我為樂樂帶綠帽，盈盈珠胎暗結一事感到痛心疾首...
年初，我講過反對盈盈參加「全國大熊貓交配計劃」，但海洋公園同保育動物專家借保育之名，強行同盈盈打種，真係好仆街。
仲有一個星期，盈盈就生得，海洋公園仲話要為呢個「私生子」普選ＢＢ名，離哂譜，因姦成孕，仲要喺樂樂「帶綠帽」呢段時間，喺佢傷口灑鹽。
＃我問候樂樂
＃了解關懷帶綠帽的受害者
《盈盈應否返大陸交配》
眾所周知，香港出生率偏低，海洋公園安安佳佳，盈盈樂樂都冇仔生。一路而來我都覺得，冇仔生咪由得佢囉，無兒無女坐蓮花。啱啱睇新聞，海洋公園因為盈盈冇仔生，竟然安排佢參加「全國大熊貓繁殖計劃」，盈盈日內會比人拉返大陸同其他熊貓交配。
我聽到呢個消息，真係痛心疾首，頂你個肺。呢個提議真係冇人性，盈盈同送上門畀大陸熊貓強姦有咩分別？
－－－－－－－－－－－－－－－
一個銀仔有兩面，盈盈應否返大陸交配？呢個問題可以嗌到「天荒愛未老」，但我強烈反對盈盈返大陸交配。
－－－－－－－－－－－－－－－
--> 捍衛動物擁有「冇仔生不受歧視」嘅權利
盈盈無仔生，係犯左中國父權社會嘅大忌，「不孝有三 ，無後為大」。但佢冇仔生，佢想架咩？
人類係所有物種嘅最頂層，人類強行破壞其他物種嘅居所，對其他動物煎皮拆骨，甚至鎖佢地入動物園，再隔住塊玻璃話佢地好得意。做盡壞事，再幫佢地爭取權益，真係貓哭老鼠假慈悲。我地向來仆街，所以想大家覺醒下，可唔可以唔好太仆街。
--> 保障外勞嘅權益
盈盈係外勞，佢喺促進本地旅遊產業有好大貢獻。盈盈離鄉別井，我地應該捍衛佢嘅勞工權益。 Erwiana 畀人打，你都為佢抱打不平啦。盈盈向來「賣藝不賣身」，冇話包生仔，點解而家會變左生仔機器。
--> 造就破碎家庭
按照國際慣例，盈盈今次交配成功，部份仔要交還比中國政府，根據協議，第一、三、五胎會交比香港，雙數胎則會交還中國。大家忍唔忍心要拆散人地頭家先？
--> 假借保育之名，瘋狂販賣熊貓
中國不停送熊貓去唔同國家做外勞，美其名係防止大熊貓絕種，實際上利用熊貓帶來政治同旅遊嘅利益。保育熊貓點解唔可以喺中國保育，喺外國會保育得好D 咩？
--> 點同小朋友交代盈盈樂樂嘅關係
全世界都覺得盈盈樂樂係一對，夾硬拉盈盈北上尋歡交配，完全係瓦解一夫一妻呢個婚姻制度，變左多P，你點同小朋友交代。
－－－－－－－－－－－－－－－
我知道有一億個理由支持盈盈返大陸交配：
朋友話：盈盈本身係大陸落黎架，返去交配幾唔閒呀？絕緊種架，幫佢打種係幫緊佢成個族群架，佢咪當為成個族群犧牲囉。你又知佢唔想生仔？可能樂樂真係唔啱佢口味呢，你又唔係佢肚條蟲，你點知佢唔想返大陸交配先。仲有呀，佢個仔係單非兒童，冇香港居留權好正常姐…
夠啦，我只係想make sure盈盈唔係比其他熊貓「夾硬來」…
事情已經去到呢個地步，盈盈日內就會出發北上交配，海洋公園可唔可以交代下，盈盈返上去唔係暗室培慾，係可以自自然然，揀隻佢鐘意嘅熊貓先交配。我知我咁諗係好傻，中國連特首都冇得比我地揀嘅時候，盈盈上到去，可能一開閘，就見到：
1號熊貓：689
2號熊貓：CY
3號熊貓：英英
