔知。」
5. 石湖墟1號梁金成：溫和本土派，但我親眼見證佢點樣為本土運動努力過，林卓廷先派副手硬霸彩園區在先，長期對上水水貨問題放軟手腳在後，擇優而投，當然係揀金金大師
6. 楊屋道3號林錫添（史提）：響二坡坊呢個黑區連續第二屆出選，基本上係搵命搏，係我舊拍檔，一定撐
7. 華明2號劉嘉豪：舊拍檔，成日響前線救人，國難五金支持，相比起新民主同盟范國威出賣本土派同抗爭者，我寧願揀佢
8. 下白田4號方智龍：國難五金拍檔，還需要理由嗎？
9. 大角咀北2號李傲然：最後講到自己選區，理大校董，親眼見住佢被打到仆街，所以今次投票唔焦土，撐佢
二坡坊黑社會 在 李文浩Lee Man Ho - [荃灣][二坡坊][黑社會] 好心你哋做黑社會就 ... 的美食出口停車場
[荃灣][二坡坊][黑社會] 好心你哋做黑社會就有返啲底線啦，夠膽斬人就唔好做縮頭烏龜， 你間麻雀館畀人拆， 唔係話你係福建人， 係話你班黑社會有份斬人呀。 ... <看更多>